Ngenggar-enggar Ati ing Rochers de Naye
Diposting oleh : Administrator
Kategori: Anyar Katon - Dibaca: 16 kali

Sing arep dakcritakake iki pengalamanku mlaku-mlaku menyang pucuking Rochers de Naye, sing mapan ing negara bagian Vaus, Swiss. Kejaba sesawangane sing endah, hawane uga seger, resik, lan akeh tetuwuhan kekembangan sing daktemoni.

Pucuking Rochers de Naye 2041 meter lan mujudake salah sijine papan wisata favorit para pecinta alam. Yen manut makna tembunge, Rochers de Naye tegese watu saka Naye, utawa gunung watu Naye. Sadawane taun, ing mangsa apa bae, Rochers de Naye ora tau sepi saka pelancong. Jalaran, werna putih salju nalika mangsa adhem, pada endahe karo sesawangan ijo royo-royo nalika mangsa semi.

Nalika mangsa panas, umume para pelancong nindakake olah raga pendhakian, utawa paralayang. Dene ing mangsa adhem, padha olah raga ski utawa snowboarding.

Amrih tekan pucuking Rochers de Naye, pelancong wiwit mlaku saka kutha Montreux udakara 3 jam suwene. Yen rumangsa ora kuwat, saka Montreux uga bisa numpak sepur Golden Pass kanthi mbayar karcis 70 ewu Swiss Franc utawa Rp 1.076.000. Yen numpak sepur, udakara mung 55 menit wae. Sing nyenengake, sadawane dalan, katon sesawangan desa, alas, uga perenging gunung.

Merga eman dhuwite, aku pilih mlaku. Sadurunge aku wis golek warta, mula ya banjur wis siyap nganggo sepatu olah raga sing cocog kanggo munggah gunung. Kejaba saka iku, klambi uga wis milih sing kepenak lan aman.

Sing nyenengake, dalan kanggo sing mlaku munggah kapetung apik. Mula olehku mlaku munggah ora kangelan, wis ana jalure, sing pranyata pancen dikemonah kanthi becik dening pamarentah Swiss. Umume, sadawane dalan wujud lemah padhet lan watu-watu gunung. Aku ngliwati desa-desa, alas kebak pinus, uga tlaga Leman utawa karan tlaga Jenewa. Yaiku salah sijine tlaga sing paling amba ing Eropa, jembare 580 km lan kaperang loro, dadi duweke Swiss lan Prancis.

Ing sadawaning dalan ngliwati alas, pelancong bisa ngulatake sapari polahe manuk elang, bajing, uga maneka kewan liyane. Semono uga tanduran, ana raspberry uga stroberi sing tuwuh ing gumuk-gumuk. Wohe entuk dijupuki lan dimaem. Pancen aku nalika mrana ngepasi mangsa panas, saengga tetuwuhan iku pas lagi padha awoh.

Sabanjure aku ngliwati tlatah Sonchaux, sing bisa kanggo leren sauntara. Ing kene, pelancong bisa ngrasakake sensasi paralayang, nikmati kaendahane alam saka awing-awang. Bakale katon pegunungan Alpen, tlaga Jenewa, uga kraton Chillon saka ngakasa. Nanging yen kepengin lungguh-lungguh wae, uga sumadya bangku-bangku kanggo ngaso, sing mapan madhep tlaga Jenewa. Wis jan pas tenan yen kanggo piknik.

Saka Sonchaux mung kari setengah laku maneh tekane pucuk Rochers de Naye. Yaiku udakara 1,5 jam maneh wis tekan ngenggon. Nanging sadurunge tekan pucuk, para plancong bisa ndeleng cairn sing duwure 2.5 meter. Cairn utawa gunungan watu sing digawe seka watu-watu cilik iki mapan ing perenging tebing madhep tlaga Jenewa. Saben plancong sing munggah kene umume banjur ninggalake watu cilik ing sandhuwure gunungan watu sing wis ana. Gunungan iki gunane kanggo aweh tandha marang para pendhaki, menawa dalan sing diliwati iku aman.

Sok-sok, gunungan iki uga dimupangatake dening para pendhaki kanggo ninggalake pesen, utawa panganan, sing ditujokake kanggo kancane sing isih kari ing ngisor. Sawise ngliwati cairn, mung perlu wektu 10 menitan wae wis tekan pucuking Rochers de Naye.

Ing pucuking Rochers de Naye iki sumadya papan penginepan, restoran, uga stasiun sepur. Ya ing kene, sinambi ngaso, bisa ilang kabeh rasa kesel lan pegele awak lan sikil, jalaran nyawang kaendahane alam. Katon pucuk-pucuking pegunungan Alpen, birune tlaga Jenewa, sing bisa dinikmati sinambi ngemil panganan khas Swiss aran cheese fondue. Yaiku keju lumer sing adate dirahabi karo kenthang godhog, roti, daging panggang, uga acar. Yen kepengin nginep, bisa nyewa yurts utawa tendha sing ing njerone ana kasure.

Papan iki uga cocog kanggo wisata kulawarga, jalaran ana wisata taman edukasi sing dijenengi La Rambertia Alpine Garden. Jeneng taman La Rambertia Alpine Garden iki dijupuk saka asmane profesor lan penulis asal Prancis, Eugene Rambert sing uga pecinta alam. Mlebu taman iki gratis, nanging mung buka tengahe sasi Juni tekan akhir September. Jalaran, sawise iku mlebu mangsa adhem lan bakale ketutup salju.

Selaras karo jenenge, La Rambertia Alpine Garden, ing njero taman iki akeh maneka tetanduran sing mung bisa ditemoni ing areal pegunungan Alpen. Jalaran pancen mbutuhake pangrumat mligi. Ing taman sing wis menang 3 bintang penghargaan Michelin Green Guide iki, para pelancong bisa nemoni kembang eidelweiss sing uga dadi kembang nasional Swiss.

(Rena DKL)

 

Berita Terkait

img

Samak Minggu Ini

img

img

Sumber Semangat

Saben masalah kang muncul bisa gawe ajur utawa bisa ndadekake kuwat ...

Klik

DREAM SEREM

Ora sateruse bangunan utawa gedhong kang digawe menungsa bakal terus dipigu-nakake lan diramut. Akeh bangunan kang wusanane ditogake mangkrag ngono wae. Saengga jroning wektu tinamtu bali dijaluk dening alam. Kaya dream molen iki upamane. Sawise ora dipigunakake lan dianggurake ngono wae mula malih dadi ‘dream serem’ merga akeh dirambati tanduran ing kana kene. (d/ist)***

Pethilan

Pemerintah nyiapake dana kelurahan

Mesisan kampanye!

Mogok guru ing Mimika, Papua, tanpa solusi

Padha lali sajake, ora dadi pejabat yen tanpa guru

Jokowi: Bangun optimisme

Sing pesimis nyemplung segara ae