ITS Memitran karo Mokpo National University Korea
Diposting oleh : Administrator
Kategori: Laporan - Dibaca: 79 kali

Institut Teknologi Sepuluh Nopember (ITS) temen-temen olehe kepengin mujudake World Class University. Yaiku kanthi mikuwati olehe memitran karo maneka pawiyatan luhur saka manca. Salah sijine yaiku Mokpo National University, Korea Selatan. Memitran iki wujude joint degree utawa program gabungan kanggo lulusane. Memitran kasebut diwiwiti kanthi tapak asma  Memorandum of Understanding (MoU) lan Memorandum of Agreement (MoA) dhek Rebo (30/1), ing Rektorat ITS. Sing tapak asma Rektor ITS Prof Ir Joni Hermana MSc ES PhD lan President Mokpo National University (MNU) Prof Park Min Seo. Memitran program joint-degree iki kanggo jenjang S1 (sarjana)  Departemen Teknik Perkapalan, Fakultas Teknologi Kelautan (FTK) ITS.

Joni njlentrehake, memitran klawan MNU iki mujudake jangkah sing positip. Apamaneh, ITS saiki nedheng-nendhenge grengseng nindakake panaliten, utamane ing bidhang maritim. Dene Park Min Soe ngandhakake, Korea lan Indonesia sejatine nduweni bab sing saemper, yaiku segara sing amba. Mula, pancen wigati kanggo nggatekake lan mikuwati bab maritim. “Dadi pangajapku, ing tembe, maritim bisa aweh kontribusi sing gedhe kanggone ekonomi,” kandhane. Salah sijine utusan MNU, Lee Chang Dai ngandhakake, memitran klawan ITS iki antarane Departemen Teknik Perkapalan ITS karo Departemen Naval Architecture and Ocean Engineering MNU. Mengkone, udakara mahasiswa 80 bakal dikirim saben taune menyang MNU.   “Taun pisanan mahasiswa 30 cacahe, taun candhake 50,” kandhane Director Institute of International Exchange & Education MNU iku.Ing kalodhangan iku uga, Wakil Rektor IV ITS Prof Dr Ketut Buda Artana ST MSc ngandharake, program joint degree iki wujude kuliah telung taun ing ITS lan setaun ing MNU, Korea.  “Mahasiswa bakal antuk udakara 81 SKS ing ITS lan 63 SKS ing Mokpo National University,” jlentrehe guru besar Teknik Sistem Perkapalan iki. Kejaba iku, mahasiswa sing dikirim menyang Korea uga bakale antuk pengalaman magang ing kana.

(prili)

Berita Terkait

img

Samak Minggu Ini

img

img

Sumber Semangat

Wong kang paling hebat pisan kanthi idhe-idhene kang  paling brilian, bisa wae dikalahake de­ning wong kang bo­dho kanthi akale kang kerdhil. Mula tokna idhe-idhe bri­lianmu apa wae ka­hanane.

Klik

JEMBATAN NGISOR KALI

Meh kabeh, yen jenenge jembatan kuwi mlangkring ing sandhuwure banyu. Nanging ora mangkono karo jembatan kang ana ing Fort de Roovere, sacedhake Desa Halsteren, negara Landa iki. Ing kana ana jembatan kang ora mlangkring, nanging peres karo banyune. Jembatan iki pancen nyigar tlaga cilik kang banyune anteng. Dadi…. kapan maneh ya bisa nrabas banyu nanging ora teles?? (d/ist)***

Pethilan

TVRI nyoba ngrombak stigma

Saingane luwih maju banget

Sing manther anggone ngawasi praktek politik dhuwit

Emane dhuwite ora mambu…

Sing lapor SPT adoh saka target

Akeh sing ‘golput’ pranyata…