Andika lan Anniesa Bakal Urip Nganti Tuwa ing Njero Kunjara
Diposting oleh : Administrator
Kategori: Dredah Masalah - Dibaca: 15 kali

Andika Surachman lan Anniesa Hasibuan bakal urip nganti tuwa ing njero kunjara. Rebo (30/5) kepungkur, majelis hakim Pe­ngadilan Negeri (PN) Kota Depok nibak­ake ukuman paling dhuwur marang pa­sangan bebojowan bos First Travel iki. Andika ditibani ukuman kunjara 20 taun, dene Anniesa kunjara 18 taun.

Andika lan Anniesa dinyatakake luput jalaran nindakake tindak pidana apus-apus jamaah umrah First Travel lan tin­dak pidana pencucian uang (TPPU). Ma­jelis hakim kang ditetuwani Sobandi uga nibakake dhendha 10 miliyar subsider setaun patang sasi. Vonis iku padha plek karo tuntutane jaksa.

Adine Anniesa, Kiki Hasibuan alias Siti Nuraidah sing melu ngrasakake nikmate dhuwit apus-apus, uga diganjar abot: kunjara 15 taun. Kiki uga diwajibake mba­yar dhendha kehe Rp 5 miliyar sub­sider kurungan 8 sasi.

“Kadakwa divonis slaras karo pasal 378 KUHP juncto pasal 55 ayat (1) ke-1 KUHP juncto pasal 64 ayat (1) KUHP lan pasal 3 Undang-Undang Nomer 8 Taun 2010 ngenani Pencegahan dan Pembe­rantasan Tindak Pidana Pencucian Uang,” kandhane hakim Sobandi.

Vonis 20 taun kanggo Andika lan 18 taun tumrap Anniesa iku adoh luwih abot tinimbang vonis kanggo Setya Novanto ing kasus korupsi e-KTP. 

Diwartakake sadurunge, tilas ketua umum Partai Golkar kasebut divonis kunjara 15 taun. Minangka cathetan, Set­nov-paraban akrabe Setya Novanto- sing disebut nampa iline dhana luwih saka Rp 400 miliyar ing kasus korupsi e-KTP ora ngajokake bandhing. Mban­dhingake karo Setnov, dhuwit sing ditilep Andika-Anniesa pancen luwih akeh. Saka calon jamaah sing kehe 63.310 sing diapusi, kapitunan kang dituwuhake luwih saka Rp 905 miliyar. Praupane Andika lan Anniesa sajak biyasa-biyasa wae nalika ngrungokake vonise hakim, dina iku. Beda karo nalika sidhang tuntutan sa­durunge, Anniesa tansah ngguguk.

Ing tetimbangane, majelis hakim nyebut Andika, Anniesa, lan Kiki nya­lahgunakake dhuwite jamaah umrah First Travel. Sobandi nerangake, para kadakwa kabukten nransfer, mindhah, mblanjakake, mbayarake, hibahake, ni­tipake, nggawa menyang manca, ngo­wahi wujud, sarta ngijolake dhuwit lan surat berharga sarta nindakake trekah liyane.

Sawatara iku, Wiranda, pengacarane Andika lan Anniesa, nulak vonise majelis hakim. Pehake bakal rembugan karo klien-e kanggo nemtokake upaya hukum apa kang ditindakake sabanjure. “Nge­nani vonis sing diwacakake hakim, aku sih ngomong wawasan klien. Saka wa­wasanku minangka pengacara, aku pri­badi nulak,” ujare.

Apa ngajokake bandhing apa ora, keputusan bakal diwenehake sawatara dina mengarep. Salah siji alesan kang ndadekake upaya bandhing yaiku pe­manfaatan aset kang bisa digunakake kanggo mbudhalake jamaah.

“Ngenani aset rak uga tetimbangan saka aku sakanca. Pangajapku sakanca, aset-aset kang diduweni First Travel digunakake kanggo kepentingan ja­maah. Kanggo mbudhalake jamaah utawa refund,” jlentrehe.

 

Sing wigati dhuwite bali

Vonis abot kanggo bos First Travel ora gawe jamaah umrah kang dadi kurban bungah. Kuasa hukume jamaah umrah First Travel, Luthfi Yazid ngan­dhakake, sing wigati dhuwite jamaah bisa dibalekake. Mula iku, para kurban bakal njaluk pengayoman hukum marang Kapolri lan jaksa agung.

Para jamaah uga njaluk dibentuke panitia khusus ing DPR. “Musibah na­sional umat ing sasi Ramadhan kang kudu digolekake dalan metune dening pemerintah, Kemenag. Menyang ngendi wae Kemenag? Ngurus dhaftar ustad?” ujare Luthfi.

Siji poin wigati kang diajap jamaah First Travel saiki iki yaiku anane dhana utawa dhaftar beslahan aset First Travel. Para kurban kang kagabung ing Pe­ngurus Pengelola Aset Korban First Travel (PPAKFT) wis njaluk dhaftar ka­sebut klawan tertulis marang Polri. Ana pejabat kang nyaguhi, nanging banjur diuncalake mrana–mrene.

Luthfi ngajap pemerintah, ing bab iki Kemenag, ora meneg wae. Dheweke nganggep, kasus iku ora bakal dumadi yen Kemenag bisa nindakake fungsine kanthi maksimal minangka regulator lan supervisor pelaksana umrah. “Yen Ke­menag ora nggatekake, bisa dadi bakal muncul kasus-kasus kang padha sing kapitunan lan akibate luwih gedhe,” tandhese.

Ndeleng perkembangane ing si­dhang, pangajape kurban First Travel bakal angel maujud. Angka kapitunan nggayuh Rp 905 miliyar. Gedhe banget yen ditandhingake karo ajine barang beslahan sing mung puluhan miliyar rupiah.

Ora mung 63.310 kurban First Travel sing tansah nandhang sedhih. Luwih saka 100 ewu jamaah umrah liyane nasibe padha. Dheweke kabeh dadi kurban apus-apus Abu Tours, Solusi Balad Lu­mampah, sarta Hannien Tours.

Kurbane Abu Tours luwih akeh ti­nimbang First Travel, yaiku luwih saka wong 86.720. Gunggunge kapitunan uga ora tinemu nalar, nggayuh Rp 1,8 triliyun. Kasuse Abu Tour saiki iki diproses hukum ing Polda Sulawesi Selatan. Sing duwe Abu Tours sing jenenge Hamzah Mamba wis ditetepake minangka tersangka.

Sawatara iku, kasus apus-apus umrah dening Solusi Balad Lumampah (SBL) ditangani Polda Jabar. Gunggung kurbane nggayuh wong 21.845. Januari kepungkur pulisi netepake Dirut SBL Aom Juang Wibowo minangka tersangka. Saka sakabehing jamaah sing durung budhal iku, SBL nganthongi dhuwit pendhaftaran luwih saka Rp 300 miliyar.

Kasus apus-apus umrah dening Hannien Tour uga cukup gedhe. Korbane nggayuh wong 4.126. Polres Surakarta netepake tersangka papat sing kabehane mujudake pimpinan Hannien Tours kla­wan kasus nylimpetake dhuwite jamaah kehe Rp 41 miliyar. (Tim)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan