Nasibe Dongeng
Diposting oleh : Administrator
Kategori: Layang Saka Warga - Dibaca: 74 kali

Jaman isih dadi bocah cilik biyen, aku seneng banget ngrungokake dongeng. Ora perduli sapa sing ndongeng: simbah, ibu, guru, utawa sapa bae wong sing luwih dewasa. Malah, terkadang kanca sababagan uga ana sing bisa ndongeng. Aku lan kanca-kancaku padha seneng ngrungokake. Ora mung seneng, kapara malah padha ketagihan.

Nalika anak-anakku isih cilik, kabeh seneng dongeng. Saben bengi mesthi njaluk didongengi. Dongenge kudu gonta-ganti. “Uwis..., dongeng liyane,” kala-kala protes mengkono yen dongengku wis tau dak dongengake. Mula aku banjur maca buku-buku dongeng kanggo bahan. Yen kentekan bahan, aku tetep kudu ndongeng kanthi dongeng karanganku dhewe sauni-unine. Anehe, bocah-bocah wis trima didongengi saanane.

Nalika iku, bocah-bocah njaluk jatah, saben bengi kudu sajudul, ora kena dibaleni. Yen upamane aku lunga amarga ana keperluan sing kudu nginep, tegese aku duwe “utang”. Wengi candhake aku kudu ndongeng dhobel (jatah wengi iku lan wengi sing dak tinggal lunga). Tau, utangku akeh nganti lima, saengga aku bingung kudu ndongeng nem judul. Mula, supaya utangku ora akeh, aku ngrekam dongeng ing kaset, banjur kaset iku diputer ing tape analika aku lunga.

Mangkono gegambarane senenge bocah biyen marang dongeng. Pigunane, antara liya, bocah-bocah oleh pendidikan budi pekerti luhur kanthi ora langsung, yaiku niru conto tokoh dongeng sing apik lan pantes ditiru. Upamane, dongeng bocah sing sregep mbantu wong tuwane lan akhire oleh kamulyan, anakku ya tiru-turu sregep nyapu lan tandang gawe liyane.

Saiki, bareng tekan putuku kepriye? Jan owah babar pisan. Putuku ora seneng ngrungokake dongeng. Senengane nonton TV lan drijine uwik-uwik nutuli HP. Apa kabeh bocah saiki padha kaya ngono kuwi? Banjur, kepriye carane mbalekake tradisi ndongeng yen bocahe ora ketarik karo dongeng? Mangka, manut para pakar, manfaate dongeng iku akeh banget kanggo bocah-bocah, antara liya kanggo hiburan, ngraketake sesambungan bocah lan wong tuwa, pendidikan budi pekerti, ngembangake imajinasi, lan nambah kosakata.

                                                                    

                                                                           Asul Wiyanto - Malasan,

                                                                           Durenan, Trenggalek

Berita Terkait

img

Samak Minggu Ini

img

img

Sumber Semangat

Saben masalah kang muncul bisa gawe ajur utawa bisa ndadekake kuwat ...

Klik

DREAM SEREM

Ora sateruse bangunan utawa gedhong kang digawe menungsa bakal terus dipigu-nakake lan diramut. Akeh bangunan kang wusanane ditogake mangkrag ngono wae. Saengga jroning wektu tinamtu bali dijaluk dening alam. Kaya dream molen iki upamane. Sawise ora dipigunakake lan dianggurake ngono wae mula malih dadi ‘dream serem’ merga akeh dirambati tanduran ing kana kene. (d/ist)***

Pethilan

Pemerintah nyiapake dana kelurahan

Mesisan kampanye!

Mogok guru ing Mimika, Papua, tanpa solusi

Padha lali sajake, ora dadi pejabat yen tanpa guru

Jokowi: Bangun optimisme

Sing pesimis nyemplung segara ae