Jula-Juli
Diposting oleh : Administrator
Kategori: Rena-rena - Dibaca: 67 kali

AKEH sing gela, Mahfud MD sing 99 % bakal digandheng dadi Cawaprese Jokowi, ngerti-ngerti digenti KH Ma’ruf Amin sing wis sepuh. * Mahfud MD timing-e ora pas, Jokowi butuh tameng kanggo ngadhepi klompok oposisi lambe setumang.

***

SENAJAN ngakune eklas, ing ILC TV One Mahfud MD kelakon mblejedi para petinggi NU sing njegal dheweke dadi Cawapres. * Wong Jawa kebak samudana, nadyan lupa (luwe) yen dikon mangan mesthi  kandha: matur nuwun, kula nembe mawon nedha!

***

RATNA Sarumpaet lan Rocky Gerung ditampik masyarakat Bangka Belitung, amarga arep cera-mah kanthi judul Selamatkan Indonesia. * Pancen akeh sing keslomot, wong se­lamatkan Indonesia kok kanthi omong celometan, gak selamet cara ngono iku.

***

MBENERI Idul Kurban 1439 H wingi, Capres Prabowo malah menyang luwar negri, mang-ka pendukunge pengin dheweke salat Ied ing Istiqlal. * Sapa ngerti Prabowo salat Idul Adha ing Mekah, ing kana nyuwun berkah, pendukunge aja nganti mokah.

***

USTADZAH Neno Warisman wurung deklarasi #2019 ganti presiden ing Pakan Baru (Riau), mer-ga dicegat masa ing Bandara nganti nem jam. * Jeneh Neno Warisman omongane gawe giris, jan ngisin-isinke waris, kaya dudu wong mukhlis, apa entuk pris?

***

JARENE Mahfud MD, Pilpres kuwi dudu ajang golek pemimpin paling becik, nanging nyegah aja nganti wong jahat dadi pemimpin. * Senajan jahat yen logistike sak arat-arat, bisa lho mengaruhi rakyat, yen imane ora kuwat kelakon bisa malik keblat.

***

KETUA MPR Zulkifli Hasan eyel-eyelan karo Menkeu Sri Mulyani, ngenani utang RI sing jarene disumelangake ora bisa nyaur. * Eling-eling Ketua MPR-e saka partai oposisi, durung bisa sisi wis kakehan aksi, ngang-gep pemerintah bau terasi.

***

KESERET kasus korupsi PLTU Riau, Mensos Idrus Marham trima mundur, senajan KPK du­rung mutusake dadi tersangka. * Idrus Marham pancen jantan,  liyane dheweke kakehan parikan, golek pengacara pa­tohan, ngajokake gugatan pra peradilan.

***

AGUS Gumiwang Kartasasmita, dadi Mensos sing anyar. Ramane, Ginanjar Kartasasmita we­ling, dadi mentri sing ngati-ati. * Sajake Ginanjar dhewe banjur kelingan, jaman dadi Mentri Pertambangan, nate kesrim­pet kasus kilang Balongan.

***

SAIKI dadi isyu rame, PKS - PAN rila Sandiaga Uno dadi Cawaprese Prabowo, awit tilas Wagub DKI kuwi mbayar Rp 1 trilyun. * Yen ta kabar mau bener, gunggunge dhuwit pancen gawe ngiler, PKS-PAN bisa turu angler, ning Demokrat sing gaber-gaber.

***

ING atase lindhu gedhe NTB wis niwasake wong 259 lan kapitunan nganti Rp 7,7 trilyun, pamarentah durung netepake minangka Bencana Na-sional. * Mangka jroning kasus Lumpur Lapindo, swasta sing pengawasane ken­dho, pemerintah sing rugi pindho.

***

MANUT Kepala Humas BNPB Sutopo Purwo Nugroho, lindhu NTB durung perlu status Ben­cana Nasional merga Pemda ora nganti lumpuh, saengga isih bisa ngurus. * Nek ngono apa BNPB kuwi cekakan: (B)antu-an (N)genteni (P)emda (B)angkrut?

***

KADES Aep Saefuloh saka Bandung, liwat video nantang debat Rocky Gerung – Fadli Zon, sebab yen ana ILC TV One pijer ngelek-elek pe­merintah. * Rocky Gerung swarane kaya gareng, mung pawitan gurung, omongane garang lali yen wis gerang.

***

MASSA anti lan pendukung deklarasi #2019 ganti presiden eker-ekeran ing Hotel Elmi Su­-rabaya, saengga Ahmad Dhani dipeksa polisi bali menyang Jakarta. * Penyanyi Ahmad Dhani yen digepuki masa bisa pating penyonyo, jeneh senengane pe­nyenyengan.

***

KLOMPOK sekte Kerajaan Ubur-Ubur ing Tangerang ditangkep polisi, amarga Aisyiah sing dadi pimpinane ngaku Nyai Rara Kidul. * Nyai Rara Kidul kok mangane dudu menyan karo kebul, isih doyan sekul lan yen tan­pa penganggo ya katon gidal-gidul.

***

JARENE Amien Rais wewaton paribasan Cina, iwak bosok kawiwitan saka endhase, negara rusak uga kawiwitan saka presidene. * Lha yen partai, kepriye Mbah Amien? Kadere ru-sak (padha korupsi) apa ya merga saka pendhiri lan Ketua Umum-e?   _GTS

***

ATLET kontingen Jepang ing Asian Games ka-18, ana papat sing diulihake menyang negarane merga konangan golek WTS ing Jakarta. * Jaman Jepang tempo dulu; embahe padha luru Yogun Ianfu, saiki putune melu tiru-tiru, jan bikin malu....!

***                                       

                                                                                                                                    (GTS)

 

Berita Terkait

img

Samak Minggu Ini

img

img

Sumber Semangat

Yen kowe weruh semut kepleset lan ceblok ing banyu, mula angkaten lan tulungana dheweke...  Sapa ngerti kuwi dadi sebab anane ampunan tumrapmu ing akherat mengko.

Klik

FESTIVAL CAGANARES

Caganers yakuwi sawijining festival kang dianakake saben wulan Desember ing daerah Catalunya utawa Barcelona, Spanyol. Festival iki bakal ndadekake sapa wae gedheg-gedheg. Kepriye ora, merga masyarakat ing kono ngumpulake maneka figur tokoh dunia kang lagi mbukak kathoke lan (ngapunten) bebuwang. Tokoh duniane macem-macem, kaya Ronaldinho, Albert Einstein, Michael Jackson, Donald Trump, Barrack Obama, lsp. Festival iki ngemu teges yen sapa wae satemene padha tanpa ndeleng trah utawa jabatane nalika bebuwang. (d/ist)***

Pethilan

LP Banda Aceh ribut, 113 napi kabur

Sapa sing betah nang pakunjaran?

Cawe-cawene guru ora bisa digenteni

Apamaneh sing jenenge Pak Google

600 dina kasus penyerangan Novel durung kawiyak

Aparat lagi asyik ngetung dina mbok­menawa