Gubernur Aceh Irwandi Yusuf Kejaring OTT Tim KPK
Diposting oleh : Administrator
Kategori: Dredah Masalah - Dibaca: 37 kali

Gubernur Aceh Irwandi Yusuf sing kondhang jago maburake pesawat, katon mesam-mesem nalika teka ing Gedhong Merah Putih Komisi Pemberantasan Korupsi (KPK), Jakarta, Rebo (4/7) kepungkur.

Nanging, gubernur ‘pilot’ kasebut mesam-mesem ora merga kasil ngedhunake pesawate ing plataran Gedhong KPK. Sang kapten teka ing markase lembaga antirasuah nganggo mobil tahanan merga kejaring Operasi Tangkap Tangan (OTT) tim KPK jalaran dinuga nampa beselan.

Irwandi menganggo hem putih, clana klawu sarta menganggo sepatu kets ireng mudhun saka mobil tahanan ing Gedhong KPK watara jam 14.13 WIB.

Sawise klakon mbeciake hem-e, Irwandi langsung digiring dening petugas mlebu menyang Gedhong KPK. Salah sawijining petugas ing antarane nggawakake koper werna abang.

Ing ngarep ruwang lobi Gedhong KPK, wis ngumpul puluhan wartawan kang sengaja nyorotake kamera video, foto engga kamera telepon genggam (HP).

Pitakonan mbaka pitakonan saka wartawan ditujokake marang Irwandi. Nanging, dheweke milih wegah mangsuli sinambi terus ngumbar esem engga digiring petugas menyang ruwang pemeriksaan Gedhong KPK. Dheweke isih kober ngawe-ngawe tangane nalika wartawan mitakonake panduga kasus korupsi kang ndadekake kejaring OTT.

“Durung, durung weruh. Mengko ya, mengko ya,” ujare Irwandi cekak.

Sadurunge Irwandi Yusuf, Hendri Yuzal luwih dhisik teka ing Gedhong KPK klawan dikawal petugas. Hendri sing menganggo jaket ireng sarta clana jeans biru teka pas jam 12.45 WIB. Kanthi nggawa tas rangsel ireng, Hendri langsung digiring petugas mlebu Gedhong KPK.

Gubernur Aceh Irwandi Yusuf mujudake salah siji saka wong sepuluh kang diamanake dening tim KPK ing OTT ing wewengkon Aceh dhek Selasa (3/7) sore engga wengi. Irwandi Yusuf ditangkep dening petugas KPK pitu ing omah dhinese Gubernur Aceh, Banda Aceh, nalika Selasa wengi watara jam 21.05 WIB. Irwandi langsung digawa menyang Mapolda Aceh.

Sadurunge gubernur, tim KPK luwih dhisik nangkep Bupati Bener Meriah, Ahmadi, watara jam 18.30 WIB.

Anggone netepake kepala daerah loro minangka tersangka bebarengan iku uga nate ditindakake KPK. Yaiku, nindakake OTT ing kutha Blitar lan Tulungagung (Jawa Timur). Bupati Tulungagung (nonaktif) Syahri Mulyo lan Wali Kota Blitar M.Samanhudi Anwar ditetepake minangka tersangka ing OTT kang ditindakake dhek Juni utawa sadurunge Riyaya kepungkur.

Wakil Ketua KPK Basaria Panjaitan mratelakake, panetepan tersangka kepala daerah Aceh loro kasebut ditindakake sawise  tim KPK duwe anggepan anane srah-srahan dhuwit Rp 500 yuta saka Mulyassir, wong kang dadi kapercayane Ahmadi, marang Fadli, wong cedhake Irwandi. Dhuwit iku mujudake perangan saka Rp 1,5 miliyar kang disarujuki Ahmadi lan Irwandi.

Pasarujukan iku gegayutan karo fee ijon proyek-proyek pembangunan infrastruktur sing sumbere saka Dana Otonomi Khusus Aceh (DOKA) taun 2018. Dinuga, dhuwit Rp 1,5 miliyar kasebut mujudake perangan saka prajanjen 8 persen sing dikanggokake kanggo pejabat ing pemerintah Aceh.

“Paweweh marang gubernur ditindakake liwat wong-wong cedhak gubernur Aceh lan bupati Bener Meriah kang tumindak minangka perantara.,” pratelane Basaria Panjaitan nalika sapatemon karo wartawan. Sawise antuk katrangan kasebut, KPK sakala ngamanake Irwandi lan Ahmadi ing panggonan loro kang beda. Lelorone banjur digawa menyang Jakarta.

Basaria nerangake, sawise ngamanake pehak-pehak kang gegayutan dalasan barang buktine, tim penyidik KPK ngundhakake kalungguhan hukume Irwandi lan Ahmadi minangka tersangka. Irwandi dinuga minangka pehak kang nampa. Dene Ahmadi mujudake pehak kang menehi beselan kasebut. “Diputusake anane panduga tindak pidana korupsi,” jlentrehe Basaria.

Kejaba Irwandi lan Ahmadi, KPK uga netepake wong loro saka perusahaan swasta minangka tersangka.Yaiku Hendri Yusal lan Syaiful Bahri. Lelorone dianggep melu-melu ing perkara panampane beselane Irwandi. Barang bukti sing kasil diamanake bareng dheweke yaiku dhuwit Rp 50 yuta, bukti transfer perbankan Bank BCA lan Mandiri, sarta cathetan proyek.

Sawatara iku, gubernur Aceh sing teka ing Gedhong KPK watara jam 14.13 WIB mau langsung digiring mlebu ruwang penyidikan. Ahmadi sing teka ing Gedhong KPK jam 22.30 WIB langsung aweh katrangan. Ahmadi kandha yen dheweke dicegat tim KPK Selasa jam 18.00 WIB lan langsung digawa menyang Mapolres Tengah. Bubar iku, dheweke banjur digawa menyang Mapolda Aceh. “Satekane ing kantor pulisi (Aceh Tengah), suwene 7 jam aku ora ditakoni apa-apa,” ujare.

 

Didawakake

Sawatara iku Gubernur (nonaktif) Jambi Zumi Zola Zulkifli bakal luwih suwe maneh anggone ndhekem ing rumah tahanan (rutan) KPK. Awit, penyidik KPK netepake kanggo ndawakake mangsa penahanane tilas artis kasebut suwene 30 dina mengarep utawa nganti 6 Agustus mengko.

Juru Wicara KPK Febri Diansyah ngandhakake, pehake isih mbutuhake keterangane Zumi Zola ing perkara panduga panampane gratifikasi. Kejaba iku, isih ana saperangan pemeriksaan saksi-saksi kang kudu dicocogake marang Zumi Zola. “Penahanan suwene 30 dina mengarep kepetung wiwit 8 Juli nganti 6 Agustus,” ujare nalika dijaluki katrangan dening wartawan, Rebo (4/7) kepungkur.

Zola ditekake menyang Gedhong KPK kanggo nindakake sakehing proses bab ndawakake penahanane. Salah sijine, nandhatangani berita acara perpanjangan penahanan kang kang diatur ing hukumacara pidana. “Iya, iya (perpanjangan penahanan),” kandhane Zumi Zola nalika metu saka Gedhong KPK. (Tim)

Berita Terkait

img

Samak Minggu Ini

img

img

Sumber Semangat

Ana Gusti papane se­mendhe kang kukuh, geneya wedi tiba. Ana Gusti kang kagu­ngan tresna sejati, ge­­neya wedi kela­ngan. Ana Gusti pang­gonane nyenyuwun, geneya wedi kentek­an? Pasrahna saka­behe marang Gusti Kang Murbeng Dumadi.

Klik

60 TAUN ORA ADUS

Adus saben dina penting banget kanggo njaga kesehatane awak. Nanging ora mangkono tumrape Amou Haji, priya tuwa asal Iran iki malah lara kabeh kulite yen kena banyu. Mula dheweke ora tau adus sasuwene 60 taun iki. Nganti-nganti dijuluki priya paling kotor sadonya. Kepriye ora, werna kulite wis padha karo wernane lemah, semono uga teksture atos kaya semen saengga kerep dikira patung yen lagi lungguh meneng wae. (d/ist)

Pethilan

Pirembugan cawapres durung rampung

Dudu mung ngomongi ban serep

Disiapake rekayasa lalu lintas kanggo Asian Games

Jalur zig-zag sepedhah uga ana

Penduduk desa bisa saya miskin

Nah, kena kanggo bahan adol kam­panye