Ajar Ikhlas lan Taberi saka Jaenal Aripin
Diposting oleh : Administrator
Kategori: Olahraga - Dibaca: 546 kali

Atlet Balap Kursi Roda andel-andele Indonesia

Kacilakan tragis namani sawijining nom-noman aran Jaenal Aripin taun 2006 kepungkur. Nalika lagi numpak sepeda motor ing kutha Bandung, Jaenal kanthi ora ngira ngalami kacilakan parah.

Apese maneh, kacillakan mau ora mung natoni Jaenal, nanging uga ndadekake kekarone sikile kepeksa di­am­putasi.

Mesthi wae ora gampang kanggone nom-noman iki nampa kanyatan ngono mau. Butuh wektu kang cukup suwe kanggone karyawan pabrik ksb mulihake semangat lan kapitayan awake.

Tujune, kanthi anane dukungan keluarga lan kete­mune karo olahraga atletik, Jaenal alon-alon bisa gumregah.

“Sakawit aku ora ngerti ana olahraga difabel. Banjur aku diajak menyang GOR Pajajaran, Bandung, jarene ing kana ana olahraga kanggo kaum disabilitas, kaya upamane mlayu nganti kang nganggo kursi roda,” ujare Jaenal.

“Aku dadi penasaran, wusanane aku teka mrono. Kawi­tan aku nyoba ora bisa. Nanging sawise suwe latihan, wu­sanane penak uga.”

Ketlatenane latihan ing cabang olahraga atletik, uta­mane nomer sprint kursi roda, nguntapake Jaenal mi­nangka salah sijine atlet difabel andel-andele Indonesia.

Saikine, Jaenal bisa ngenggoni peringkat 10 besar dunia kanggo nomer 100 meter T54 lan 200 meter T54.

Prestasi prestisius paling gres kang diukir Jaenal yakuwi oleh medhali emas Kejuaraan Dunia 2018 ing China kanggo nomer 100 meter.

“Alhamdulillah tak tlateni terus lan nganti saiki wis ana asile,” tuture priya kelairan taun 1988 iku.

Ora lali Jaenal pesen marang sapa wae, utamane kaum difabel, amrih tetep semangat jroning mecaki urip iki.

Ing suwalike saben prahara lan tragedi kang dialami sapa wae, Jaenal yakin tansah ana hikmah kang bisa dipethik yen kita bisa ngadhepi kanthi sabar.

“Kanggo kanca-kanca disabilitas, pesenku, aja isin yen upamane kanca-kanca duwe kekurangan,” tuture Jaenal.

“Aja isin ngetokake kaluwihan kita. Sapa ngerti, jroning kekurangan mau, ana kaluwihan kang bisa nekake prestasi,” ujare luwih omber.

Jaenal omah-omah taun 2015. Saikine, dheweke wis di­pa­ringi momongan anak lanang kang ndadekake sema­ngate saya ngambra-ambra.

Dheweke uga nelakake rasa panuwune marang keka­rone wong tuwane kang wis aweh dukungan moril, engga wusanane bisa oleh kesuksesan kaya saiki iki.

“Keluargaku tansah support. Tansah aweh pandonga kang ora tau  pedhot kanggo aku. Matur suwun,” bacute  Jaenal.

Dinane iki, Jaenal mujudake salah sijine atlet difabel kang lagi nindakake test event Asian Para Games 2018.

Ajang uji coba kanggo Asian Para Games 2018 iku di­anakake saka tanggal 27 Juni nganti 3 Juli.

Test event nggelar limang cabang olahraga, yakuwi para bulu tangkis, para renang, para atletik, para tenis meja, lan basket kursi roda. (d/ist)

Berita Terkait

img

Samak Minggu Ini

img

img

Sumber Semangat

Ora ana sing ora bisa diikhlasake...

Klik

OJEK MAYIT

Ojek mujudake salah sijine jasa angkut migunakake sepedhahmotor. Ing jaman modern saiki, jasa iki malah bisa dipesen liwat HP, yakuwi kang diarani Ojek Online (Ojol). Ojol ora mung ngeterake wong, nanging uga panganan, barang lan blanjan. Nanging senajan wis modern, pranyata ojol ing Indonesia isih klebu biyasa-biyasa wae. Beda karo ojek ing Kongo, Afrika. Ojek ing kene ora mung bisa ngeterake blanjan utawa panganan wae, nanging uga ngeterake mayit! Carane nggawa kanthi cara dibonceng ing mburi lan ditaleni rapet karo tukang ojeke. Maklum, mayit kuwi ora bisa nggamblok dhewe... (d/ist)***

Pethilan

Akibat anane lindhu, pegawe hotel lan restoran dikon prei

Ujian kanggo kita kabeh minangka bangsa Indonesia

Idrus Marham durung karep dadi justice kolaborator

Mbokmenawa isih bingung milih je­neng-jeneng kang pantes di-‘nya­nyek’-ake

Asil ing Asian Games 2018 dadi tetenger gumregah

Kabeh kanggo Indonesia