Jae mujudake Empon-Empon kang Migunani
Diposting oleh : Administrator
Kategori: Kasarasan - Dibaca: 292 kali

Tanduran jae (zingeber officinale, Rosc) mujudake tetuwuhan kang bisa dibudidayakake ing lemah tegalan. Lemah kang semu teles (lembab) nanging akeh kena soroting srengenge, saengga cocog kanggo nenandur tetuwuhan sing asale saka India lan Tiongkok iki.

Kanggone ibu-ibu, jae mujudake empon-empon kanggo mepaki bumbu pawon. Krana kasiyate sing bisa kanggo ngurangi ganda amis ing mangsakan (iwak) utawa bisa kanggo inuman rikala hawane adhem. Malah saiki wis ana sirup jae weton pabrikan. Dadi tambah gampang cak-cakane.

Jae kuwi ana rong jinis. Sing rimpange (enthik-e) gedhe-gedhe disebut jae gajah. Dene sing cilik-cilik disebut jae emprit. Sing cilik rasane luwih pedhes, mulane cocog banget gawe wedang rondhe.

 

Mupangate mring kasarasan

Miturut kadang padesan, jae dipercaya bisa kanggo ngusadani lelara watuk ngikil, pegel-pegel, mutah-mutah, lan lemah syahwat (impoten). Miturut panaliten, rimpang jae ngandhut minyak atsiri, mineral, kamfer, zingiberin, zingiberol, gingerol, zingerol, asam animos, niacin, vitamin A, lan protein.

Kanggo sing nandhang watuk ngikil, bisa mundhut rimpang jawe emprit 2-3 saukuran jempol. Sawise dioncek resik nuli digodhog nganggo banyu rong gelas nganti umob lan kari sagelas. Diunjuk setengah gelas esok lan setengah gelas sore. Ben cepet mari bisa ditambah madu sasendhok makan. Mungguh kanggone bocah cilik, racikan ndhuwur kasebut bisa ditambah jeruk nipis siji, lenga putih sasendhok makan, sarta isi pala. Dene carane, Jae diparut, jeruk nipis dibakar sauntara terus diperes ing lepek. Isi pala uga diparut, banjur dicampur ing lepek nganti warata. Bisa digosokake ing dhadhane bocah sawise adus esok lan sore.

 

Tamba impoten lan keracunan

Kanggone para priya kang nandhang lemah syahwat (impoten) uga bisa diusadani kanthi ajeg ngunjuk racikan jae. Carane, jae 3 rimpang, jeruk nipis 1, kopi bubuk sasendhok makan, kecap  sasendhok makan, madu sasendhok, mrica bubuk sasendhok teh, lan endhog bebek utawa pitik kampung siji.

Carane, jae diparut nuli diperes, jeruk nipis uga diperes. Endhog bebek utawa pitik dijupuk kuninge wae. Sawise dicampur njero gelas sing isi jae lan peresan jeruk nipis, kecap, madu, mrica, kopi bubuk, banjur diudhak nganti warata. Diunjuk pedhak sore rong dina sepisan. Bisa diambali nganti krasa ana asile.

Menawa ana sing alergi mangan urang utawa kepithing bisa diusadani nganggo racikan jae lan lenga tanah (patra) sethithik. Carane, jae 4-5 iji diparut (ora diperes) dicampur lenga tanah, banjur digosok-gosokake ing panggonan sing krasa gatel. Becik kanggo sawise adus.

Muga-muga andharan kasebut ndhuwur bisa murakabi mring para sutresna PS. Nuwun.  (FX. Suyatno)

Berita Terkait

img

Samak Minggu Ini

img

img

Sumber Semangat

Yen kowe weruh semut kepleset lan ceblok ing banyu, mula angkaten lan tulungana dheweke...  Sapa ngerti kuwi dadi sebab anane ampunan tumrapmu ing akherat mengko.

Klik

FESTIVAL CAGANARES

Caganers yakuwi sawijining festival kang dianakake saben wulan Desember ing daerah Catalunya utawa Barcelona, Spanyol. Festival iki bakal ndadekake sapa wae gedheg-gedheg. Kepriye ora, merga masyarakat ing kono ngumpulake maneka figur tokoh dunia kang lagi mbukak kathoke lan (ngapunten) bebuwang. Tokoh duniane macem-macem, kaya Ronaldinho, Albert Einstein, Michael Jackson, Donald Trump, Barrack Obama, lsp. Festival iki ngemu teges yen sapa wae satemene padha tanpa ndeleng trah utawa jabatane nalika bebuwang. (d/ist)***

Pethilan

LP Banda Aceh ribut, 113 napi kabur

Sapa sing betah nang pakunjaran?

Cawe-cawene guru ora bisa digenteni

Apamaneh sing jenenge Pak Google

600 dina kasus penyerangan Novel durung kawiyak

Aparat lagi asyik ngetung dina mbok­menawa