Surabaya Geger
Diposting oleh : Administrator
Kategori: Banyumasan - Dibaca: 12 kali

Wengi kuwe, kebeneran regune Kaki Bawor sing tugas rondha, tekan gerdhu Pos Kamling, Kaki Bawor mandan kaget, anggota regune wis kumplit, ana Pak Priyanto sing pangsiunan PNS, mas Guru Tarno, Kebayan Dikin, Darman betor karo Yamun si bujang tuwa, agi padha dopokan rame pisan, Yamun gagehan nampani termos sing digawa Kaki Bawor, kangsung dithor nang gelas kanggo wong nem, karo wadul, “Surabaya geger kepati, Ramane.”

“Iya, inyong krungu,” saurane Kaki Bawor karo ngulungna tas kresek isi mendhoan ditampani Darman betor. “Dudu gegere wong ngoyak macan, ningen gegere teror bom bunuh dhiri.”

“Iya, bener. Sing bunuh dhiri wong sekeluarga, Bapake, Ibune karo anake papat pisan, Jan gendheng temenan. Mbokan wonge kuwe toli ya ngerti nek bunuh dhiri kuwe klebu temindak dosa dadi larangane agama,” ujare Darman Betor karo ngrewangi Yamun madhahi Mendhoan nang piring, terus disogna nang tengah sing padha jagongan.

Mas Guru Tarno, melu ngomong, “Bapake jenenge Dita Oeprianto, ibune jenenge Puji Kuswati, anake jenenge Yusuf Fadhil, Firman Halim, Fadhila karo Famela sing cilik dhewek. Yusuf karo Firman boncengan motor ngebom Gereja Santa Maria Tak Bercela tapi mung nang parkiran, Puji Kuswati karo anake loro sing cilik Fadhila karo Famela garepan ngebom nang GKI, tapi bisa dialang-alangi nang Satpam Yesaya Bayang, sidane ya mung njeblug nang plataran. Bareng Dita bapake,garepan mlebu nang Gereja Pusat Pantekosta Surabaya, nabrak petugas security karo mobile langsung bome njeblug. Korban tiwas kabeh ana wong telulas.”

“Seh, seh medeni temen yah. Wonge kuwe anu wis minger kiblate,” Kebayan Dikin nyelani, karo tangane nyomot mendhoan langsung dipangan karo nyigit lombok rawite.

“Iya bener kuwe,” pak Priyanto melu ngomong, “Ngendikane Menteri Agama Bapak Lukman Hakim Saifuddin, pelaku teror kuwe genah ora ngerti maring nilai-nilai agama. Mergane ora ana agama sing ngajarna temindak teror maring sapa bae.”

“Ketua Dewan Pertimbangan MUI Bapak Din Syamsuddin uga nyebutaken menawane tindakan pengeboman Gereja kuwe tindakan biadab, ora duwe peri Kamanungsan lan peri Ketuhanan. Njaluk supayane warga masyarakat tetep tenang, aja nganti nggandhengaken karo perkara agama,” ujare Kaki Bawor nambahi.

“Iya, bener Ramane. Presiden Bapak Jokowi uga ngendika Terorisme kuwe klebu tindak kejahatan tumrap kamanungsan, ora ana gandhengane karo agama. Mula dhawuh marimg Kapolri Jendral Polisi Bapak Tito Karnavian supayane ngusut tuntas kedadeyan teror kuwe. Uga supaya bisa mbongkar jaringan teroris sing didhalangi JAD – Jamaah Ansharut Daulah karo liya-liyane,” kandhane mas Guru Tarno njuran nyruput wedang kopine. 

“Sing genah dhewek kiye, sing kudu melu waspada lan ngati-ati, wong nyatane Dita karo leluargane sing jare nembe bali sekang Syria, manggon jl.Wisma Indhah blok J/22 Wonorejo, Rungkut nang lingkungan kono ya keton biasa-biasa bae, ora ngertiya malah dadi teroris,” ujare Pak Priyanto karo nyomot mendhoan sisan karo sigitane.

“Iya, bener pak Pri,” saurane Kaki Bawor kambi nyumed udude, njuran nerusaken gole ngomong, “Inyong kelingan maring Cak Ari Suroboyoan, jarene dhewek kiye kon siap-siap kate pasaan, Puasa Ramadhan, sing kudune siap-siap gawe ngamal karo ngibadah nang wulan sing kebek bonus barokah, malah ngarepaken wulan Ramadhan nang Surabaya bome njeblug. Kepriwe kabare Cak Ari? Muga waras slamet. Klilan.

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan