Barjo Gempal (9)
Diposting oleh : Administrator
Kategori: Cerita Sambung - Dibaca: 35 kali

Arinis lan Wiratmadi ngenteni kanthi kebak pangarep-arep. Muga-muga Barjo Gempal bisa mbukak lawang mobil kuwi. Barjo Gempal isih utheg,  ku­pinge nyoba nyingkrihke kabeh swara, sing nyoba dirungu amung swara saka njero kunci sing nembe diothak-athik.

Klik! Klik! Klik!

Ana swara ‘klik’ lirih kaping telu. Barjo Gempal mesem. Lawang mobil nyoba dibukak. Kasil, lawang mobil bisa dibukak.

Arinis mesem, Wirat lega, rasa kuwatire ilang. Barjo Gempal ngusapi kringet tipis ing bathuke.

“Wah, maturnuwun. Njenengan ahli kunci ya, Mas?” pitakone Arinis kanthi polatan bingar.

“Ya kebeneran wae bisa. Untung tenan, ora sida kewirangan.”

“Kewirangan kepiye?”

“Hla yen tawa-tawa arep tetulung njur nyatane ora bisa apa ora kewirangan?”

“Hi hi hi, ya ora ta. Sing cetha, ora kabeh uwong duwe keprigelan kaya njenengan. Kuwi kalebu langka, amung nganggo kawat lan jepit rambut kok bisa mbukak kunci mobil sing jarene canggih iki.”

“Bener kandhane Arinis. Njenengan mesthi dudu wong sembarangan, kaprigelan kaya mangkono kuwi ora kabeh wong bisa. Njenengan ngasta ana ngendi?” pitakone Wirat.

“Kula niki pengangguran, Pak.”

“Nganggur ora apa-apa sing baku uripe kecukupan.”

Wirat lan Arinis sing maune arep bali malah rembugan maneh karo Barjo Gempal. Jalarane, saliyane merga ditulungi mbukak lawang mobil sing kekunci, anggone omong-omongan pancen gathuk kabeh rembuge. Rembugan bab maneka warna bisa cocog lan nyambung.

“Iki mengko rak ora sida bali. Eh Mas Barjo, njenengan seneng campursari? Mengko bengi ana campursari ing terminal Watu Kelir,” Arinis menehi kabar.

“Campursari seneng, kerawitan seneng, wayang ya seneng. Pokoke kabeh kesenian aku seneng. Nanging aku babarpisan ora bisa nglakoni. Dudu donyaku.”

“Mengko bengi mriksani menyang Watu Kelir. Penyanyine ayu-ayu hlo.”

“Iya. Yen ora kebablasan merem, mengko takdolan mrana.”

Rembugan dipungkasi. Sawise ijol-ijolan nomer hape karo Barjo Gempal, Arinis lan Wirat banjur pamitan. Mobil werna ireng tleser-tleser mudhun saka punthuk makam Randhualas.

Barjo Gempal ora terus mulih, nanging bablas menyang Benowo, niliki sapine Mbah Ngatmo. Lakune saka Randhualas arah ngidul, tekan dalan gedhe ngarep puskesmas ngulon, protelon ngarep kecamatan ngidul.

Ing kulon kampung Tambakan, Barjo Gempal mandheg sedhela, nyetandarke pit motor banjur…………………

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik