OLAH-OLAHAN IWAK sing AWET LAN NGLAWUHI
Diposting oleh : Administrator
Kategori: Anyar Katon - Dibaca: 271 kali

Lumrahe yen sasi pasa, para ibu nyepakake rahaban kanggo buka lan saur. Yen ngarepke buka, kapetung isih dawa wektune, bisa ngreka mangsakan werna-werna. Beda banget karo wektu kanggo nyepakake saur sing mung sakeplasan, isuk-isuk, kepara isih rada ngantuk. Kamangka, menu saur uga kudu digatekake banget kandhutan gizine, amrih nyukupi kanggo nindakake pasa sedina nganti buka.

Redhaksi Taman Wanita ing kalodhangan iki urun rembug ngenani olah-olahan sing bisa dadi sumber protein, nanging uga kapetung awet. Saengga, bisa dimangsak rada akeh sisan, saperangan kanggo nalika buka lan saperangan disinggahake kanggo pranti saur.

Bahan sing diolah wujude iwak. Ora mung iwak peyek sing bisa awet nganti elek. Maneka jinis iwak yen diolah kanthi cara tinamtu, bisa kanggo lawuh bola-bali. Mesthi wae yen durung kesusu entek gusis.Salah sijine yaiku iwak gabus, sing wis wujud iwak asin. Iwak gabus asin bisa dimangsak karo sambel ijo. Yen kuwatir pedhese, ya aja akeh-akeh lomboke, rada diakehi tomat, uga brambang bawange. Yen sambele dimangsang nganti mateng tenan, lawuh iki bisa tahan luwih saka sedina. Dadi yen mesisan nggawe akeh, kena kanggo buka, saur, nganti buka lan saur maneh. Mung kari nyepakake sayurane wae. Rak ngirit wektu lan tenaga ta?

Ana maneh iwak tongkol sing bisa dimangsak oseng-oseng, diimbuhi lokio. Lokio utawa kucai yaiku salah sijining sayuran sing uga kawentar kanthi aran godhong brambang. Lan sing gampang tinemu ing pasar uga supermarket, iwak teri. Cilik-cilik nanging rasane nglawuhi, teri bisa digawe kering kanthi diimbuhi tempe lan kacang brul. Yen ora kesusu entek, lawuh iki kuwat nganti luwih saka telung dina.

 

Iwak Gabus Asin Sambel Ijo

Bahan:

•    iwak gabus asin  1/4 kg

•    godhong salam salembar

•    gula pasir 1/2 sendhok teh

•    uyah 1/2 sendhok teh

•    godhong jeruk 2 lembar

•    lenga kanggo nggangsa 100 ml

•    tomat ijo 2, diirisi

•    Lenga sacukupe kanggo nggoreng iwak

Bumbu sing diuleg

•    brambang 4 siyung

•    bawang 2 siyung

•    lombok ijo gedhe 5 iji

•    lombok ijo kriting 4 iji

•    lombok abang kriting 2 iji

Carane mangsak:

1    Panasake wajan, genine cukupan wae, kanggo nggoreng iwak gabus asin nganti semu soklat

2    Sawise iku, iwak gabus dientas lan ditus

3    Genti panasake wajan lanlenga 100 ml, kanggo nggangsa bumbu ulegan, nganti ngganda sedhep

4    Imbuhake irisan tomat

5    Imbuhake gula lan uyah, diudhak nganti cinampur rata. Jajal diicipi, yen ana kurang asine legine ya diimbuhi  

6    Keri dhewe, cemplungake iwak gabuse, diudhak nganti sambele rata lan rumesep.

 

Oseng Tongkol Lokio

Bahan:

•    iwak tongkol ukuran sedhengan 5 kranjang (udakara 10 iji)

•    lombok ijo gedhe 4 iji

•    tomat ijo 2 iji

•    lokio/kucai/godhong brambang sa-ons, dikumbah resik

•    bawang bombay cilik 1

•    bawang 2 siyung

•    jae saros, dikeprak

•    laos saros, dikeprak

•    godhong salam salembar

•    godhong jeruk 2 lembar

•    sere 1, dikeprak

•    uyah, gula sacukupe

Carane mangsak

1.   Iwak tongkol digoreng nganti mateng

2.   Bawang, lombok, tomat dirajang alus

3.   Bawang lan bawang bombay digangsa nganti ngganda sedhep, imbuhi godhong salam, godhong jeruk, jae, lan laos

4.   Cemplungake iwak tongkol, diudhak rata

5.   Tambahake irisan lombok lan tomat, diudhak maneh nganti tomat lan lombok alum.

6.   Sing pungkasan, cemplungake lokio/kucai/godhong brambang, diudhak nganti alum.

 

Kering Teri Tempe Kacang

Bahan

•    tempe karo tengah papan

•    teri medan 1/4 kg

•    kacang brul 1/4 kg

•    bawang 3 siyung

•    brambang 5 siyung

•    gula jawa 2 ons

•    gula pasir 1/2 sendhok

•    uyah 1/2 sendhok

•    godhong jeruk 2 lembar, diiris tipis

•    lombok abang kriting 3 iji, diiris tipis, digoreng banjur disisihake

•    bawang 5 siyung, diiris tipis, digoreng banjur disisihake

Carane nggawe

1.   Tempe diirisi cilik-cilik, bisa kothak utawa dawa tipis, banjur digoreng garing lan ditus.

2.   Teri digoreng garing, banjur ditus.

3.   Kacang digoreng nganti mateng, banjur ditus.

4.   Brambang lan bawang diuleg alus, digangsa nganti sedhep.

5.   Imbuhi gula jawa, gula pasir, uyah, lan irisan godhong jeruk, diudhak nganti rada kenthel.

6.   Geni dipateni, cemplungake gorengan tempe, teri, lan kacang, enggal diudhak terus nganti cinampur rata.

7.   Yen wis rata lan kelet, dientas, pindhahake ing wadhah lan dienteni adhem. Sawise adhem kena diwadhahake ing toples.

n

 

Berita Terkait

img

Samak Minggu Ini

img

img

Sumber Semangat

Ora ana sing ora bisa diikhlasake...

Klik

OJEK MAYIT

Ojek mujudake salah sijine jasa angkut migunakake sepedhahmotor. Ing jaman modern saiki, jasa iki malah bisa dipesen liwat HP, yakuwi kang diarani Ojek Online (Ojol). Ojol ora mung ngeterake wong, nanging uga panganan, barang lan blanjan. Nanging senajan wis modern, pranyata ojol ing Indonesia isih klebu biyasa-biyasa wae. Beda karo ojek ing Kongo, Afrika. Ojek ing kene ora mung bisa ngeterake blanjan utawa panganan wae, nanging uga ngeterake mayit! Carane nggawa kanthi cara dibonceng ing mburi lan ditaleni rapet karo tukang ojeke. Maklum, mayit kuwi ora bisa nggamblok dhewe... (d/ist)***

Pethilan

Akibat anane lindhu, pegawe hotel lan restoran dikon prei

Ujian kanggo kita kabeh minangka bangsa Indonesia

Idrus Marham durung karep dadi justice kolaborator

Mbokmenawa isih bingung milih je­neng-jeneng kang pantes di-‘nya­nyek’-ake

Asil ing Asian Games 2018 dadi tetenger gumregah

Kabeh kanggo Indonesia