Bakpao, Bakpia, Jus Sarwa Ungu Ing Republik Telo
Diposting oleh : Administrator
Kategori: Kagunan Dapur - Dibaca: 508 kali

Mlesedake Republik Indonesia, grup lawak ana kang madeg kanthi jeneng Republik Mimpi, uga Republik Sen­tilan Sentilun. Sing siji iki beda ma­neh, yaiku Republik Telo. Dudu grup dhagelan, nanging jinis usaha ekonomi kreatif. Saemper karo jenenge, usaha iki migunakake tela minangka bahan bakune.

Prodhuk kang paling misuwur yaiku bakpao seka tela. Panganan kang manut sejarahe asli saka ne­gara Tiongkok iku, umume digawe saka trigu. Nanging kanthi kreativi­tas, ing Lawang, Malang, Jawa Ti­mur, bakpao digawe kanthi cam­puran tela.

Salah sijine bahane yaiku tela werna wungu. Mula banjur bakpaone ya werna­ne wungu. Nanging uga ana kang semu kuning, amarga seka tela rambat kuning. Wis langsung nyolok mripat, amarga umume bakpao rak putih. Isen-isene werna-werna, ana sing selai nanas, stro­beri, coklat, keju, lan kacang ijo. Sa­ben sijine didol rega telung ewu nganti patang ewu rupiyah.

Sawise bakpao iki moncer lan akeh sing tuku, banjur ada-ada ma­neh nggawe bakpia tela. Kulite kaya bakpia umume, nanging isine ana campurane tela, mula yen bar dico­kot katon wernane wungu.

Nalika ngladeni wong-wong kang padha tetuku bakpao lan bakpia mi­nangka oleh-oleh, asring ana sing ke­pengin ngombe lan njajan. Lum­rah wae, amarga toko bakpao telo iki ing manggon ing dalan gedhe an­tarane Malang- Surabaya. Adate sing padha mandheg tuku ya lagi ing satengahe perjalanan.

Mula, kejaba nyedhiyani maneka inuman kemasan, disedhiyakake uga menu inuman saka tela. Jus tela wungu, kang rasane legi lan seger. Banjur dijangkepi dhaharan bakso, soto, lan maneka jajanan.

Suwening suwe, prodhuk kang diasil­ake Republik Telo tansaya werna-werna. Ana es krim, brownies, malah uga nugget, sandwich, lan pizza. Kabeh iku, ba­han bakune saka tela, minangka gantine trigu. Kreativitas ing babagan olah-olah iki kasil ngangkat tela kang maune katon minangka panganan ndesa, malih dadi cemilan kang modern lan narik ati. Na­nging, rasane isih panggah kaya asline, ora owah.

Laris dodolan maneka panganan tela kang umume werna wungu, panggagas Republik Telo ora leren tekan semono. Saiki isih tambah maneh dagangane, yai­ku maneka suvenir kanthi simbol Repu­blik Telo. Ana kaos lan pernak-pernik liya­ne. Lan wis mesthi, akeh-akehe sarwa werna wungu. (nn)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!