Nyegah Terorisme
Diposting oleh : Administrator
Kategori: Banyumasan - Dibaca: 18 kali

Mudhun kang mesjid bar tarweh, jane durung wengi, ninge Kaki Bawor pancen  nguja garep niliki Gerdhu Siskamling, ora ngerti gole mlaku ditutna mas Guru Tarno nang mburine. Bareng tekan ngarep Gerdhu, terusan cluluk, “Ramane, garepan kondur dhisit, apa langsung rondha?”

“Eh, Gurune. Ujar inyong sapa, ket mau gole ngetutaken yah?” takone Kaki Bawor mandan kaget. Mas Guru Tarno manthuk ngiyani, “Ya ket mudhun sekang mesjid mau. Kayonge wis padha teka kabeh lhuh, kae termos kopine ya wis nang kono. Ndean wis dicangking Yamun sisan mau. Langsung rondha baen, jagongan dopokan nang gerdhu, kondur mbaleni apa lah...”

“Iya, mayuh,” saurane Kaki Bawor cekak, njuran ngunclug marani maring Gerdhu, ditutaken mas Guru Tarno.

“Uh, pacitane lawuh medang kumplit temen kuwe, ana srudhut, lemet, tahu brontak, randha royal, gedhang goreng, weh, weh, mulane gasik temen gole padha teka,” Kaki Bawor gole ngomong karo gedheg-gedheg. Sing semaur Darman Betor, “Iya, anu dijujugi Bu Priyanto miki, Ramane. Jare sisan nggawekaken tajilan nggo jaburan bocahan nang mushola mau.”

“O, iya. Kesuwun, Pak Pri. Aturna ibune kon mandan sering, ben sing rondha padha sregep mangkat he..he...,” kandhane Kaki Bawor njuran melu jagongan. 

“Eh, iya Ramane, jebulane sing dadi korban teror ndhing wingi kae, anu akeh je,” kandhane mas Guru Tarno, ujug–ujug nyelani  ngomong. “Sing tiwas ana wong 32, dadi ora mung wong 13 thok. Nang Mako Brimob Depok wong 7, nang greja 3 Surabaya wong 18, Rusun Wonocolo ana wong 3. Nang Mapolresta Surabaya ana wong 4, njuran sing tatu-tatu ana wong 58.”

“Uh, akeh temen yah? Wong garep bunuh dhiri, mbok iyaa ora usah nggawa–gawa wong liya. Kaya kuwe toli melasi wong liya sing dadi korban,” ujare Yamun karo nyomot randha royal langsung dipangan, telep baen.

“Jenenge be teroris, utege ora gadhangan mikir bener, wong maring anake dhewek be tegel kon melu ngebom bunuh dhiri, apa maning maring wong liya,” ujare Darman Betor karo  nithili tahu brontak.

“Jane apike, nek bisa dicegah sadurunge, ben aja ngasi kedadeyan sing marakaken ana korban,” ujare Kebayan Dikin karo ndamoni wedang kopine.

“Iya, bener. Ningen wingi–wingi aparat keamanan isih kewuhan, mergane durung duwe payung hukum sing mantep,” kandhane Pak Pri­­yanto, karo mangan gedhang gorenge dhisit, nembe nerusaken, “Ningen saiki kudune wis luwih mantep, mergane nalikane tanggal 25 Mei 2018  wingi DPR wis ngesahaken Undang-Undang Antiterorisme.”

“Iya, bener Pak Pri,” ujare mas Guru Tarno, karo nyruput wedang kopine, njuran nerusaken gole ngomong. “Ngendikane Menkumham Bapak Yasonna Laoly ngersakaken para Aparat Penegak hukum bisa nggunakaken Undang-Undang Antiterorisme supayane ngutamakaken tindak pencegahan anane terorisme. Lha, nang Undang-undang kuwe uga ana aturan perlindungan kanggo para korban, yakuwe hak bantuan medis, rehabiltasi, santunan, konpensasi, minangka wujude tanggung jawab Negara maring sing dadi korban.” Kaki Bawor njuran melu ngomong, “Sing genah saiki tugas kewajibane dhewek, njaga lingkungane, kudu sing waspada lan ngati-ati, utamane nek ana wong anyar sing nyurigani, kudu enggal lapor maring sing kawogan, aja nganti kebobolan.” Klilan.

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan