Minal Aidin Wal Fa’izin
Diposting oleh : Administrator
Kategori: Pangudarasa - Dibaca: 20 kali

Bada (Iedul Fitri), salah sijiné hari besar Islam, yaiku sawisé ummat Islam lulus saka ujian (pandhadharan) pindha jabang Tutuka mentas saka kawah Can­dradimuka, wujud ibadah siyam sewulan muput, meper hawa nepsu, ing dina rahina ora dhahar, ngunjuk lan se­sambungan sexual. Kegiyatané awan bengi mung ngibadah, tadaraus, sholat Tarawih, njaga talingan, soca lan tutuk sa­ka tumindak dudu. Insya-Allah ummat Islam nampa gan­jaran lan pangaksama saka Gusti Allah Kang Maha Asih, ba­li resik tanpa dosa tanprabéda jabang bayi sing lagi mijil saka guwa garbané sang biyung.

Tanggal 1 Syawal, mbayar zakat fitrah. Sawisé sholat Su­buh, ngunjuk banyu putih sak clegukan, kakung putri tindak menyang masjid / lapangan, sholat Ied barjamaah. Yèn ing tanah Arab, panggonané Islam tumurun, acara Iedul Fitri wis rampung. Kabèh masyarakat bisa aktifitas kaya biyasané. Nanging ing Indonesia, pesta gedhé lebaran gék diwiwiti. Najan ora ana conto saka Rasulullah, nanging iki dudu acara ibadah agama, mung tradhisi sing sejalan lan ora lelawanan karo ajaran Islam : slaturahim karo para sedulur, mitra rowang lan sapa waé, sesalaman, apura ingapura, nglebur dosa setaun kepungkur.

Ya acara anjangsana lan silaturahim iki sing déning wong manca sok diarani rada kebablasen, lumrahé padha nyan­dhang luwih apik, mangan luwih énak, ngiras pantes ma­mèraké kesuksesané olèhé makarya –utamané para urban-, mudhik, pulang kampong, dadi reuni lan obrol-obrolan lsp. Mulihé sok banjur nggawa seduluré mèlu urban me­nyang kutha. Kanggo ngawékani blanja sing mundhak ing lebaran iki, pemerintah nyedhiyakaké dana 35,76 T mligi kanggo THR, gaji ke 13 marang karyawan lan pensiunan ASN, anggota Polri lan prajurit TNI. Dibandhingaké taun kepungkur, tambahan taun iki mèh 68,9 %. Rinciané, gaji 5,24 T, tunjangan kinerja 5,29 T, THR pensiunan 6,85 T gaji ke 13 : 5,24 T tunjangan kinerja ke 13 : 5,75 T.

Senajan manut pemerintah alokasi anggaran bab iki wis ditetepaké APBD 2018, ateges wis dibahas lan disarujuki DPR (ora ujug-ujug), nanging gandhèng karo kahanan taun politik, wis lumrah yèn bab iki bermuatan politik. Sing genah reregan barang bakal mumbul ndedel. Kanggoné warga masyarakat sing ora nampa THR lan gaji ke 13 mung bisa sambat ngaru-ara lan ngencengaké sabuk sinambi ndonga muga-muga pemerintah kasil njaga kelancaran pasokan logistik saéngga mundhaké regané mung sithik.

Pemerintah uga mengantisipasi kanthi kerja keras nyi­apaké sarana lalu-lintas mudhik kaya dalan tol, angkutan umum lsp. Taun iki 759 km dalan tol Merak- Pasuruan bisa digunakaké. Rinciané, 524 km tol beroperasi komersial lan 235 km digunakaké mligi kanggo mudhik. Sabeneré ora mung dalan tol sing bisa diliwati, nanging uga ana dalan pantura, jalur tengah lan jalur pansela yaiku dalan menyusur pesisir kidul. Najan rada luwih adoh, nanging dalané sing ménggak-ménggok lan panoramané éndah, sinambi piknik liwat pesisir. Mudhik pancèn ora mligi masalah infrastruktur lan managemen lalu-lintas thok. Kebaké kendharaan, ke­macetan, bisa kedadéyan merga gunggung kendharaan sing liwat tikel-matikel tinimbang kapasitas dalané. Éwa semono faktor peri laku pengendhara uga kudu digatèkaké. Akèh masalah kaya bahan bakar, kesiapan kendharaan kuduné bisa diantisipasi luwih dhisik. Uga pakulinan ngebut, nyrobot, parkir sembarangan, saya nambahi ruweté kahanan ing dalan.

Mesthi waé kita ngajap, keslametan perjalanan, saya sudané kacilakan, luwih sabar lan dhisipliné pengendhara, acara mudhik dadi suksès lan nyenengaké. Muga-muga ki­ta padha suksès lan slamet, acara badan silaturahim lan ngraketaké seduluran ora nemu alangan. Bada  klakon tanpa sambékala, bar bada bali makarya kanthi semangat anyar, dingapura dosa-dosa lan keluputané, suci jiwa ragané. Ma­rang para sutresna kabèh, kita ngaturaké : Taqoballallohu minna wa minkum. Minal ‘Aidin wal Fa’idzin. Nyuwun pangaksama lair batin. (MW)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan