Ora mung kanggo nyamikan, Tela Pohung Uga Bisa Kanggo Tamba Rematik
Diposting oleh : Administrator
Kategori: Kasarasan - Dibaca: 93 kali

Taun 60-an biyen rikala larang-larange pangan, sing jeneng tela pohung dadi moncer. Awit nalika iku akeh wong mbutuhake kanggo dimasak minangka gantine beras. Dibakar ya enak, apamaneh yen didang, didhahar anget-anget wis jan nyamleng tenan. Glepung gapleke bisa kanggo bahan thiwul lan maneka warna jinis olahan. Malah jarene pinisepuh roti ganjel rel kang kondhang saka Semarang, rasane luwih nges yen bahane digawe saka glepung gaplek tinimbang saiki sing digawe saka glepung gandum.

Tela pohung (manihot Esculenta, crautz) kang ing negara Inggris katelah Cassava pancen akeh jinise. Ana kang gagang godhonge werna putih, kuning, ijo, lan abang. Ing tlatah padesan jeneng pohung jinten sing daginge putih memplak lan yen digodhog utawa digoreng rasane enak lan mempur, akeh sing mbudidayakake. Uga tela mukibat kang blasteran saka tela pohung lan tela karet bisa ngasilake jinis tela pohung kang woh-e gedhe-gedhe (jinis unggul).

Kejaba kanggo jagan pangan, pranyata ing jagading kasarasan, tela pohung uga nduweni mupangat kang gedhe. Maneka lelara kayadene rematik, mriyang, lara sirah, nganti murus (diare) lan cacingen (tumrap bocah-bocah) bisa diusadani nganggo tetuwuhan tela pohung.

 

Kanggo tamba

Manut panaliten, kandhutan kimia ing tela pohung tinemu kalori 146 kal, protein 1,2 gram, lemak 0,3 gram, hidrat arang 34,7 gram, kalsium 33 mg, fosfor 40 mg, lan zat besi 0,7 mg, iku per-100 gram tela pohung.

Ing tela pohung uga tinemu kandhutan vit. B1-0,06 mg, lan vit.C 30 mg. Ing godhonge tinemu vit.A 11.000 SI, vit.C 275 mg, kalsium 165 mg, kalori 73 kal, fosfor 54 mg, protein 6,8 gram, lemak 1,2 gram, lan zat besi 2 mg. Mula kang nandhang lara asam urat diprayogakake dhahar godhong tela pohung kanthi dikulup apadene dijangan.

Kanggo sing nandhang lara rematik, bisa mundhut wit tela pohung rong potong (ukuran sakkilan). Digodhog nganggo banyu 3 gelas nganti kari rong gelas. Sawise disaring bisa kaunjuk sagelas esuk lan sagelas sore. Bisa diambali 5-7 dina. Utawa kanthi mundhut 4-5 papah godhong tela, nuli didheplok alus lan ditambahi uyah sethithik, banjur kanggo bobok ing ros-rosan sing krasa lara.

Kanggo bayi sing murus, bisa kanthi nggodhog 5-6 papah godhong tela po­-hung nganggo banyu 4 gelas. Sawise umob lan kari rong gelas, diombekake. Kanggone bayi sing isih nusu sing ngunjuk ibune wayah esuk sagelas, lan sorene uga sagelas. Yen dirasa ora ana asile, diprayogakake enggal menyang Puskesmas utawa Rumah Sakit.

Kanggo ngusadani sing lagi nan­dhang lara sirah (puyeng) bisa mun­dhut gagang godhong tela pohung sing isih enom lan wit-e (uga sing isih enom) watara sagegeman. Sawise dikumbah resik banjur didheplok alus

lan ditambahi bawang sasiyung lan uyah

sethithik, banjur disaring lan diunjuk yen arep sare. Cara iki bisa diambali 3-4 dina nganti puyenge krasa ilang.

Pranyata tela pohung uga bisa kanggo ngusadani kulit kang kena barang panas utawa kesiram jarang. Carane, mundhut tela pohung watara saktengkel. Sawise dioncek lan dikumbah resik nuli diparut, banjur diperes dijupuk banyune. Dienteni nganti bayu peresan mau malih dadi pathi. Nuli disalepake menyang pang­-gonan sing kena barang panas, banjur ditutp kain kasa. Pathi kasebut bisa diolesake wayah esuk lan sore sawise siram. Nuwun. (FX.Suyatno)

Berita Terkait

img

Samak Minggu Ini

img

img

Sumber Semangat

Aja gumedhe mung merga ayu-ne rupa, amarga kuwi bakal luntur dening wektu. Nanging elinga, ayune kridha ora bakal luntur senajan digawa mati pisan...

Klik

NGANTUK

Ora kober ndlosor, semendhe ing tembok uga ora apa-apa. Mangkono mbokmenawa ujare si meong iki. (d/sit)***

Pethilan

Trilyunan rupiah dhuwit negara mili menyang desa

Koruptore aja nganti katut keli

Lumantar gerakan #2019Pilpres Ceria, Mahfud MD ngajak publik milih kanthi cerdas

Amarga kecerdasan kita wis saya ilang akibat memusuhan

Golkar ngukuhi caleg mantan koruptor

Ngajab para pemilihe padha pikun!