Pesawat Momot Logistik Ditembak Kelompok Separatis
Diposting oleh : Administrator
Kategori: Dredah Masalah - Dibaca: 13 kali

Trekah wengis ditindakake Kelompok Kriminal Separatis Bersenjata (KKSB) ing Kabupaten Nduga, Papua, Senin (25/6). Wong telu tiwas lan sing loro liyane nandhang tatu nemen ing sawijining serangan ing lala­dan Bandara Kenyam. Polri nyebutake se­rangan iku gegayutan karo pilgub ing kana. Minangka cathetan, pilgub dieloni pasangan calon loro, Lukas Enembe-Kle­men Tinal lan John Wempi-Habel Melkias Suwae.

Serangan separatis kasebut dumadi nalika jam 09.45 WIT. Sasaran wiwitan yaiku pesawat Trigana Air jinis Twin Otter. Pesawat mawa register PK-YRU iku mudhun ing Bandara Kenyam momot 15 anggota Brimob kang bakal nganakake pengamanan pilkada ing kana.

Manut Kepala Penerangan Kodam XVII/Cedrawasih Kolonel M.Aidi, sera­ngan iku ndadekake pilot Ahmad Abdillah Kamil nandhang tatu cukup nemen. “Pilot kena pecahan mimis ing perangan ge­ger lan sirah sisih mburi,” jlentrehe na­li­ka dihubungi.

Serangan iku banjur diwales Brimob lan anggota TNI saka Yonif 755/Yalet sing jaga ing wewengkon bandara. Kelompok separatis banjur mlayu mlebu kampung sa­cedhake bandara. “Sinambi nylamet­ake awak, KKSB iku uga mateni warga sipil telu, uga ndadekake sawijining bo­cah cilik nandhang tatu nemen,” jlentrehe Aidi.

Adhedhasar akon-akonane warga ngenggon, tambahe Aidi, kelompok se­paratis iku cacahe ana wong 16. Dhe­weke nggawa bedhil lop dawa enem jinis AK 47, FN FNC loro, pistol loro, sarta sakehing panah, tumbak, klewang, lan pe­dhang. “Dheweke meksa masyarakat metu ngomah,” ujare Aidi.

Banjur, dheweke ngumpulake warga neneka wolu. Klebu warga sipil telu kang tinemokake mati. Yaiku, pasangan sajo­dho Margaretha Pali-Hendrik Sattu Kola lan Zainal Abidin.

Manut Aidi, Margaretha Pali dibedhil ing perangan sirah nalika ngrangkul pu­trane, Arjuna Kola. Ing lengene tengen uga ana tatu ketaman barang landhep. Sawatara iku, Hendrik dibedhil ing pera­ngan weteng. “Sikil tengene perangan gaers uga kena klewang,” ujare Aidi.

Ndeleng tumindake KKSB kasebut, tambahe Aidi, warga neneka lima liyane kang uga dikumpulake mbudidaya mlayu. Emane, Zainal Abidin nemahi nasib apes. Dheweke dibedhil ing perangan igane engga mati. Sawatara iku, Arjuna Kola sing nekseni ibu lan bapake dibedhil KK SB nandhang tatu ing perangan rai mer­ga disabet klewang. “Ing sirahe pilingan sisih kiwa meh nganti tekan irung,” tan­dhese.

Sekabehane kurban dievakuasi ba­reng karo petugas pesawat sing dibedhili KKSB menyang Timika.

Kedadeyan iku dumadi kacek patang ndina sawise KKSB mbedhili pesawat duweke Dimonim Air ing bandara kono. Kahanan sing ora aman iki kang ndadek­ake anggota Brimob ditambah.

Katrangan sauntara kang diduweni Kodam XVII/Cenderawasih, separatis kang nindakake trekah ing Nduga wingi kuwi mujudake kelompok kang dipimpin Egunius Kogoya. Dheweke kabeh pancen nate ngrampas senjatane petugas. Uga, kesangkud mbedhil almarhum Vicko Son­­dakh kang mati nalika melu ngleksa­nak­ake pembangunan dalan trans-Papua.

Keterangan kang padha uga diprate­lakake Kapolri Jenderal Tito Karnavian, KKSB sing nindakake trekah ing Nduga dudu kelompok anyar. “Dhaerah Kenyam iku cilik. Dadi, kelompoke ya iku-iku wae,” ujare Tito.

Ing kalodhangan iki Tito uga nam­bahake yen kelompok bersenjata ing Ndu­ga pancen wis suwe ana. “Kelompok iki nate nyandra uwong ing kedadeyan Mapenduma,” jlentrehe.

“Kerep banget uga dimanfaatake uta­wa melu manfaatake kahanan pilkada,” tambahe.

Manut Tito, wis ana anggota TNI lan Polri 114 sing nindakake tugas ing Ndu­ga. Nanging, merga kahanane ora aman, petugas Brimob bakal ditambah. Iku ditindakake kanggo mesthekake pilkada lumaku samesthine. Sebab, kelompok se­paratis kulinane ngeden-deni masya­ra­kat kanggo milih pasangan tinamtu. Tito mesthekake jajarane bareng karo TNI ora bakal mundur ngadhepi ancam­an kaya ngono kuwi. “Wis dakkandhak­ake marang Pak Kapolda (Papua), yen kurang (pasukan), kita tambah maneh,” tandhese Tito. “Kita ora oleh kalah karo kelompok-kelompok bersenjata sing ana ing kono,” tambahe. (Tim)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan