Perkara Beselan, Haris Diukum 2 Taun, Muafaq 18 Sasi
Diposting oleh : Administrator
Kategori: Dredah Masalah - Dibaca: 235 kali

Majelis hakim Pengadilan Tindak Pidana Korupsi Jakarta nibakake vonis Kepala Kantor Wilayah Kementerian Agama (Kemenag) Provinsi Jawa Timur nonaktif Haris Hasanuddin pidana kunjara suwene 2 taun lan Kepala Kantor Kemenag Gresik nonaktif Muham­mad Muafaq Wirahadi suwene karote­ngah taun. Lelorone kabukten menehi suap (beselan) marang Muhammad Ro­mahurmuziy alias Rommy kang tinang­genah minangka anggota DPR RI lan Ketua Umum PPP. Malah, asmane Menteri Agama Lukman Hakim Saifuddin disebut­ake ing putusan perkarane Haris Hasa­nuddin, melu nampa dhuwit beselan Rp 70 yuta saka Haris. Putusan iku diwa­cakake majelis hakim ing sidhang ing Pengadilan Tipikor Jakarta, Rebo (7/8) kepungkur.

Kejaba ukuman kunjara 2 taun, Haris uga diwajibake mbayar dhendha Rp 150 yuta subsider kurungan 3 sasi. Vonis iku luwih entheng saka tuntutan jaksa Komisi Pemberantasan Korupsi (KPK), yaiku kunjara 3 taun lan dhendha Rp 200 yuta subsider kurungan 6 sasi.

“Ngadili, sepisanan, nelakake kadak­wa Haris Hasanuddin wis kabukten kanthi sah lan ngyakinake luput nindakake tindak pidana korupsi,” kandhane Hakim Ketua Hastopo nalika macakake amar putusan.

Miturut hakim, Haris kabukten menehi dhuwit gunggunge Rp 325 yuta marang Rommy sing kalungguhane minangka anggota DPR RI dalasan Ketua Umum PPP lan marang Menteri Agama Lukman Ha­kim Saifuddin. Klawan rerincen, Rp 255 yuta kanggo Rommy lan Rp 70 yuta kanggo Lukman Hakim.

Manut hakim, paweweh dhuwit iku merga Rommy lan Lukman Hakim saguh ngrekadaya proses pengangkatane Haris dadi Kepala Kanwil Kemenag Jatim. Salah siji syarate kanggo nglungguhi jabatan kasebut yaiku ora nate ditibani sanksi ukuman disiplin PNS tingkat sedhengan utawa abot ing limang taun pungkasan, sarta ngisi surat pernyataan ora lagi nin­dakake ukuman kunjara. Nanging, le­lorone nglirwakake aturan iku. Adhe­dha­sar fakta ing persidhangan, dhek 6 Janu­ari 2019, Haris kabukten menehi dhuwit marang Rommy Rp 5 yuta. Nalika 6 Pe­bru­ari 2019, Haris bali masrahake Rp 250 yuta. Tanggal 1 lan 9 Maret 2019, Haris menahi Rp 50 yuta lan Rp 20 yuta ma­rang Menteri Agama Lukman Hakim Saifuddin.

Hakim duwe panemu, unsur menehi samubarang ing perkara a quo wis kalek­sanan lan ana, ing tumindake kadakwa. “Majelis Hakim duwe panemu pawewehe dhuwit dening Haris marang Rommy lan Lukman Hakim pawewehe dhuwit gega­yutan karo kapilihe lan diangkate kadakwa minangka Kepala Kantor Wilayah Keme­nag Jatim,” ujare hakim Hastopo.

Saka tumindak iku, majelis hakim nya­takake Haris kabukten kanthi sah lan ngyakinake luput nindakake tindak pidana korupsi lan nerak Pasal 5 angka 4 Un­dang-Undang Nomer 28 Taun 1999 nge­nani Penyelenggaraan Negara kang Ber­sih lan Bebas saka Korupsi, Kolusi lan Ne­potisme.

Sawatara iku vonis kanggo Kepala Kan­tor Kemenag Kabupaten Gresik Muna­faq Wirahadi, kejaba pidana kunjara ka­rotengah taun, dheweke uga diwajibake mbayar dhendha Rp 100 yuta subsider kurungan telung sasi.

Majelis hakim yakin banget yen Mua­faq menehi dhuwit kehe Rp 41,4 yuta marang Abdul Wahab minangka dulur misanane Rommy. Kejaba iku, majelis hakim yakin banget Muafaq menehi dhu­wit Rp 50 yuta marang Rommy nalika tanggal 15 Maret 2019.

Gunggunge dhuwit Rp 91,4 yuta iku diyakini supata Rommy bisa mbiyantu ngolehake jabatan utawa kalungguhan minangka Kepala Kantor Kemenag Gresik.

Saka tumindake iku, hakim nganggep Muafaq wis nerak Pasal 5 ayat 1 huruf (b) undang-undang Nomer 31 Taun 1999 kaya kang diowahi klawan Undang-Un­dang Nomer 20 Taun 2001 ngenani Pem­berantasan Tindak Pidana Korupsi juncto Pasal 64 ayat 1 KUHP.

Sanajan mangkono, majelis hakim ngabulake permohonan justice colla­bor­ra­tore (JC) kang diajokake Muafaq dianggep bisa mbiyantu kinerjane KPK kanggo nleish luwih adoh perkara dal ti­nuku jabatan ing lingkungan Kemenag. (Tim)

 

Berita Terkait

img

Samak Minggu Ini

img

img

Sumber Semangat

Pawongan kang MITUHU mring GUSTI ALLAH, dudu ateges ora ana KEKURANGANE maneh.

Klik

ADOL KASET LAWAS

Ondi Turiyat, 78, ngramut koleksi kaset-kasete kang didol ing Jalan Cihapit, kutha Bandung. Sajege 1980-an, pensiunan PT. KAI iki pancen ngumpulake maneka kaset pita kanthi maneka jinis genre musik. Total koleksine ana 2.000-nan kaset pita. Pak Ondi banjur ngedol kaset-kaset mau kanthi rega Rp 5 ewu nganti Rp 100 ewu saben kaset, gumantung tingkat langkane. (d/ist)***

Pethilan

Presiden dhawuh susunan kabinet wis rampung

Sinyal, partai isih oleh nglobi ma­neh

Ayomi situs kanthi data kang akurat

Data ana, sertifikat duweke negara sing ora ana

Surya Paloh ngaku duwe pandulu kang padha karo Prabowo

Padha-padha ndulu duwe kalo­dhangan