Enthung Jati
Diposting oleh : Administrator
Kategori: Anyar Katon - Dibaca: 47 kali

Saperangan gedhe uripe manungsa iku gumantung marang lingkungan lan alam sakitere. Semono uga uripe warga ing wewengkon Kecamatan Pucanglaban, Kabupaten Tulungagung uga gumantung marang wulu metune tetuwuhan kang tinandur ing sakitere alas jati.

Kecamatan Pucanglaban iku kaperang dumadi saka sangang desa, yaiku Desa Pucanglaban, Desa Demuk, Desa Sumberdadap, Desa Sumberbendo, Desa Manding, Desa Panggunguni, Desa Keligentong, Desa Panggungkalak, lan Desa Kalidawe. Sadurunge dadi desa rame isih wujud alas jati. Sawise dibabad dening penjajah Walanda banjur dadi perkebunan. Sawise merdika banjur malih dadi perkampungan pendhudhuk, ya jalaran status lemahe isih akeh sing gendom, alas jatine isih amba bawera.

Sabanjure yen ngrembug alas jati mesthi ngrembug enthung jati. Enthung jati (hyblaea puera) yaiku spesies kupu-kupu, nalika isih wujud uler, yen wayah bengi nyerang tetuwuhan jati. Enthung jati sumebar ing alas jati Jawa Timur lan Jawa Tengah. Ing Pucanglaban sing paling akeh ana ing alas jati Desa Panggungkalak lan Desa Kaligentong.

Sadurunge dadi enthung dadi uler dhisik nalika isih dadi uler akeh wong kang jijik lan gila, apamaneh uler iku salah sawijining ama pengganggu. Banjur, kepriye yen uler wis malih dadi enthung lan dikonsumsi? Sing mesthi durung nganti nyoba wis ngeri dhisik utawa rumangsa jijik. Ning sapa ngira yen ing dhaerah Pucanglaban lan sakitere, enthung jati iki didadekake kuliner ekstrim kang gizine akeh.

Pucanglaban minangka salah sawijining kota kecamatan kang dumunung ing dhaerah pesisir segara kidul, lumebu wewengkon Provinsi Jawa Timur lan wewatesan karo Trenggalek, Kediri, lan Blitar. Topografi dhaerah iki minangka pegunungan kapur lan akeh alas jatine.

Wektu mangsa ketiga akeh uler kang mangan godhong jati, uler sing dianggep minangka ama pengganggu, malah ing sisi liya bisa ninggalake ekonomi masyarakat. Uler jati kang kasil dikumpulake bisa didol kanthi rega Rp. 75 ewu per kilogram.

Sawise ngleboni mangsa peralihan tumuju mangsa rendheng, uler bakal malih dadi enthung. Enthung kang dawane udakara 2-4 sentimeter iku rupane coklat tuwek gilap, padha ceblok bareng karo godhong-godhong jati. Tumrap sing ora jijik, isih dadi uler wis dijupuki. Dene sing jijik, anggone njupuki ngenteni yen wis dadi enthung. Ning krana yen dadak ngenteni dadi enthung ora kumanan, jijik ora jijik isih dadi uler wis padha nekad njupuki.

Miturut katrangan Sriani (penyuluh pertanian Desa Kaligentong), muncule ewon uler ing kawasan alas jati minangka siklus taunan wektu mangsa rendheng. Uler kasebut bakal ilang dhewe maksimal sawise telung minggu. “Iki siklus taunan”, pratelane.

Saperangan wong mligine masyarakat Desa Kaligentong lan sakitere ngaku yen dheweke golek enthung jati iku kanggo lawuh mangan krana bisa ngirit blanjane. Mangsa enthung sing biasane mung rong wulan, yaiku ing wulan November-Desember pancen tansah diantu-antu dening saperangan wong penikmat kuliner unik iki. Ning krana ing wulan November taun iki (2018) udane durung deres, mangsa enthung lagi wiwit ing wulan Desember. Masyarakat Desa Kaligentong lan sakitere padha golek enthung kang ceblok ing lemah.

Banjur kepriye carane ngolah enthung dadi panganan kang mirasa? Sing mesthi padha penasaran lan ragu ngolah! Sakjane carane masak enthung gampang banget, cukup kanthi bumbu kang ana ing pawon. Sabanjure sapa wae bisa nyoba masak enthung jati iki dadi panganan mirasa kang sugih gizi.

Wiwitane, enthung diumbah nganti resik banjur digodhog nganti mateng. Minangka tandha yen wis mateng, rupane enthung sing maune ireng semu coklat wis malih abang semu coklat. Sawise iku enthung wis siap dimasak dadi kuliner tumis utawa disayur.

Ngenani rasa enthung kang paling enak yen dimasak tumis, rasa khas kang gurih lan renyah kang campur karo bumbu rajangan brambang, bawang, lombok lan uyah. Kanthi bumbu prasaja kasebut, enthung tumis siap dikonsumsi.

Saliyane tumis, enthung uga bisa dimasak dadi sayur lodeh, sayur asem, balado nganti peyek. Bahan sing digunakake padha kaya nalika arep gawe masakan kasebut, ning sing mbedakake bahan utamane enthung.

Nadyan cilik lan katon gila tumrap saperangan wong, enthung jati iki pranyata nduweni kandhutan protein kang apik tumrap awak. Masyarakat kang gandrung karo enthung uga ngyakini yen ngonsumsi enthung bisa ngilangake rasa nyeri, pegel linu, lan alergi ing kulit.

Tumrap sing durung nate nyoba, kuliner enthung iki bakal krasa rada aneh ing ilat, lan katon jijik. Ning sawise nyoba bisa ketagihan, lan sabanjure ora bisa nglalekake rasane.

(Budiono MG)

Berita Terkait

img

Samak Minggu Ini

img

img

Sumber Semangat

Kabecikan sing kita tindakake dina iki, mengkone bakal dilalekake wong. Ora usah perduli, tetep tindakna kabecikan apa wae kahanane!.

Klik

BUSANA KEMBANG MAWAR

Sawijining wanita saka China dilamar pacare kanthi busana spektakuler kang digawe saka 9.999 kembang mawar. Nukil saka Oddity Central, busana mawar kuwi hadiah tunangan saka Xiao Fan marang Yin Mi. Angka 9 dheret 4 kang makili gunggunge kembang mujudake pangarep-arep amrih tresnane kekarone abadi, selaras karo kapitayan China marang angka 9. (d/ist)***

Pethilan

Jatah kanggo mahasiswa miskin ditambah

Bageyan saka cita-cita nyerdhas­ake bangsa

Babatan liar ditindakake terang-terangan

Sing liar-liar kok bisa terang ngono ya?

Politisi enom padha rontok

Padha seneng ora sabaran sih!