Bingung Gole Mudhik
Diposting oleh : Administrator
Kategori: Banyumasan - Dibaca: 18 kali

Mbekayu Tebok agi ketungkul utheg masak nang Dapur, nalikane Kaki Bawor mlebu nang umah pawon. “Tebok, bojomu agi maring endi? Wis mangkat meng stasiun apa durung? Tek enteni, jare garep nakokaken karcis sepur, nggo inyong,”  takone Kaki Bawor, karo mapan njagong nang dhingklik.

“Karcise sepur sing jurusan maring ngetan wis entong Ramane, jaman canggih kaya siki kiye, takon karcis sepur, cukup mbukak internet nganggo HP, dadi ora perlu maring stasiun. Miki Ramane Colot wis njaluk tulung maring kang Yamun kon nggoletaken karcis trevel utawane bis,” ujare mbekayu Tebok, nggenahaken.

“Kiye dadine gole garepan mudhik, inyong ngenteni kabar sekang Yamun, olih apa orane karcis nggo mlaku, yah? Apa Yamun mesthi  ngeneh, Bok?” takone Kaki Bawor penasaran.

“Iya, kudu ngeneh, wong saguh garep nggawakaken iwak pitik sing garepan nggo gawe opor. Kan kudu dimasak saiki, nggo lawuh kupate ben bisa nggo padha sarapan ngesuk-esuk sadurunge sholat Ied,” kandhane mbekayu Tebok, karo ndeleng maring njaba, “O, lha kae wonge teka, Kang Yamun ngeneh maring pawon baen, kiye Ramane agi nang kene.”

Yamun sing nembe teka karo nyangking tas kresek isi iwak pitik, langsung ngunclug mlebu umah pawon, karo ngomong, “Mbekayu Tebok, kiye pitike wis diresiki sisan, mung durung ditugeli, nyah,” karo ngulungaken tas kreseke, njuran di tampani mbekayu Tebok, “Iya, kesuwun. Mengko tek cacahane dhewek. Kuwe rika selekan dienteni Ramane.”

“Kepriwe Mun, genahe inyong garepan teyeng mudhik apa ora?” Takone Kaki Bawor karo nggered kursi nggo jagong sing ana nang sandhing meja umah pawon.

“Alhamdulillah, Ramane,” saurane Yamun karo mapan njagong nang kursi ngarepane Kaki Bawor, “Olih karcis trevel, jan mung gari siji- sijine, mangkate ngesuk sore jam pitu. Lha, karcis sing nggo baline wis ura uman. Priwe?” kandhane Yamun kambi ngulungaken karcis travel karo dhuwit jujulane,

“Iya, wis. Kesuwun. Perkara baline ben dipikir ngesuk nang kana. Wong jare batire Penjol ana sing dadi Karyawan PT.KAI nang setasiun Kroya, mbokan bisa nggoletaken karscis batalan,” saurane Kaki Bawor kambi nampani Karcis karo dhuwite.

“Jane anu garepan ana acara apa koh, Ramane? Kayonge koh kudu kemudu mangkat mudhik?” takone Yamun kepengin ngerti.

“Jane inyong ya bebeh, lunga-unga mangsan badan kaya kiye. Sing genah dalane mesthi sesek rapet tur ya akeh macete. Ninge kepriwe maning, wong inyong rikuh karo kanca batir warga PNC- Paguyuban Ngapak Cilacap. Agi kae inyong dikabari mas Seno Hadi Ketuane PNC, menawa warga PNC garep nganakaken Silaturahmi nang dina Setu Tanggal 16 Juni 2018, badan dina kepindho, ya dina ngemben kuwe, nang Karangbawang Kawunganten. Maune gole ngo­mong nek bisa inyong kon mangkat. Kuwe nek bisa. Mulane inyong ayem bae. Ninge pintere Mas Seno, bola bali melingna maring sapa baen sing ngerti maring inyong. Marakaken inyong dadi ora kepenak, nek ora mangkat mudhik. Kejabane kuwe, Kaki Darsono dhengkote ebeg Bantarsari ya bola-bali tilpun supayane inyong mang­kat, mergane diarep-arep kanca batir sing padha kepengin ketemu -kangenan,” kandhane Kaki Bawor nggenahaken. Klilan.

 

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan