Prabu Dewatacengkar
Diposting oleh : Administrator
Kategori: Banyumasan - Dibaca: 33 kali

Awan kuwe, Kaki Bawor karo Bau Nasiran agi dopokan nang warunge Kaki Narso sing nang pinggir gili gedhe. Let sedhela disusul mas Gatot sing bukak warung internet. Maune gole dopokan ya ora genah sing dirembug. Lha koh suwe-suwe tekan babagan pileg /pilpres 2019  ngesuk, sing saiki lagi umyeg dadi crita nang endi-endi. Kawitane sing mbukani rembug mas Gathot, “Ramane, saiki pancen jamane kudu prihatin temenan. Ora pihatin kepriwe, inyong maca nang Panjebar Semangat, jarene KPK, jago pileg akeh sing mantan kupruptor, kepriwe kuwe?”

“Seh, ya pancen kudu prihatin temenan kuwe, aja-aja jagone rika mantan kuruptor yah...?” cluluke Bau Nasiran karo nyomot mendhoan ora keri karo lomboke rawit, langsung dipangan, “Ari inyong si wong netral, dadi ora njagoni sapa-sapa, dadi ora ga­dhangan melu isin, hi..hi,” terus gaber-gaber kepedhesen.

“Seh, inyonga kae ya ora gadhangan isin,” saurane mas Gathot karo nyruput wedang kopine. “Wong sing tek jagoni kuwe toli jago anyar, dudu wong sing lawas, mulane rika gole milih ya sing setiti, aja waton nyoblos.”

“Iya bener. Wong sing anyar rung tau njabat, arep korupsi kepriwe?” saurane Kaki Bawor, karo nyomot mendhoam, tiru – tiru Bau Nasiran, ora keri nyeplus lombok rawite. “Inyong njuran kelingan dongeng jaman kuna. Tek pikir-pikir kahanane saiki koh kaya memper sing nang dongeng kuwe.”

“Dongeng apa kuwe, kang Bawor?” Kaki Narso melu takon, karo tangane uwet nglinting udude.

“Lhah, rika mesthine ya kelingan, jamane egin cilik biyen mbok tau didongengi Prabu Dewatacengkar sekang Keraton Medhang­kamulan,” wangsulane Kaki Bawor ngelingaken.

“O, iya. Ratu sing mangan daginge menungsa, nganti kolu mangan rakyate. Lha, terus apa sambunge karo jaman saiki?” wangsulane Kaki Narso karo takon nggenahaken.

“Ya, jajal baen dipikir, jaman saiki mbokan ana wakil rakyat Kepala Daerah, mbuh kuwe Gubernur utawane Bupati sing kolu mangan rakyate, ya tegese ora mangan daging menungsane, ningen mangan apa sing dadi hake rakyate,” Ujare kaki Bawor nggenahaken.

“Uh, kuwe ya ora mung ana, Ramane, ningen anu akeh tung­gale,” cluluke mas Gathot, karo mlorok keselek wedange, bareng wis aso njuran tembe nerusaken gole ngomong, “Wong ujare KPK, Kepala Daerah sing dadi bandan gunggunge tekan seprene ana 361, Gubernure ana 18, Bupati karo Walikota ana 343, nek sing wakil rakyat ora etungan. Apa ora mrihatinaken, Ramane?”

“Iya, pancen mrihatinaken,” ujare Kaki Narsa nyelani, “Ningen aja kuwatir, nang dongenge kan ana Raden Ajisaka sing teyeng nulungi rakyat Medhangkamulan.”

“Ah, kuwe toli nang dongeng, Kaki Narso,” ujare Bau Nasiran maido, “Lha nang jaman saiki apa ana sing dadi Ajisaka?”

“Eh, ana Baune. Nang jaman siki gantine Aji saka, genah bebadan Independen sing jenenge KPK. Mung bedane Aji saka srana ngulur udhenge bisa nyemplungaken Dewatacengkar maring segara kidul, bareng KPK srana ngulur lan ngulir budi pikirane bisa ntemplungaken Dewatacengkar jaman siki ya kuwe koruptor maring penjara, memper mbok? Kaya kuwe genahe.” Klilan.

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik