Jeruk Pecel Kena Kanggo Tamba Kesel
Diposting oleh : Administrator
Kategori: Kasarasan - Dibaca: 52 kali

Jeruk nipis utawa jeruk pecel (Citrus Aurantifolia, Swingle) mujudake Toga tanduran obat kaluarga) karana pigunane kang murakabi mring kasarasan. Wis atusan taun tanduran kasebut (luwih-luwih wohe) digunakake mbah-mbah buyut kanggo ngusadani sakehing lelara. Utamane lelara watuk (serak,sesak nafas, influenza), amandel, disentri nganti kabare bisa nambani awak kang kesel.

Ing negara Inggris woh kang warnane ijo Semu kuning disebut lime, ing nagara Arab disebut limah dene ing daerah Sunda populer kanthi sebutan limau asam.

Miturut kapustakan, ing 100 gram jeruk pecel nduweni kandhutan vit. C 27 mg, Vit. B1 0,04mg, zat besi 0,6mg, lemak 0,1gram, kalori 37 gram lan kandhutan banyu 86 gram. Uga tinemu kandhutan kimia Kayata limonen, linalin asetat, geranil asetat, fellandren lan asam sitrat.

Umume yeng panjenengan lagi gerah watuk utawa gorokan  krasa serak, cepet- cepet ngiris jeruk pecel sakjuwing, nuli dipe­res ing sendhok makan lan dicuri kecap. Nuli diunjuk saglekan Ing pangajab Sakwise ngunjuk “ramuan” kasebut watuke kendho lan serake ilang.

 

Tamba Watuk

Kang bener kanggo ngusadani lelara watuk, mundhuta jeruk pecel siji nuli diiris lan diperes ing cangkir (gelas) tambah ana 1-2 sendhok makan kecap (gumantung okehe peresan banyu jeruk) lan uyah dhapur watara ½ sendhok makan. Diunjuk sepisan (bisa esuk utawa sore). Bisa diambali 2-3 dina.

Kagem putra kang nandhang lara amandhel bisa kanthi nyiapake jeruk pecel siji, kunir 1 ½ driji lan 2 sendhok makan madu. sakwise jeruk diperes lan diwadhahi gelas, kunir diparut lan diperes dijupuk banyune. Mundhuta banyu anget ½ gelas lan campurana madu kasebut, nuli diudhak nganti warata. Peresan jeruk lan kunir nuli kacampulake lan disaring. Racikan kasebut bisa diparingake keng putra kanggo esuk lan sore. Dina candhake bisa gawe ramuan kanthi ukuran kang padha.

Kanggo kang nandhang disentri Kanthi nyiapake 25-30 gram oyot jeruk pecel. Sakwise dikumbah resik nuli digodhog nganggo banyu kehe 12 gelas. Sakwise umob nuli ditambahi uyah 1 sendhok teh lan gula aren sak jempol. Yen wis adhem nuli disaring lan bisa diunjuk esuk lan sore @ 1 gelas. Sesuke bisa gawe ramuan kanthi ukuran kang padha.

Jeruk pecel uga bisa nyarasake kang lagi gerah influenza. Carane siapake jeruk pecel siji,lenga kayu putih ½ sendhok makan lan enjet (yen kanggo tamba kerep disebut “telek manuk”) sak ndulit Jeruk pecel kasebut (isih bunder lan wutuh) nuli dipanggang ing anglo (kompor) nganti nglinyit kaya metu lengane, yen uwis nuli diiris lan diperes diwadhahi gelas. Lenga kayu putih lan enjet nuli dicampurake lan diadhuk nganti warata. Diunjuk kaping telu (esuk, awan lansore) @ 1 sendhok makan.

 

Kanggo Tamba kesel

Wis akeh suplemen kanggo mbalekake stamina (weton pabrik) dicol ing pasaran. Ora susah khawatir, jeruk pecel lan ubarampene uga ora kalah khasiate. Carane, siapake jeruk pecel siji kang wis rada kuning kulite, rimpang jahe 2 driji, mrica bubuk ½ sedhok teh lan 1 sen­dhok  teh kopi bubuk carane: jeruk pecel diiris lan diperes nuli diwadhahi gelas. Rimpang jahe diperes lan dicampurake banyu jeruk pecel. Mrica bubuk lan kopi bubuk dicor banyu anget lan diudhak ngan­ti warata. Banyu jeruk pecel lan banyu, jahe nuli dicampurake. Sakwise disaring bisa langsung diunjuk.

Wis akeh kang nyoba kanthi nam-bahake endhog pitik kampung (Ku­ninge wae) resep tamba kesel kasebut asile krasa nang awak. Otot bebayu malih sigrak dianggo makarya. Mugi tulisan sapala iki migunani kagem sutresna PS.Nuwun. (FX. Suyatno)

Berita Terkait

img

Samak Minggu Ini

img

img

Sumber Semangat

Saben masalah kang muncul bisa gawe ajur utawa bisa ndadekake kuwat ...

Klik

DREAM SEREM

Ora sateruse bangunan utawa gedhong kang digawe menungsa bakal terus dipigu-nakake lan diramut. Akeh bangunan kang wusanane ditogake mangkrag ngono wae. Saengga jroning wektu tinamtu bali dijaluk dening alam. Kaya dream molen iki upamane. Sawise ora dipigunakake lan dianggurake ngono wae mula malih dadi ‘dream serem’ merga akeh dirambati tanduran ing kana kene. (d/ist)***

Pethilan

Pemerintah nyiapake dana kelurahan

Mesisan kampanye!

Mogok guru ing Mimika, Papua, tanpa solusi

Padha lali sajake, ora dadi pejabat yen tanpa guru

Jokowi: Bangun optimisme

Sing pesimis nyemplung segara ae