Mapag Sura
Diposting oleh : Administrator
Kategori: Banyumasan - Dibaca: 30 kali

Bar ngisa, Kaki Bawor bareng Yamun sibujang tuwa karo Bau Nasiran padha jagongan, dopokan nyambi medangan nang warunge Kaki Narso sing nang pinggir gili gedhe. Ujug-ujug disusul tekane Darman Betor karo nunggang betore sing suwarane ether-ether mbrebegi kuping. Mlebu warung karo nyengir, njuran aba, “Jae susu gelas sing gedhe, Kaki Narso, mumpung ana sing nraktir he..he..,” njuran mapan njagong njejeri Yamun.

“Sapa sing garep nraktir rika?” takone Yamun kambi kepeksa mingsed gole njagong, anu disol Darman sing njejeri njagong.

“Iya, sapa bae sing ana. Nek perlu padha urunan nraktir inyong he..he..,” saurane Darman.

“Seh, gole mbajug ora mari-mari koh. Jane wingi-wingi ora keton, anu lunga maring ngendi, Man?” takone Bau Nasiran, kambi nyomot gedhang goreng sing ana nang piring, terus dipangan.

“Bali ndesa, Kang Bau, anu melu slametan suran nang Padepokan Payung Agung desa Banjarsari Kecamatan Nusawungu, ndhing wingi dina Rebo kliwon nganti Kemis Legi, ujube wilujengan mapag warsa enggal 1952 Be,” saurane Darman Betor ngge­nahaken.

“Eh, mbokan sing jenenge mapag tahun anyar, toli sadurunge tanggal 1 Sura?” Bau Nasiran gole takon kayong penasaran.

“Eh, lha embuh kuwe. Ninge ujare wong kana tanggal 1 Sura kuwe tibane nang dina Kemis legi, mulane gole nggelar slametan nang dina Rebo Kliwon, bar magrib, njuran mbengine padha melekan karo nonton Sintren. Kemis legi esuke ana larungan sesaji nang kisik Segara Kidul. Awane ana pentas Lenggeran Calung Banjarwaru,” ujare Darman Betor, karo nyruput wedang jae susune.

“Oh, nek kaya kuwe tanggal 1 Sura kuwe beda karo tanggal 1 Muharam apa yah? kepriwe kuwe, kang Bawor?” Kaki Narso nyelani takon kambi nglinting udude.

“Iya, beda sethithik. Tahun Jawa kuwe, digawe nang Kanjeng Sultan Agung Hanyokrokusuma Ratu Mataram, sing nggabungaken Tahun Saka karo Tahun Hijriyah, dadi tahun Jawa. Wektu kuwe tahun Saka 1555, Tahun Hijriyah 1043, petunge ngetutaken lakune rembulan sing ngubengi Bumi, angka tahun Jawa njuran nerusaken angka tahun Saka yakuwe 1555 tekan seprene. Mulane saiki tahun Jawa 1952 Be, lha tahun Hijriyah saiki 1440 H,” kandhane Kaki Bawor, njuran nyruput wedang kopine gisit, nembe nerusaken gole ngomong. “Arane taun Jawa jrone sewindu ana wolu, yakuwe Alip, Ehe, Jimawal, Je, Dal, Be, Wawu, Jimakir, lha pendhak 120 tahun ya kuwe sing diarani sak kurup, maju sedina, mulane dadi ora padha karo Tahun Hijriyah. Apa maning wong Jawa duwe petung dhewek-dhewek, ana sing nganggo petung Asapon, taun Alip tanggal siji tibane Slasa Pon, Aboge taun Alip tibane dina Rebo Wage, njuran Anening, taun Alip tibane Senen Pahing. Lha nek nganggo petung Asapon, nang taun saiki, tanggal siji Sura tibane nang dina Rebo Kliwon. Manut petung Aboge, tanggal siji Sura tiba dina Kemis legi. Ya, mulane bisa baen Rebo Kliwon agi mapag Sura. Wong nganggo petung Aboge. Klilan.

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik