Lidhah Buaya Bisa Ngedhunake Glukosa
Diposting oleh : Administrator
Kategori: Kasarasan - Dibaca: 71 kali

Cleopatra ratu Mesir kuna kang kaping pitu iku wis kondhang ayune. Mbokmanawa bisa dipadhakake karo kasulistiyane Dewi Kamaratih saka tanah Jawa. Yen Dewi Ka­maratih kasil kagarwa Raden Kama­jaya, satriya bagus kang tembe mburine kekarone digadhang-gadhang para ibu kang hanggarbini muga-muga bayine kang dikandhut lair kanthi slamet, lan ayu utawa bagus kaya kang dikarepake.

Suwalike, ratu Cleopatra kang kasil gawe poyang-payinge Kaisar Romawi, Julius Caesar ora kasil sedyane. Malah, critane,sang ratu kang ambisius kasebut pralaya, mati dicokot ula.

Sawise ratu legendaris iku tilar do­nya, nembe ka­wiyak wadine yen kasu­listiyane sang ratu ora bisa uwal saka carane ngudi sarira kang prasaja.

Esuk lan sore sawise si­ram, sang ratu ora tau lali tansah migu­nakake blendok (jel) lidhah buaya kang­go ‘pelembab’ pasuryane supaya tetep ayu lan merak ati lan bisa dadi “daya tarik” (kawi­gatene) para priya sain­denging bawana.

 

Akeh kasiyate

Lidhah buaya (Aloe vera) asale saka Afrika. Wujud godhonge lancip kaya pe­dhang. Pinggir godhonge kiwa tengen ana erine cilik-cilik. Ing negara Inggris tanduran iki disebut Crocodiles tongues, ing Malaysia disebut Jodham, ing Spanyol disebut Silvila lan ing negara Tiongkok karan sebutan Lu Hui.

Ing karang padesan tanduran kang nyrekakah iki wis suwe dikenal dadi tan­duran obat kulawarga. Tinemu ing ngen­di wae merga gampang open-openane. Ditandur ing pot uga bisa, ing pekara­ngan utawa tegalan uga ora nulak.

Miturut kapustakan, godhong lidhah buaya nduweni sipat sekulen (ngandhut banyu) lan uga ngandhut tlutuh utawa nyinyit, saengga tanduran iki bisa urip nadyan ketiga ngerak kaya wektu saiki. Dadi ora karan aneh yen ing negara Mesir tanduran lidhah buaya antuk se­butan Plant Immortality utawa tanduran abadi.

Godhong lidhah buaya nduweni cairan kang awarna kuning nganti 30% kang aran aloin kristal. Ing industri kosmetik moncer aloin kang dumadi saka barbaloin, isobarbaloin, amarphous aloin, lan resin nujudake bahan baku sampo lan lulur. Dadi ora karan aneh yen ing padesan tlutuh lidhah buaya kerep kanggo kramas para wanita kanthi ancas tujuwan kareben rambute ketel lan ngrangsang thukule rambut anyar.

 

Ngedhunake glukosa

Ana sawenehing panaliten kang ngan­dhakake, gel (jel) kang tinemu ing lidhah buaya bisa ngedhunake glukosa darah. Dadi cocog banget kanggo para sutresna PS kang lagi nandhang diabetes melitus (kencing manis). Carane, mundhut godhong lidhah buaya sapapah sing rada gedhe lan dawa.

Sawise dibu­wang erine, kulite sing ijo dioncek. Banjur dikumbah lan daging godhong lidhah buaya nuli digodhog nganggo banyu 3 gelas, nganti kari 2 gelas. Bisa diunjuk esuk lan sore. Ngun­juke bisa ditambahi madu sacukupe kang­go ngilangake rasa pait.

Kanggo kang lagi nandhang lara paru-paru bisa kanthi nyepakake daging lidhah buaya udakara 25-30 gram, ba­nyu mawar 100cc lan banyu 2 gelas. Ra­cikan iki nuli digodhog nganti umob, yen wis adhem bisa diunjuk esuk lan sore.

Nadyan lidhah buaya akeh kasiyate, nanging ora kabeh uwong oleh ngunjuk racikan lidhah buaya. Utamane kagem ibu-ibu kang nembe nggarbini (ngan­dhut) utawa kang nembe nggarapsari (bulanan).

Uga kanggo sing duwe lara lambung lan limpa lemah (tandhane diare lan napsu mangane kurang). Se­bab, aloin kang kinandhut ing lidhah bu­aya nduweni rasa pait lan bisa nguras padharan. Kanggo kang nandhang lara asma utawa sesak napas bisa diusadani kanthi ajeg ngunjuk gel lidhah buaya. Carane, kanthi nyepakake gel lidhah buaya kehe 30-35 gram.

Gel kasebut nuli dipanasake nganggo banyu 2 gelas. Diudhak nganti warata lan ditambah gula pasir 2 sendhok. Yen wis adhem bisa diunjuk kaping pindho esuk lan sore. Bisa diambali nganti 5-6 dina kanthi ukuran kang padha.

Saiki wis akeh produk aloin vera kang awujud cream (kosmetik) utawa makan lan inuman. Ana manisan, sele, jus uta­wa ager-ager, lsp. Malah kabare ing Tiongkok utawa Jepang lidhah buaya kanggo campuran ngunjuk teh. Kepriye ing Nuswantara kita? (Syt)

 

Berita Terkait

img

Samak Minggu Ini

img

img

Sumber Semangat

Yen kowe mapan ing wayah sore, aja ngenteni wektu esuk lan yen kowe ana ing wayah esuk, aja ngenteni wektu sore.

Klik

KAMPUNG INDIA

Kampung Madras mujudake sawijining kampung ing kutha Medan kanthi surasa India kang kenthel banget. Mayoritas pendhudhuk ing kene pancen keturunan wong India Tamil kang agamane Hindu. Ing kampung iki, kita bakal ngawruhi sakehing wong praen India, pakaian khas India, panganan India, perayaan agama Hindu, nganti jeneng dalan kang sarwa India kayadene Jl. Mahayana, Jl. Kalingga lsp. Saengga kaya-kaya kita lagi ora ing Indonesia. Mula ora nggumunake yen kampung iki banjur dijuluki Little India. (d/ist)

Pethilan

Parpol-parpol rebutan mlebu kabinet Jokowi

Lomba nodhong jabatan diwiwiti….

Pascapilpres, koalisi oposisi isih durung jelas

Sing jelas isih padha ‘galau’

Joko Widodo-Ma’ruf Amin disengkakake minangka Presiden-Wapres RI 2019-2024

Sugeng makarya…