Jula - Juli (21)
Diposting oleh : Administrator
Kategori: Rena-rena - Dibaca: 53 kali

SETYA Novanto sing ngutegi korupsi proyek e-KTP Rp 2,3 trilyun, divonis 15 taun penjara lan mbalekake dhuwi USD 7,3 juta. * Korupsi nganti matrilyun-trilyun, ukumane kok mung limolas taun, ing penjara pijer ma­nyun, metu-metu wis tuwa pikun.

***

TINIMBANG yen bandhing lan kasasi ukumane ditambahi, Setya Novanto pasrah divonis se­mono lan awal Mei wingi dikirim ing LP Sukamiskin. * Koruptor dibui ing  LP Su­kamiskin, ora bakal dadi miskin, ma­ngane gule iwak patin, mangsa doyana tajin.

***

SBY mantan Presiden RI runtik, awit Jokowi rikala mbandhingake rega BBM ing Papua biyen karo saiki setengahe nyindhir panjenengane. * Priyayi Jawa enggoning rasa, Jokowi saderma ngudarasa, meksa ana sing ora kapadan karsa, mangka iki sasi pasa.

***

BAPAK reformasi Amien Rais ngarani, Indonesia bangsa pekok awit UU Migas luwih miko-lehake manca timbang rakyate dhewe. * Mbah Amien Rais lenggahe ana Yogya, mangka kutha Yogya uga ana Indonesia. 

***

NGAREPAKE 20 taun reformasi, Sri Bintang Pamungkas ngarani Amien Rais pengkhianat lan ang­gota DPR Desmond Mahesa ngarani: pecundang. * Dadi paran cucuhan, amar­­ga wis golongan kasepuhan.                                                                

***

SAWISE gawe ontran-ontran ing Mako Brimob Depok, klompok teroris njeblugake bom ing li­mang papan Surabaya, sing mati 29. * Teroris penggilut paham radikalis, tin­dake kliwat wengis, lila awake ajur mu­mur dadi sosis, dhasar antheke ISIS.

***

KAPOLRI Tito Karnavian ngaku kurang merdika mbrastha teroris, awit pasal-pasal UU Teror­isme “nyrimpung” polisi. * UU Terorisme gawe kewran, arep dianakake owah-owahan, wis 2 taun mangkrak dirembug anggota dewan, wong disambi ngan­tukan.

***

ANWAR Ibrahim calon PM Malaysia sing nembe bebas saka penjara ngarani, 20 taun refor­masi ing Indonesia korupsi kok saya ndadi? * Ing kene korupsi dadi budaya, pejabat-politisi-pengusaha saekapraya, anak turune mulya, rakyate urip kasiya-siya.

***

AMAN Abdurahman sing dituntut Jaksa ukuman pati merga ndhalangi aksi terorisme, ana sing usul diukum selawase urip wae. * Teroris mono yakin matine mlebu swar­ga-di, ing kana diladeni widadari, gung­gunge 70 kurang siji, mangka salami-lami.

***

DAFTAR 200 penceramah sing direkomendasi Kementrian Agama nuwuhake pro lan kontra, akeh sing sumelang gawe crah bebrayan Islam. * Pamarentah arep matesi paham radikal, malah akeh sing ginjal-ginjal, dianggep kuwi aturan sing mokal-mokal.

***

RIKALA Presiden Jokowi nggelar buka pasa bersama karo Kementrian lan Lembaga Negara, Fahri Hamzah uga ana katon. * Minang­ka politisi dhedhengkot sing kondhang wangkot, Fahri Hamzah senajan wis nyo­kot ora bakal leren anggone nyocot.

***

SAKA Kab. Purworejo (Jateng) dikabarake, DS anggota DPRD saka PKS lan MD saka PKB ko­nangan laku sedheng dening bojo lan anake dhewe. * Wong politisi partai aga­mi, malah padha kesengsem laku juti, nguja nafsu birahi, apa kuwi jenenge koalisi?

***

ANGGOTA Komnas HAM Chairul Anam ora sarujuk TNI ngewangi Polri mbrastha teroris, wong bom ing Surabaya isih klas kampung. * Guneman waton metu saka gurung, yen brayate dhewe kadhung melu dadi gle­pung, Chairul nembe keduwung.

***

AGUS Harimurti Yudhoyono (AHY) nyontoni awake dhewe, anggota TNI yen pengin ambyur ing politik kudu metu dhisik. * Nanging yen dudu putra SBY apa ethes?

                       ***                            (GTS)

 

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik