THR - Gawe Bombong
Diposting oleh : Administrator
Kategori: Banyumasan - Dibaca: 18 kali

Nang warunge Kaki Narso sing manggon nang pinggir gili gedhe, Kaki Bawor, Darman Betor, Yamun si bujang tuwa padha jagongan karo medang, nyambi dopokan. Maune ya ora genah sing dirembug, ninge suwe-suwe tekan gole padha ngarepaken badanan. Sing ngawiti Darman Betor, “Sing genah ayem toli para PNS, anggota Polri, TNI, Pangsiunan, garepan badan kaya kiye, padha olih THR sekang Pemerintah, karo Yamun adhi lanang kiye ya melu nampa, malah luwih akeh ndean, wong karyawan  swasta. Bareng inyong, nek betore ora ngglindhing, bisa pawone ngguling.”

“His, aja kaya kuwe. Kabeh–kabeh kudu disyukuri,” ujare Kaki Bawor ngandhani Darman, “Bener kowe ora olih THR sekang Pemerintah, ninge kowe toli kesawaban. Jajal dipikir, wingi-wingi penumpangmu sepi, ninge bareng akeh wong sing nampa THR, penumpangmu dadi rame. Akeh wong nunggang betormu njaluk dijujugaken blanja maring pasar.”

“Iya, bener Kang Bawor,” Kaki Narso melu ngomong. “Inyong be melu kesawaban. Akeh sing padha njajan maring ngeneh, mergane duwe dhuwit nembe padha olih THR. Contone Yamun kiye, wis suwe ora tau mampir ngeneh, bareng bar nampa THR duwe dhuwit, nembe siki mampir he..he...”

“Ih, Kaki Narso, bisa temen gole ngomong. Inyong gole ora ngeneh patang dina, diomongna suwe. Anu wingi dhong sibuk, Kaki Narso. Siki gole ngeneh ya mergane ora nembe nampa THR, nek perlu gole medang kiye, utang gisit..he..he... THRe inyong wis tekkirimaken maring ndesa, ben nggo badan biyunge,” kandhane Yamun guyon, karo nginum wedange.

“O, apa kowe ora garepan mudhik, bali ndesa Mun?” takone Kaki Bawor.

“Ora lah. Mudhik kuwe mumet nek dhuwite mung sethithik, Ramane,” saurane Yamun, karo nyomot mendhoan, dioser-oserna maring layah sambel kecap, nembe diemplok, rasane kayong nyamleng nylekamin temenan.

“Iya, bener. Lha, kuwe Man, sing nang desa ya melu kesawaban THR. Biyunge Yamun teyeng melu seneng, senajan Yamun ora bali,” ujare Kaki Bawor karo nyomot mendhoan, melu-melu Yamun. Ujug-ujug mak bedhengus, Pak Priyanto njedhul, njuran srog njagong nang jejere Kaki Bawor, terus cluluk, “Lha, si apa, temenan, inyong mbatin, Darman mesthi agi nang kene.”

“O, Pak Priyanto nggoleti Darman yah? Darman angger wayah  mene nek ora agi narik, ya mesthi nongkrong dopokan nang kene, pak Pri,” ujare Kaki Narso nggenahaken, “Garepan ngunjuk apa, Pak Pri?”

“Eh, es teh, bae. Ngonggor kiye koh,” saurane Pak Priyanto, njuran langsung ngomong maring Darman, “Anu Man, tulung mengko ibune dijujugaken maring pasar, njikot blanjan. Teyeng mbokan?” Darman gagehan nyauri, “Siap, Pak Pri.”

“Eh, kayonge mau Pak Pri tindak boncengan karo ibune,” takone Kaki Bawor.

“Genah koh Kang Bawor, mangkat maring pasar, njujugaken ibune. Ninge bareng bali kayong repot gole nggawa blanjane. Dadine ditinggal bali dhisit. Ben mengko dibaleni ibune  supayane dijujugaken Darman baen maring pasar,” ujare Pak Priyanto nggenahaken, karo nampani gelas es teh sekang tangane Kaki Narso. Klilan

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan