Nanggulangi Sampah
Diposting oleh : Administrator
Kategori: Banyumasan - Dibaca: 85 kali

Ngrumangsani nek wengi kuwe giliran regune sing rondha, bali sekang Mesjid, Kaki Bawor terusan njujug maring Pos Rondha, temenan tekan Gerdhu, anggota regune wis kumplit, mung Darman Betor sing durung keton, “Lha, Darman durung teka, yah?” Nembe bae klakep gole ngomong, njuran krungu suwara ether-ether, ora pangling nek ku­we suwara betore Darman. “O, lha kae wonge, jan pancen ora ke­na dirasani,” Darman ngunclug maring gerdhu karo nyangking tas kresek isi mendhoan diwehaken maring Yamun, karo ngomong, “Mas Guru, olihe mendhoan thok, golake wis ora uman, kiye jujulane,” njuran ngulungaken jujulane maring mas Guru Tarno.

“Eh, mendhoan egin anget kaya kiye, jane enake dipangan karo sambel kecap, jan nylekamin pisan,” ujare Yamun karo nguntel-untel tilas bungkuse mendhoan, garep dibuang.

“He, garepan dibuang nangendi kuwe? Kae toli ibu-ibu PKK wis nyediyani tong sampah loro, sing wis ditulisi Organik karo An Organik,” ujare mas Guru Tarno ngandhani Yamun. “Sing organik kuwe nggo wadhah sampah sing dudu sekang plastik, sing an organik nggo wadhah sampah sing sekang plastik, dadi aja dicampur, mas Yamun.” Kandhane mas Guru Tarno, “Ibu-ibu PKK toli kepengin gawe Bank Sampah nggo nanggulangi sampah nang lingkungan, Supayane sampah aja nganti numpuk, nek numpuk njuran kleleran, lingkungane dadi kotor, apa ma­ning nganti diguwang kali, kaline kejaba dadi kotor, malah bisa ndadekaken banjir.”

“Wah gagasan sing maen kuwe,” Kaki Bawor nyelani, “Lingkungane dadi sehat, apa maning nek sampah kuwe teyeng diakali didadekaken dhuwit.”

“O, teyeng kang Bawor,” ujare Pak Priyanto melu urun rembug. “Nang nggone inyong Purbalingga kana, sampah plastik bisa digawe werna-werna, ana sing digawe paving, ana sing digawe hiasan. Lha sing isih bisa dienggo ya dikumpulaken,  nek sing organik bisa digawe pupuk, kabeh bisa didol dadi dhuwit.”

“Lha, nang Cilacap saiki be agi nyiapaken mesin RDF – Revuse Derived Fuel, nggone nang sandhing TPA Tritih Wetan Kecamatan Jeruk­legi, kuwe ya jare nggo dhaur ulang sampah,” ujare Kebayan Dikin karo nyomot mendhoan.

“Lha, mesin nggo ngapa kuwe?” takone Yamun, karo nyruput we­dang kopine.

“Mesin kuwe nggo ngolah sampah didadekaken bahan bakar, rencanane kanggo bahan bakar pabrik semen, sedinane bisa ngen­tongaken sampah 120 ton,” kandhane Kebayan Dikin. “Mesin kuwe jare rencanane wulan Oktober ngemben wis teyeng digunakaken. Ya kuwe klebu cara nggo nanggulangi sampah.”

“Beda maning nang Banyumas, dhong ganu agi inyong bali nyadran, nang Purwokerto, sing jenenge sampah numpuk, ngendheng-en­dheng, malah nganti mblarah-mblarah nang pinggir gili. Jan ambune banger,” kandhane mas Guru Tarno, njuran nyruput wedange, nembe nerusaken gole ngomong, “Jalarane jare TPA Kaliori ditutup, karo pe­ngolahan sampah sementara sing nang Kedungrandu ditolak, sasate ndhing winginane daerah Banyumas dadi dhaerah Darurat Sampah. Muga baen saikine wis bisa diatasi. Wong jare TPA Kaliori wis dibukak maning.”

“Oh, medeni temen kuwe,” kandhane Kaki Bawor gedheg-gedheg. “Mulane, jane aja mung ngendelaken Pemerintah Daerah, thok. Kudune warga masyarakat ya kudu melu temandang nanggulangi sampah.”- Klilan.

Berita Terkait

img

Samak Minggu Ini

img

img

Sumber Semangat

Akeh-akehe wong nyenengi kaum kang lemah, nanging ngetutake kaum kang kuwat. Tetepa mbela wong-wong kang lemah apa wae kahanane.

Klik

KUDHA NIL ING DHARATAN

Patung unik lan lucu iki mesthi wae digawe dening arsitektur seni profesional. Patung-patung iki digawe kanggo narik kawi gatene wong akeh. Patung-patung iki digawe saunik-unike amrih nduweni daya tarik sekaligus aweh kesan ikonik sawijining kutha. (d/ist)***

Pethilan

Wutuhing bangsa aja dikurbanake jroning masa kampanye

Eling lo, pemilu limang taun pisan mesthi bali maneh

BBM ora kena pengaruh mundhake rega lenga

Kena pengaruhe sik dienteni, ngen­teni coblosan

KPU ngajab ora milih caleg tilas koruptor

Muga-muga caleg liyane dudu calon koruptor