Bayem Jinis Sayuran kang Murakabi Mring Kasarasan
Diposting oleh : Administrator
Kategori: Kasarasan - Dibaca: 38 kali

Kanggo ibu-ibu ing ngendi panggonan, jinis sayuran bayem (Amaranthus sp) pancen gampang pangolahe. Bisa kanggo jangan (sayur), pecel, urap (gudhangan) lsp. Malah kari-kari iki godhong bayem kang kedhung-ledhung padha digawe peyek, utawa dimodifikasi dadi bakmi kang ijo warnane.

Sayur bayem ora mbutuhake wektu kang suwe yen amung arep digawe sayur bening. Cukup nyiapake rajangan brambang, uyah lan gula sethithik sarta kunci, ora nganti 10 menit wis siap ing meja makan. Dhahar sega sayur bayem dikancani sambel trasi jan nyamleng tenan. Nikmat, murah lan bergizi.

Ing padesan kang dikenal ana telung jinis tanduran bayem yaiku bayem sekul utawa bayem cabut, bayem abang (Celosia argen­tea) lan bayem eri (Amaranthus spinosus). Bayem pancen mujudake jinis sayuran kang murah regane lan gampang golek-golekane. Wiwit pasar krempyeng nganti supermarket mesthi cumawis. Bayem miturut kapustakan, nduweni Kandhutan protein, lemak, karbohidrat, kalium, zat besi, amarantin, purin lan uga vit.A, B lan C. Dadi ge­dhe cilike kanthi ajeg ngonsumsi bayem wis bisa nyukup nutri­si kang dibutuhake awak.

 

Akeh Manfaate

Bayem bisa nguwatake fungsi ati,bisa kanggo masker (perawatan wajah) lan uga bisa kanggo kompres kanggone kang lagi nandhang lara eksim (lelara kulit) lan perawatan (nguwatake) oyot rambut.

Masker wajah bisa digawe kanthi prasaja. Siapake bayem sayur 1 gegem lan banyu 250 ml (1 gelas) nuli didheplok utawa di­blender nganti kaya dadi bubur. Yen uwis nuli disaring. Sing diagem ampase lan digosokake ing pasuryan nganti warata, sakdurunge arep mapan sare. Watara 10-15 menit nuli dibilas ngagem banyu biasa.

Kagem nguwatake oyot rambut, saringan banyu bayem kasebut aja dibuwang. Wadhahake ing botol utawa gelas. Esuke bisa kanggo kramas kaya yen kramas ngagem sampo.

Kanggo ngatasi eksim (lelara kulit) mundhuta bayem sakgegem lan banyu 1 gelas. Bayem digodhog nganti umob, yen uwis adhem bisa kanggo kompres sing lara (tatu).

 

Bayem Abang

Bisa ngatasi lelara anemia (kurang darah), disentri lan uga ngusadani rambut kang gampang (brodhol). Kanggo kang nandhang kekurangan getih, carane mundhuta 2-3 gegem godhong bayem abang, banyu jeruk pecel, 1 sedhok makan, madu 1 sendhok makan, endhog pitik kampung 1. Sakwise bayem dikumbah resik nuli didheplok nganti alus, banyu jeruk pecel madu lan kuninge endhog pitik nuli dicampurake lan diadhuk nganti warata. Nuli disaring lan diunjuk sakdurunge dhahar, sedina sepisan cukup 2-3 dian sepisan.

Kanggo kang gerah disentri kanthi nyiapake 10-15 wit lan oyot bayem abang lan uyah sakcukupe. Sakwise wit lan oyode di­dheplok nganti alus nuli diperes lan disaring. Tambahake uyah lan diunjuk sekaligus sedina sepisan. Bisa diambali 3-4 dina.

Rambut yen dijongkati brodhol (gampang rontog) carane Kanthi nyiapake 100 gram godhong bayem abang kang wis dikumbah resik nuli didheplok nganti alus. Yen wis nuli disaring lan ditambahi uyah sakcukupe sedina sepisan. Bisa diambali nganti seminggu ping telu.

Ing bayem abang tinemu kandhutan protein, lemak, karbohidrat, kalium, zat besi, amarantin, betakaroten, vit A, C lan E, asa folat lan glutation.

 

Bayem Eri

Ing bayem abang tinemu kandhutan amarantin, rutin, kalium nitrat, piridoksin, fosfat, zat besi, vit.A, C lan K. Bayem eri nduweni kha­siat kanggo ngusadani lelara kecing nanah (gonorhoe), lelara Keputihan, bronkhitis lan TBC.

Kanggo kang lara kencing nanah, carane Kanthi golek bong­gol lan oyot bayem eri kang wis gedhe watara l-2 iji. Adas pulo waras sakcukupe lan banyu 4 gelas. Sakwise dikumbah resik nuli digodhog nganti umob lan adas pulowaras dicemplungake. Nuli di­dhemake lan disaring lan diwadhahi botol kaca. Bisa diunjuk @ ½ gelas lan luwih becik yen diunjuk nganggo madu sak sendhok, esuk lan sore. Bisa diambali nganti seminggu.

Kagem para remaja putri kang nandhag keputihan, bisa nyiapake 50-60 gram oyot bayem eri kang isih seger. Gula batu lan banyu 3 gelas. Sawise oyot bayem dikumbah resik nuli digo­dhog nganggo banyu 3 gelas. Diumobake nganti kari 1 gelas. Diun­juk yen wis adhem lan ditambah gula batu. Dina candhake bisa gawe racikan kasebut nganti mari.

Kanggo Kang lara bronkhitis utawa TBC, carane mundhuta bayem eri sakwit, ana kembange, godhonge lan oyote. Sakwise dikumbah resik nuli dirajang cilik-cilik lan digodhog nganggo banyu 3 gelas lan yen umob nuli ditambahi gula aren watara 60-80 gram, nganti ajur. Sakwise adhem bisa disaring l1an diwadhahi botol kaca. Diunjuk @ ½ gelas sedina sepisan. Bisa diambali nganti watuke mendha. Nuwun. (FX. Suyatno)

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik