Akur, Korut-Korsel Latihan Bareng Ngadhepi Asian Games 2018
Diposting oleh : Administrator
Kategori: Olahraga - Dibaca: 6 kali

Sawenehing atlet Korea Utara kang bakal tampil ing Asian Games 2018 ing Indonesia, dina Minggu kepungkur padha teka ing In­cheon, Korea Selatan, saperlu nindakake latihan bareng karo atlet Korea Selatan.

Delegasi Korut kang jumlahahe wong 34 iku teka ing bandara Incheon liwat Beijing. Kekarone Korea iki bakal nampilake tim gabungan ing nomer lomba dayung prau naga, bola basket putri lan telung nomer ing cabang rowing Asian Games ka-18 ing Jakarta lan Palembang 18 Agus­tus nganti 2 September 2018 mengko.

Kanthi pengawalan ketat, delegasi Korea Utara iku langsung ninggalake bandara tanpa akeh omong karo warta­wan. “Kita lagi ndeleng kowe kabeh” mangkono komentar cekake Sekjen Ko­mite Olimpiade Korut Han Ho-choi marang wartawan.

Sabanjure para atlet Korut ksb budhal nuju Chungju, 150 kilometer sakidule Seoul, papan latihan lan nginep sasuwene ing Korsel sadurunge menyang Indonesia.

 

INASGOC Mesthekake

Palembang Siap

Sauntara kuwi, Ketua Panitia Penye­lenggara Asian Games 2018 (INASGOC), Erick Thohir, ngandhakake yen Palem­bang, Sumatera Selatan, wis saya siap nggelar Asian Games 2018.

“Tekaku mrene salah sijine iku pengin mesthekake kesiapane Palembang jroning nggelar Asian Games 20 dina maneh iki. Sing tak deleng kabeh apik, padha karo ing Jakarta, Jawa Barat, lan Banten” ujare Erick marang pers.

Erick ngandhakake venue pertandi­ngan jroning kawasan Jakabaring Sport City wis nggampangake Palembang dadi tuan rumah. Kutha Palembang kang dite­tepake minangka penyelenggara Asian Games bebarengan karo DKI Jakarta nalika akhir 2014, mung kari nambah infrastruk­tur pendukung amrih saya aweh kenya­manan marang atlet, ofisial, lan tamu negara.

“Kaya kang diresmekake dina iki, unit UGD 24 jam kanthi fasilitas ing antarane ana laboratorium, farmasi, lan X-Ray. Lokasine uga persis ing sangarepe gerbang JSC saengga mung butuh rong menit saka njero (venue) mrono yen ana kahanan darurat,” ujare Erick.

Saka babagan transportasi, Palem­bang wis ngatasi merga nduweni light rail transit (LRT) kango ngangkut kontingen negara peserta saka Bandara SMB II menyang JSC. Dene kanggo nginepe atlet, ing JSC uga ana wisma atlet, tower rusunawa cacah lima, lan sawijining tower rusunami kang bisa nampung 3.000-nan  atlet lan ofisial.

“Malah ing Palembang iki luwih unik merga ing njero Kompleks JSC uga dise­dhiyakake 50 golf car kanggo mobilisasi para tamu-tamu negara” tuture Erick.

Manut Erick, jroning wektu kang ku­rang saka 20 dina iki, Palembang tetep kudu nyempurnakake bab-bab kang gegandhengan karo acara demi suksese kegiatan akbar kang pungkasan digelar ing Indonesia taun 1962 iku. Apamaneh, ujare Erick, Asian Games ing Indonesia beda banget karo kang digelar ing Incheon. Sebab, ana undhak-undhakan 20% jumlah pesertane. Dinane iki, panitia nampa daftar atlet lan ofisial jumlahe wong 17.194. Saka jumlah iku, wong 3.000 bakal ana ing Palembang.

“Kita kabeh ngajab Palembang siap nampa tamu-tamu negara iki. Iki penting merga kutha iki nduweni visi ing babagan pariwisata. Yen pariwisata maju, mula bakal nekakake devisa” jlentrehe Erick.

Sauntara iku, ngadhepi Asian Games iki, sawenehing arena olahraga ing JSC lagi nindakake instalasian peralatan per­tandingan. Kanggo nyengkuyung kegiat­an iki, kompleks JSC wis dinyatakake steril kanggo masyarakat umum sajake minggu kepungkur. Palembang bakal dadi tuan rumah Asian Games kanthi nggelar 14 ca­bang olahraga, ing antarane boling, tenis lapangan, nembak, dayung, bal-balan wanita, skateboard, panjat dinding, lan liya-liyane. (d/ist)

 

Berita Terkait

img

Samak Minggu Ini

img

img

Sumber Semangat

Ana Gusti papane se­mendhe kang kukuh, geneya wedi tiba. Ana Gusti kang kagu­ngan tresna sejati, ge­­neya wedi kela­ngan. Ana Gusti pang­gonane nyenyuwun, geneya wedi kentek­an? Pasrahna saka­behe marang Gusti Kang Murbeng Dumadi.

Klik

60 TAUN ORA ADUS

Adus saben dina penting banget kanggo njaga kesehatane awak. Nanging ora mangkono tumrape Amou Haji, priya tuwa asal Iran iki malah lara kabeh kulite yen kena banyu. Mula dheweke ora tau adus sasuwene 60 taun iki. Nganti-nganti dijuluki priya paling kotor sadonya. Kepriye ora, werna kulite wis padha karo wernane lemah, semono uga teksture atos kaya semen saengga kerep dikira patung yen lagi lungguh meneng wae. (d/ist)

Pethilan

Pirembugan cawapres durung rampung

Dudu mung ngomongi ban serep

Disiapake rekayasa lalu lintas kanggo Asian Games

Jalur zig-zag sepedhah uga ana

Penduduk desa bisa saya miskin

Nah, kena kanggo bahan adol kam­panye