LSW 37 / 2018
Diposting oleh : Administrator
Kategori: Layang Saka Warga - Dibaca: 35 kali

Pigunane Godhong Sukun

Masyarakat wis padha pirsa yen woh sukun mujudake woh sing sarwa migunani. Yen enom kena disayur, dene yen wis tuwa nganti mateng nikmat banget ya digoreng kagem kanca ngunjuk teh ing wayah sore. Dene kayune kurang becik yen kanggo dandanan, prayogane ya mung kanggo masak tumrap sing ngagem keren utawa dhingkel (tradhisional).

Godhong sukun kena kanggo tamba lara ginjel awit ngandhut werna-werna zat sing migunani, kayata: asam hidrosianat, asetilcolin, tanin, lan rebotlavin. Kandhutan kasebut bisa njalari godhong sukun bisa kanggo ngatasi lara ginjel, jantung, lan radhang.

Carane yen kagungan lara ginjel mundhuta godhong sukun telung lembar sing wis garing. Sawise dikumbah resik lanjut digodhog nganggo banyu rong liter nganti umob di isihake separo. Sawise iku ditambahi banyu maneh saliter banjur digodhok maneh nganti umeb lan diturahake separone maneh. Yen wis adhem diunjuk esuk lan sore, saben ndina kudu ganti. Ditindhakke kira-kira sepasar, bakal katon hasile. Iki tamba Jawa tinggalane leluhur.

Nini Klenyem – Yogya.

 

Asmane Mbah Brintik

Nyuwun duka sakderengipun, kepareng kula nyuwun pirsa bab wara-wara lelayu:

Wonten PS no. 33 kaca 21 menapa asmanipun ibu boten klentu? Sanes Kamiarsih nanging Kurniasih. Mbok menawi kula ingkang klentu, nyuwun agenging pangaksama. Matur nuwun.

Kel. R. Sudaryanto PS, Gang Potrojoyo 486 C, Malang 65126

 

Definisi Lagu Kebangsaan

Kita  apal lagu kebangsaan kita, Indonesia  Raya. Lagu kebangsaan dinyanyekake ing saben upacara bendera lsp, malah uga saben esuk ngumandhang ing media TV kanggo miwiti acara. Uga dikumandhangake ing event olah raga antar negara lan penghormatan marang pemenang (oleh medali emas) ing pertandhingan / perlombaan  ing Asian Games lsp.

Nanging sing dadi pitakonku, jawaban pitakonan : Lagu Kebangsaan iku lagu sing kepriye ? Nalika anakku takon mengkono, aku ora bisa aweh jawaban sing bener lan maremake. Mbok menawa para sutresna ana sing bisa paring kerangan, aku nyuwun diparingi jawabane, bisa liwat LSW PS utawa artikel. Matur nuwun.

Tugu W. - Magelang.

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik