JUBIR Istana
Diposting oleh : Administrator
Kategori: Rena-rena - Dibaca: 133 kali

JUBIR Istana Ali Mochtar Ngabalin sing nembe sawatara minggu makarya, wis diangkat dadi Komisaris BUMN PT Angkasa Pura I.

* Layak wae ko­mi­saris diplesetake dadi: gunggunge dhuwit komisi gawe giris, tur gaweyane mung duduk manis karo ngisis.     

***

BLANJANE Ali Mochtar Ngabalin minangka Jubir Istana sesasi Rp 36 juta, ketambahan blanja ko-misaris sakupenge Rp 60 juta.

* Donga­ne Mochtar Ngabalin lagi makbulin, mobile solan-salin, saiki ora doyan es lilin, sabane pertokoan Duta Merlin.

***

WAHID Husen Kalapas LP Sukamiskin Bandung, ditahan KPK awit disogok napi korupsi Fahmi Darmawansyah, amrih entuk sel penak lan bisa mlebu-metu.

* Merga na-pi Darmawan sing “dermawan”, Kalapas melu ditawan dienggo pengewan-ewan.

***

SENAJAN pamarintah kasil nguwasani saham PT Freeport Indonesia (PFI) dadi 51 persen, suprandene Amien Rais nganggep apus-apus.

* Dimaklum, kaum oposisi mono pa­hame Malima, yaiku: manasi, madani, madoni, mahoni, karo maido.

***

NGEWANGI partai Perindo, Wapres Jusuf Kalla melu gugat menyang MK, njaluk aturan jabatan Wapres mung rong periode dibatalake.

* Jare JK wis pengin ngaso, wong yuswane wis luwih saka wektu ngasar, ning jabatan Wapres kok meksa ngesir?

***

MAPAG Asian Games ka-18, Gubernur DKI Anies Baswedan ngetogake wae pasangan gendera manca cagak pring, nganti RI disorot negara manca.

* Cucul anggaran gendera owel, negara manca padha mangkel, temahan Indonesia sing di­ingel-ingel.

***

MBURU wektu, kali Item Kemayoran sing sawangan lan gandane ngganggu para atlet Asi-an Games mung ditutup Gubernur Anies kanthi waring (jaring ireng).

* Kok ana-ana wae, waring kanggo nutupi wirang, ora wurung akeh sing banjur padha wa-ringuten.

***

NENO Warisman sing melu demo “#2019 ganti presiden” ing toko Markobar Solo duweke Gibran putra Jokowi, nembe iki mobile kobong.

*Neno Warisman ngaku budiman jebul atine panasan, brangasan gampang ke­brongot, mobile dadi kebrongos.

***

ANGGOTA DPR Eni Maulani Saragih, kena OTT KPK jalaran nampa sogok Rp 4,8 milyar jroning nglancarake proyek PLTU Riau-1.

* Dhuwit pirang-pirang milyar kok olehe mayar, ning bareng kesiyar kariere bakal buyar, manggon ing sel sing boten wiyar.

***

LALU Mohammad Zohri (18) saka NTB, merga kasil dadi juwara lari dunia ing Finlandia, entuk hadiah omah, emas 1 Kg, dhuwit pirang-pirang atusan.

* Yen begja, banjir hadiah mer-ga juwara lari, liyane padha lari saka tang­gungjawab lan kanyatan.

***

PRESIDEN Jokowi ngendikakake, dhaftar Cawapres wis mlebu kanthonge, ning sapa wae jenenge lali jalaran kanthonge akeh banget.

* Kanthong sepuluh sing dipilih mung siji, liyane dadi kenthang-kenthang wong racake kelas Petruk Kanthong Bolong.

***

PRABOWO pengin koalisi karo Demokrat - PAN, ning politisi Gerindra Arief Poyuono - Desmond Mahesa suwarane pijer ngaco.

* Ngibarate Prabowo arep nyekel pitik ras, omong-ane Desmond – Arief Poyuono pijer ke­ras, temahan pitike dadi giras.

***

PERTAMINA tekor Rp 72 trilyun lan terancam bangkrut sawise diwajibake pemerintah ngedol premium lan solar kanthi rega ora cucuk.

* Pemerintahe asal nembak, Pertamina dadi nombok, pejabate arai nembok, rakyate sing padha numbuk-numbuk.

***

MANUT prediksine lembaga survei LSI-Denny JA, ing Pileg 2019 ngarep iki akeh partai sing gagal mlebu Senayan, merga swa­rane ora nyukupi.

* Rakyat wis wegah ngurus, akeh politisi sing malah dadi tikus, partaine ora ana sing ngambus, ben kawus!

***

SUMELANG gagal mlebu Senayan, ngadhepi Pileg 2019 parpol padha jor-joran mbujuki artis kondhang, dikon  dadi Caleg DPR.

* Artis racake mung modal popularitas, sugih dhuwit kertas, wawasan politike gak ngerti blas, ana ing  DPR mung dadi ampas.

***

KPUD ing ngendi-endi nemokake bakal Caleg sing aneh; ana sing isih bocah, ijazah durung dilega-lisir, malah ana sing nyaleg rong partai.

* Maklum, racake dudu politisi, mung perut pengin isi, wekasane padha salah ngisi, KPU-ne sing mundhak tensi. (GTS)

***

SENAJAN MK wis nglarangi anggota DPD ngrangkep dadi pengurus partai, akeh calon anggota DPD sing wegah mundur saka partai.

* Dadi anggota DPD yen kliwat pede, mung padha nggugu karepe dhewe, apa kakehan mangan pelas gudhe?

***

                                                                                                                                   (GTS)

Berita Terkait

img

Samak Minggu Ini

img

img

Sumber Semangat

Yen kita sukses, bakal akeh ‘kanca palsu’ lan akeh ‘lawan nyata’. Ora usah perduli, tetepa dadi wong sukses apa wae kahanane!

Klik

DESA KANTHI PENDHUDHUK GOLEKAN

Desa Nagoro kang ana ing Jepang ndhisike dipanggoni atusan kepala keluarga. Nanging saikine kabeh mau wis owah. Sing ngenggoni mung puluhan wae, sing liyane wis padha tilar donya. Sing rada aneh saka desa iki, amrih ora sepi merga sithike pendhudhuk, akeh golekan kang dipasang ing ngendi-endi kanthi dipacaki kaya patrape menungsa tenanan. Kaya upamane lagi jagongan, nyapu, nyawah lsp. (d/ist)***

Pethilan

Kekarone capres ajeg nyapa calon pemilih

Wiwit selfie nganti aweh klambi

Anggaran pelatnas seret

Pengin emas, wenehana baki

Bab ngragati partai, parpol siap aweh data menyang KPK

Apik kuwi, katimbang menehi koruptor wae…