Sirah Ngelu
Diposting oleh : Administrator
Kategori: Anyar Katon - Dibaca: 51 kali

Para maos nate ngrasakake mustakane krasa abot, senut-senut, utawa malah nganti kliyengan? Sing nandhang sirah, ananging saranduning badan bakale melu ora kepenak kanggo obah. 

Yen mung sauntara, mbokmenawa isih bisa kausada kanthi ngaso lan ngombe wedang anget. Lha yen ngelune kedawa-dawa nganti pirang-pirang dina, kelakon sarwa cilaka. Kangelan makarya, cotho anggone ngopeni kulawarga.

Manut dr. Muliani Sukiman saka laman alodokter, salah sijine jinis ngelu utawa mumet yaiku tegang kronik. Sirah rasane kaya dipenet, ditaleni kenceng, dibarengi otot gulu krasa kenceng lan sokdhong uga kemeng ing perangan mbrui mripat. 

Banjur ana maneh migrain kronik. Ngelu/mumet krasa ing perangan sirah sasisih wae. Bisa kiwa utawa tengen, ngarep utawa mbun-mbunan. Adate uga dibarengi rasa kaganggu dening sawenehe bab. Kaya ta cumloroting cahya, swara mbengung utawa rame, ambon-ambon sing ndudul irung, lsp. Saperangan uga nganti njalari weteng mual, blokekan, malah uga mutah/ gumoh. 

Ana uga mumet/ ngelu sasisih sing dibarengi irung buntet utawa mripat abang kembeng luh. Arane hemicrania continua. 

Kanggo mangerteni jalarane ngelune sirah, panandhang kudu bisa nggatekake pawitane. Apa kurang ngombe, diforsir tenagane, kakehan sanggan pikiran, lsp. Yen kepengin luwih cetha, prayogane priksa menyang dhokter. 

Dene kanggo ngusadani sauntara bisa nindakake:

1. Ngaso sing cukup. Petungane, sedina sewengi badan kita perlu ngaso (turu) 7-8 jam. Mula ya prayogane ditrapake. Yen wengi turune kurang, awan dilegakake kanggo ngaso, ngliyep sauntara. 

2. Tenaga aja diforsir, endhanana pakaryan abot sauntara. 

3. Gatekake olehe memangan lan ngombe. Aja nganti kantru, wetenge kudu diiseni. Ngombe wedang bening uga kanthi gunggung sing cukup. 

4. Aja pepanas. 

5. Yen ngelu wis ora katahan, kena ngunjuk obat analgesik.

Dene yen ora kepengin langsung ngunjuk obat, bisa uga diusadani dhisik kanthi konsumsi panganan utawa inuman. Saperangan panganan lan inuman ngandhut zat sing bisa nyuda laraning sirah.

1. Teh jae

Inuman teh sing dicampur bebekan jae ngandhut anti inflamasi. Carane gampang, yaiku nyepakake sakros wae jae sing dibakar lan dibebek. Sabanjure dicampurake teh 1,5 gelas. Yen kepengin ana rasa beda, kena diimbuhi madu utawa peresan jeruk pecel.

2. Teh kayu manis

Kombinasi teh lan kayu manis nuwuhake sumber mangan, serat, zat besi, uga kalsium. Mula, kanthi ngunjuk teh kayu manis, ngelu lan mumet bisa suda.

3. Iwak

Manut panaliten sing ditindakake Zeev Harel, konsumsi iwak banyu (tawar lan laut) bisa nyuda prodhuksi hormon pemicu mumet lan ngelu.

4. Kenthang panggang

Manut ahli gizi New Jersey, Erin Palinski, mumet lan ngelu iku salah siji jalarane kurang elektrolit. Kanthi memangan kenthang bakar/panggang, bisa ngundhakake prodhuksi elektrolit ing badan.

5. Semangka

Salah sijine jalarane uwong nandhang ngelu lan mumte yaiku yen badan kurang cairan. Konsumsi sayur lan who-wohan sing ngandhut banyu/cairan akeh uga bisa ngusadani badan sing kurang cairan (dehidrasi). Salah sijine yaiku semangka, sing ngandhut banyu akeh lan uga energi (kalori). n

Berita Terkait

img

Samak Minggu Ini

img

img

Sumber Semangat

Ati kang atos gampang nemoni dalan buntu.

Klik

BANGUNAN MODEL DHUWIT

Dhuwit pancen mujudake alat tukar kang penting kanggo masyarakat dunia. Saking pentinge nganti-nganti dadi inspirasi pembangunan sawijining gedhung ing Kaunas, Lithuania. Desain bangunan tingkat iki katon nyolok kanthi desain dhuwit minangka wujud fasad njaba bangunan ksb. (d/ist)***

Pethilan

Banyu Tarum Barat saya reget

Kan wis wiwit ndhisik?!

Pulisi kangelan ngluru sing nindakake teror obong-obong montor ing Semarang

Mumpung Imlek, coba njaluk tulung ahli Feng Shui…

Ngawekani golput, kudu intens ngenalake surat suwara cacah lima

Sing akeh mengko dudu golput, na­nging golyeng, golongan puyeng