Jula - Juli (27)
Diposting oleh : Administrator
Kategori: Rena-rena - Dibaca: 8 kali

JRONING sasi Pasa 1439 H wingi, Walikota Blitar, Bupati Buton Selatan (Sultra), Purbalingga lan Tulungagung ditangkep KPK.

* Dipercaya dadi pangarsa, kok tumindak sakersa, sasi pasa nambahi dosa, apa-apa kersa, wekasane malah rekasa.

***

SAWISE Mahatir Mohammad kasil dadi PM Malaysia maneh ing ndalem yuswa 92 taun, Amien Rais rumangsa enom maneh lan pengin bali nyapres.

* Elek-elek Mbah Amien iku bapak reformasi, emane elektabilitase biyen ora bisa mitulungi eleking nasibe.

***

KAPAL Sinar Bangun sing kerem ing Danau Toba (Sumut) tanggal 18 Juni kepungkur, niwasake penumpang 3, dene sing ilang nganti 178.

* Merga nakoda kelangan weweka, atusan wong padha kelangan nyawa, pejabat Kemen-hub bisa kelangan jabatan.

***

GUBERNUR BI Perry Warjiyo nemenake, senajan utang RI meh ngancik Rp 5.000 trilyun, ning isih aman saka rasio produk domestik bruto (PDB).

* Aman produk domestik bruto, ning utang iku apait bruto-wali, mangka rakyat pengin mangan brutu.

***

BEDA karo dhek nyapres 2014, Prabowo saiki mbukak dompet “Galang Perjuangan”, rakyat nyumbang Rp 5.000,- Rp 10.000,- tetep ditampa.

* Ben sedikit suwe-suwe dadi bukit. Nek ngono apa Prabowo saiki wis pailit, apa pancen dhasare pelit?

***

MUDIK Lebaran 2018 klebu arus balik-e, akeh sing ngarani luwih becik. Kejaba ora akeh sing ke­betheng macet, korban tiwas KLL uga akeh sudane.

* Cuti bersama diakehi, tol du­rung siap dibukaki, pensiunan THR diwe­nehi, rakyat padha mbungahi.

***

EWA semono politisi Gerindra beda panemune. Habiburahman ngarani mudik neraka, lan Fadli Zon ngang-gep pamarentah gagal ngawekani macet.

* Jenenge kaum oposisi, kabeh dianggep ngganda trasi, sruwa-sruwi dicacat, wong mung pawitan cocot.

***

CHATTING mesum sing njalari Habib Rizik pimpinan FPI “ngungsi” ing Mekah, ngarepake Lebaran wingi perkarane di-SP3 (distop) dening Polri.

* Pemerintah luber aksamane, mang­sa Lebaran, kabeh dosane dilebur, tinimbang rakyat kaya dikebur.

***

TILAS timses-e Prabowo jroning Pilpres 2014, Ali Mochtar Ngabalin, saiki ditarik Kantor Staf Presiden, didadekake Jubir Istana.

* Gunemane Mochtar Ngabalin biyen sarwa nyebelin, saiki dienggo tameng Jokowi ngadhepi wong-wong sing nyebelin.

***

JRONING debat publik ngarepake Pilkada Serentak, Cagub Jatim Khofifah lan Gus Ipul basane pating pecothot rikala guneman Jawa.

* Kepala Daerah lali karo basa daerah, ning saiki wis lum­rah, ing ngendi-endi saya mblerah, ka­dhung salah kaprah.

***

PARTAI Demokrat ngrembugi Wapres Jusuf Kalla supaya bali Nyapres kanthi Cawapres AHY, nanging Jusuf Kalla mung nanggapi karo ngguyu

* Tiwas  diudi nganti mobat-mabit, yen jagone mung mateng dikarbit, nadyan nganti jimbit JK emoh sarimbit.

***

WEWATON info saka Anies Baswedan Gubernur DKI Jakarta, Prabowo ndakwa yen proyek LRT ing Palembang di mark up nganti 500 persen.

* Sing mbisiki gubernur Anies, Pra­bowo dadi sangsaya kritis, ning yen kurang patitis, bakale malah ngenthis.

***

GEMBONG teroris Aman Abdurrahman diukum pati, ewa semono dheweke suthik banding lan ma­lah njaluk enggal dieksekusi.

* Eman-eman, jenenge Aman kok malah nggarahi ora aman, nanging saka kandele iman, siap nampa abote paukuman.

***

WAGUB DKI Jakarta Sandiaga Uno disendhu Mendagri, amarga minangka wakile pemerintah pusat kok malah nggepuki Presiden Jokowi.

* Sandiaga ora sandeya, yen lagi main sandiwara, pejabat birokrasi ngrangkep politisi, wekasane akeh sing risi.

***

JRONING pameran keris Bulan Bakti Bung Karno ing Blitar, tinemu keris aran Kyai Sabuk Inten regane nganti Rp 3 milyar.

* Manut crita silat Jawa ka­wentar, keris kuwi duweke Mahesa Jenar, menawa payu telung milyar, sing duwe uripe bakal mayar.

***

RIKALA Mendagri ngangkat Komjen M. Iriawan minangka pejabat sementara Gubernur Jabar, partai-partai oposisi arep nggelar angket. 

* Urusan pejabat Gubernur Jabar, njalari akeh wong ora sabar, ngajap pemerintahan Jokowi-JK enggal bubar.

*** 

PERTAMINA bakal ngedol gas melon 3 Kg sing bebas subsidi, regane dipathok Rp 39.000,- lan tabunge digawe rupa jambon tuwa.

* Pertamina bakal bathi matikel-tikel, rakyat bisane mung mangkel, ning Presiden Jokowi apa penggalihe uga melu sekel?

***  (GTS)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan