Saperangan kampus ketaman paham radikalisme
Diposting oleh : Administrator
Kategori: Dredah Masalah - Dibaca: 19 kali

Pepeling saka Bandan Nasional Penanggulangan Terorisme (BNPT) yen saperangan kampus ketaman paham radikalisme kudu antuk kawigaten mirunggan. Panangkepe pawongan kang dinuga teroris ing njero kampus Universitas Riau (Unri) Sabtu (2/6) kepungkur dening Densus 88 Antiteror dadi bukti masalah iku. Malah, ora mung ketaman, ing Unri bom iku malah digawe ing njero kampus.

Ing patemonane karo wartawan ing Mabes Polri mentas iki, disebutake yen siji ing antarane wong telu sing diamanake ing Unri saiki dadi tersangka kasus terorisme. Dheweke iki yaiku M.Mur Zamzam. Loro liyane isih dadi saksi. Bareng karo Nur Zamzam, uga diamanake bom pipa telu, granat tangan rakitan, lan sakehing bahan peledhak.

Kepala Biro Penerangan Masyarakat Divhumas Polri Brigjen Mohammad Iqbal nerangake, kawiyake kegiyatan terorisme ing Unri nuduhake fakta anyar. Yaiku, bom ditemokake ing gelanggang mahasiswa Fakultas Ilmu Sosial dan Ilmu Politik (FISIP) Unri jalaran pancen ing kana anggone ngrakit lan nggawene bom.

“Dheweke kabeh pancen milih lingkungan kampus jalaran manut dheweke aman. Sing kapindho, dheweke gampang ngrakit jalaran ana saperangan bubuk sing dijupuk saka laboratorium,” jlentrehe Iqbal.

Pulisi mratelakake, bahan peledhag sing diamanake jinis triacetone triperoxide (TATP). Iku padha karo bahan peledhag kang digunakake ing rerangkene bom bunuh dhiri ing Surabaya dhek Mei kepungkur.

Sawatara iku, Kadivhumas Polri Irjen Setyo Wasisto nambahake, Nur Zamzam rencanane arep ngebom gedhong DPR RI lan DPRD. “Nanging, kasil dialang-alangi Densus 88 Antiteror,” kandhane.

Zamzam dinuga ngrakit dhewe bom kasebut. Dheweke bisa gawe bom menawa wae sinau otodidak. Ing olah TKP, uga tinemokake sakehing buku kang macat cara-carane gawe bom lan ranjau. Mesisan tahan urip ing alam.

“Dheweke uga dinuga nindakake penyebaran informasi ngenani cara-carane gawe bom liwat Telegram, lsp. Ana sawijining Telegram kang dieloni,” jlentrehe Setyo.

Nur Zamzam dinuga ana gayutane karo kelompok Jamaah Ansharut Daulah (JAD), mligine kelompok Batty Bagus Nugraha alias Kholid. Kholid tiwas ing panangkepan kelompok JAD ing Bekasi sasi kepungkur. “Dheweke uga ngakoni, nalika nyerang Polda Riau, durjanane pesen bom marang Zamzam,” ujare.

Zamzam mujudake lulusan Unri. Setyo nerangake, saiki dianakake  panaliten mbokmanawa ana wong liya sing nyumurupi carane ngrakit bom kang ditindakake Zamzam.

Zamzam pancen lulusan Unri, saksi langsung penggerebegan Sahadatul Chandra (20), mbenerake. Nalika pulisi mawa senjata lengkap nindakake penggerebegan, dheweke lagi ana ing gelanggang mahasiswa.

Pengurus dinas pengabdian masyarakat sing njabat ing sekretariat FISIP iku ngandhakake ora ngira marang salah sawijining pawongan kang dinuga teroris jeneng cekakane K kang ditangkep Densus 88.

“Aku kabeh ora ngira yen dheweke kesangkut. Jalaran dheweke iku wong apik marang mahasiswa,” kandhane Chandra marang wartawan.

Saben dinane Zamzam golek panguripan kanthi dodolan ndhg gulung marang mahasiswa ing kana. Sasuwene sasi Ramadhan, becik nalika buka apadene saur, dheweke tansah ngiderake lan tawa-tawa endhog gulung marang mahasiswa Unri.

 

Kuciwa

Menteri Agama Lukman Hakim Saifuddin kuciwa klawan anane teroris ing kampus Unri. Dheweke nyebutake bab iku gawe rusake kampus minangka panggonan kanggo ngayahi tridarma perguruan tinggi. Yaiku, pendhidhikan, penelitian, lan pengabdian masyarakat. Mula iku Lukman ngajap marang para rektor kampus, utamane perguruan tinggi keagamaan Islam negeri (PTKIN) kang kabawah ing lembaga kang dipimpin, supaya mesthekake paham radikal lan terorisme ora mlebu. “Rektor kudu temen-temen mudhun kanggo njaga lan mesthekake yen saben pojok laladan civitas academica bebas lan resik saka unsur terorisme,” ujare Lukman ing Jalarta, Minggu (3/6) mentas iki.

Ewasamana, manut Lukman, kebebasan akademik kampus kudu tetep lan terus dijaga. Nanging, kampus uga ora oleh diregedi tumindak terorisme. “Kebebasan kampus babar blas ora ateges bebas nindakake upaya terorisme,” tandhese.

Dirjen Pembelajaran dan Kemahasiswaan (Belmawa) Kemenristekdikti Intan Ahmad nelakake rasa pangrasane marang Polri lan Densus 88 kang nemokake lan nggagalake upaya terorisme nganggo bom. Kanggo sawatara, manut Intan, durung ana tumindak mligi tumrap Unri. Pihake isih ngenteni panalitiyane Polri. “Kita enteni,” kandhane Intan.

Intan ngajap pengamanan kampus kudu ditingkatake lan monitoring seka-behing kegiyatan.”Perlu uga awareness marang warga kampus ngenani bebayane radikalisme. Jlentrehe.

Rektor UIN Raden Fatah Palembang Sirozi ngelikake supaya ora ana tan-dha-tandha klalen, apamaneh kesang-kude pawongan lan utawa lembaga kampus ing gerakan terorisme. Sebab, akibate bakal ngrusak banget lan gawe kapitunane kabeh pehak.

“Pihak perguruan tinggi (PT), klebu PTKI, perlu mbudidaya sarosane kanggo nyegah anane terorisme, sanajan mung saderma omong-omongan,” ujare.

Sirozi nandhesake wigatine usaha lan cecaketan pimpinan PTKI supaya mahasiswa tetep ing dalan kang bener lan ora kegodha glembuk aluse para teroris. Rozi nyebutake, ana sakehing tumindak kang bisa ditindakake kanggo nyegah terorisme ing kampus.

Salah siji sing wigati yaiku standard operating procedure (SOP) kang bisa mesthekake yen kabeh kegiyatan mahasiswa ing njero kampus bisa diawat-awati lan dikendhaleni. Pendhampingan lan pengawasan uga kudu ditindakake marang kegiyatan mahasiswa. Iku mujudake tugase rektor lan wakil dekan III kanggo awor bareng mahasiswa. Sinambi ngawat-awati. (Tim)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan