Bis Double-decker Muter ing Alun-Alun Contong
Diposting oleh : Administrator
Kategori: Yak Opo Kabare - Dibaca: 32 kali

Dinas Perhubungan (Dishub) Surabaya nganak­ake uji coba pungkasan rute bis anyar, Selasa (4/9). Wiwit dina Rebo (5/9), rute bis kulon lan wetan wis resmi operasi saka Unesa Lidah engga ITS. Mangkono uga bis double-decker utawa bis tingkat kang bakal ngladeni rute kidul-lor. Saka Terminal Purabaya nganti tekan Alun-Alun Contong. Wingi awan (4/9) rute loro iku bali diuji coba kanggo kang pungkasan. Suroboyo Bus loro rute kidul-lor bakal diijolake kanggo ngladeni rute kulon-wetan. Lelorone bakal diganti bis tingkat loro sing sakawit direncanakake kanggo rute Unesa-ITS.

Kepala Dinas Perhubu­ngan Surabaya Irvan Wahyu Drajat nerangake, ijol-ijolan kasebut nenimbang pepa­lange bis tingkat nalika ngliwati jalur kulon-wetan. Ing uji coba sadurunge, bis tingkat ngalami alangan ing sakehing titik merga anane utilitas lan wit-witan. “Nalika minggir menyang halte, kepalang pang-pang wit-witan. Eman yen kita kudu ngorbanake sakehing tanduran kanggo kebutuhan halte,” jlentrehe Irvan mentas iki.

Anane viadhug ing jalur kidul-lor, trepe ing Jalan Pahlawan, uga klakon ngrendheti rutene bis ting­kat kasebut. Mula saka iku, bis double-decker mung ngladeni rute Purabaya-Alun-Alun Contong.

Sawatara iku, dishub wis nyepakake titik ndheg-ndhegan kehe 52 kanggo rute kulon-wetan.

Irvan ngandhakake, adhedhasar asil uji coba pungkasan, ora ana alangan saengga bis wis wiwit bisa digunakake masyarakat. “Bis double-decker apadene bis abang (Suroboyo Bus) rute kulon-wetan operasi wiwit Rebo (5/9),” ujare.

Bis double-decker du­rung dipepaki fitur early warning alias penghubung antara sistem bis lan apli­kasi GoBis. Aplikasi kasebut bisa aweh informasi ngenani panggonane bis. Dadi, penumpang bisa ngira-ira wektu tekane bis. “Yen bis double- decker pancen durung sampurna, fitur-fiture durung pepak kaya Suroboyo Bus sing abang,” tandhese.

Dishub duwe rencana, ora suwe maneh arep ningkatake integrasi sistem bis karo aplikasi. Irvan nambahake yen pehake bakal ngusulake program peningkatan integrasi kasebut ing perubahan anggaran keuangan (PAK) taun iki.

“Dakusulake kanggo nambah fitur. Muga-muga pungkasan taun iki wis bisa rampung,” kandhane.

Kejaba iku, Dishub ngajokake PAK kanggo nambah sepuluh unit bis rute kulon-wetan. Seka­behane mujudake bis low deck kaya Suroboyo Bus. Yen ora ana alangan, sepuluh bis low-deck iku bakal siap pungkasan Desember lan diopera­sekake Januari 2019.

“Dak­ajap Desember wis siap kanggo bis tambahan lan taun ngarep wis bisa operasi,” tandhese Irvan.

(Bsh)

Berita Terkait

img

Samak Minggu Ini

img

img

Sumber Semangat

Saben masalah kang muncul bisa gawe ajur utawa bisa ndadekake kuwat ...

Klik

DREAM SEREM

Ora sateruse bangunan utawa gedhong kang digawe menungsa bakal terus dipigu-nakake lan diramut. Akeh bangunan kang wusanane ditogake mangkrag ngono wae. Saengga jroning wektu tinamtu bali dijaluk dening alam. Kaya dream molen iki upamane. Sawise ora dipigunakake lan dianggurake ngono wae mula malih dadi ‘dream serem’ merga akeh dirambati tanduran ing kana kene. (d/ist)***

Pethilan

Pemerintah nyiapake dana kelurahan

Mesisan kampanye!

Mogok guru ing Mimika, Papua, tanpa solusi

Padha lali sajake, ora dadi pejabat yen tanpa guru

Jokowi: Bangun optimisme

Sing pesimis nyemplung segara ae