Tegas Nyegah Informasi Negatif Liwat Medsos
Diposting oleh : Administrator
Kategori: Pangudarasa - Dibaca: 83 kali

Para winasis ngendika.... Medsos mono lir pedhang mingis-mingis....Akèh ginané satuhu.... Ing gesang­ing manungsa..... Nanging uga bisa kosok wangsuli­pun.... Temahan nggawé cilaka... Yén namakakennya sisip.

Tembang Pangkur sapada iku nggambaraké yèn Media Sosial (Medsos) iku kaya pedhang ligan mingis-mingis. Bisa digunakaké lan migunani, nanging uga bisa nyilakani.

Kemajuan tèknologi ora bisa disélaki, utamané teknologi informasi. Kanthi kecanggihan teknologi, kaya-kaya donya iki wis ana ing genggeman kita. Anané Medsos dadi wujud lan tandha éra informasi digital, kalebu ing negara kita sing penggunané nganti Januari 2018 wis ana 130 yuta; ateges separo warga Indonesia dadi pengguna Medsos, mesisan dadi bukti yèn kita wis ana ing Revolusi Indhustri jilid IV. Kecanggihan teknologi ora mung minangka berkah kanggoné peradhaban, nanging uga dadi tantangan sing sérius. Ora mung piyé carané supaya ora kèri, nanging uga ngupayakaké amrih kemajuan iku ora malih ndadèkaké kekacauan lan kekisruhan.

Kanyatan, masyarakat kita wiwit melèk mata nganti turu manèh tansah ora ucul karo Hp lan komputer. Motto-né para pengarang lan penulis supaya maca buku dadi pakulinan karebèn ora kèri jaman, saiki wis dibantah terang-terangan. Saiki, saben wektu kalebu lagi nyopir mobil / kendharaan, pikiran tansah nampa informasi liwat Medsos, sing isiné penerangan bab apa waé sing positif lan negatif. Malah penelitian Pusat Kajian Terorisme dan Konflik Sosial UI nemokaké Medsos nyepetaké Radikalisasi merga uwong bisa nampa pesan radikal ing frèkwensi dhuwur.

85 % napi terorisme ngakoni, ngayahi aksi teror mung ing wektu ora nganti setaun sawisé terpapar radikalisme li­wat Medsos. Kamangka taun 2002-2012, rata-rata wiwit radi­kal sawisé 10 taun nampa informasi. Iku ateges Medsos nggam­pangaké kelompok teror lan radikal nindakaké propaganda jroning nuduhaké eksistensiné lan narik anggota anyar. Akèh banget bukti para teroris sinau ngrakit bom uga liwat Medsos.

Anané Medsos iku uga cetha nggampangaké interaksi, lan uga njalari simpatisané dadi gampang mengakses infor­masi. Komunikasi antarané sèl-sèl pelaku teror luwih gam­pang liwat Medsos. Penyebaran kotèné luwih massif lan jangkauané luwih jembar. Ora mung iku, sing luwih mbe­bayani, yaiku kanthi massifé arus informasi, publik saya permisife karo kontèn-kontèn radikal. Bab mau bisa kita simak saka serangan teroris ing Mako Brimob Depok, ing Surabaya, Sidoarjo lan Pakanbaru. Akun-akun sing terang-terangan bersimpati marang aksi terorisme muncul, sing bisa uga minangka kreasi jaringan teroris iku dhéwé kanggo nggiring opini publik.

Wis samesthiné pemerintah liwat Kem Kominfo nggan­dhèng platform Medsos kanggo tumindak. Wis ana 250 akun Telegram, 300 Facebook, 250 Youtube lan luwih 70 Akun Twitter ditindak. Negara kudu tegas, ora perlu ngrè­wès anggepan yèn tindakan mau mbrangus kebébasan ber­pendhapat lan privacy informasi. Jer sing luwih penting peme­rintah kudu bisa njaga katentreman lan keslametan warga lan NKRI. Pemerintah kudu nyiapaké peraturan, ora usah kudu UU sing kesuwèn dadiné, selak kèri karo tèknologi informasi sing banteré kaya dhèrèt ukur.

Contoné negara Jerman sing ora nganti mbrangus Medsos, ning nglarang lan narik dhendha akun sing nyebar hoax, radikalisme lan terorisme. Gedhéné dhendha uga dicocogaké karo gedhéné bebaya sing ditimbulaké. Béda karo Badan Sensor dan Film sing ngontrol lan nyènsor sadurungé film sumebar menyang gedhung bioskop méwah lan misbar, pemerintah kudu bisa nyegah sumebaré informasi négatif liwat Men Kominfo. Mula masyarakat uga kudu berpartisipasi, tansah nglapuraké isi lan akun marang sing berwajib. Mung kanthi partisipasi masyarakat lan ketegasan penegak hukum, kita bisa ngerèm laju radikalisme lan informasi negatif liwat medsos. Yèn pemerintah rangu, ora tegas lan telat, kita bakal tansah kèri anggoné nyegah sumebaré informasi negatif liwat medsos. (MW)

Berita Terkait

img

Samak Minggu Ini

img

img

Sumber Semangat

Saya tambah umur saya kabur mripat kita...Iki ora liya merga satemene Gusti Allah lagi madhangake mata batin kita kanggo ndeleng akhirat.

Klik

PASRAH DIPRIKSA DOKTER CILIK

Saperangan ing antarane kita ana kang duwe ingon-ingon ing omah. Apa kuwi asu, kucing, manuk, bebek, pitik lsp. Kerep kewan-kewan ksb nganti dianggep minangka perangan kulawargane dhewe. Malah saking rakete karo kewan ingon-ingone, kerep kewan ingon-ingone ksb pasrah nalika arep diapakake wae dening sing duwe. Kaya ing gambar iki contone. (d/ist)***

Pethilan

Ewonan seniman bakal dikerigake menyang sekolahan

Ngasah uteg tengene siswa

Uji materi nyalon presiden kemungkinan gagal

Calon akeh, patut ora?

Parpol ngerigake kekuwatan penuh ing Pilkada 2018

Ana sing pengin ngganti presiden pisan