Hilda dan Deedee kasil Nelukake Pucuke Gunung Everest
Diposting oleh : Administrator
Kategori: Anyar Katon - Dibaca: 206 kali

Indonesia dinane iki nduweni tim pendaki gunung putri kang kawitan dhewe sukses nglebatake gendera Abang Putih ing pitung pucuk donya.

Kasuksesan iki diukir dening Fransisca Dimitri Inkiriwang (24) lan Mathilda Dwi Lestari (24), saka Mahitala Universitas Katolik Parahyangan Bandung sawise kasil nggayuh pucuke Gunung Everest (8.848m), Kemis mentas iki (17/5/2018).

Ngunggahi Everest ngrampungake misi pendakian pitung pucuk donya kang sasuwene iki ditindakake lumantar program The Women of Indonesia’s Seven Summits Expedition Mahitala Unpar (WISSEMU).

Jroning rong taun iki, kekarone mahasiswa jurusan Hubu­ngan Internasional FISIP Unpar Bandung angkatan 2011 mau pancen wis ngunggahi Gunung Carstensz Pyramid (4.884m), Elbrus (5.162m), Kilimanjaro (5.132m), Aconcagua (6.962m), Vinson Massif (4.190m), lan Denali (6.190m).

Presiden Joko Widodo paring apresiasi atas prestasi iki. Semono uga Rektor Universitas Katolik Parahyangan Bandung, Mangadar Situmorang.

Mangadar Situmorang ngandhakake, prestasi iku nuduhake yen kaum mudha Indonesia sanggup ngadhepi maneka tan­tangan kanggo nggayuh tujuane ing laladan internasional.

“Kuwanenane wis aweh inspirasi bangsa kita amrih ora wedi ngadhepi maneka tantangan, klebu teror kang keri-keri iki ngganggu bangsa kita kanthi aksi kang nuwuhake kerugian keluarga lan kita kabeh” tuture Situmorang.

Pucuk Everest ora digayuh Hilda lan Deedee (julukan akrabe kekarone) kuwi kanthi gampang.

Saka Camp 3 (8.225 meter) kekarone ngunggahi pereng watu lan es kang kudu dipenek utawa diliwati kanthi cara mlipir.

Paling ora ana telung perangan alangan alam kang kudu diliwati (step 1-3) kang dhuwure 8.500-8.800 m.

Saka kono lagi kekarone tekan gegere gunung tumuju piramid pucuk Everest kang disebut Chomolungma utawa Dewi Langit kuwi.

Kanthi tekanan udara kang kadar oksigene endhek (30%), menek pereng watu lan es kuwi cukup angel.

Ing Step 2, pancadan sepatu salju kang dipepaki crampon (cakar es) luwih sering ucul ing daerah wewatuan lan kerep ndadekake pendaki keplorot.

Sauntara kuwi menek pereng ing Step 3 kang dhuwure 8.800 meter ora mung nuntut anane kekuwatan lan kese­imbangan fisik, nanging uga determinasi personal pendaki.

Hilda lan Deedee nyoba tetep fokus marang pidakan-pidakane tumuju pucuk kanthi diampingi Sherpa loro.

Deedee ngakoni, angel ambegan ing kene lan ngerigake kabeh tenagane ing Step 3.

Nanging ketenangan ngatur napas mbiyantu banget dheweke bali fokus lan oleh cekelan apadene pidakan kang manteb.

Sawise berjuang suwene wolu setengah jam munggah gunung, Hilda lan Deedee wusanane bisa tekan pucuk kang diwenehi tandha tripod alumunium kanthi centhelan lungta (gendera donga Budha Tibetan) warna warni.   

Kasuksesan iki mepaki prestasi kang diukir Mahitala Unpar kang sadurunge kasil ngirim mahasiswa papat minangka pendaki Indonesia pisanan ing pitung pucuk donya taun 2012.

Pendakian pitung pucuk benua utawa The Seven Summits dadi kayadene grandslam kanggone pendaki gunung ing donya.

Indonesia dhewe dadi negara ka-53 kang kasil mapanake pendakine minangka the seven summitters.

Nganti saiki lagi ana 416 pendaki pitung pucuk donya kang dumadi saka 345 pendaki putra lan 71 pendaki putri. (d/ist)***

 

Berita Terkait

img

Samak Minggu Ini

img

img

Sumber Semangat

Ora ana sing ora bisa diikhlasake...

Klik

OJEK MAYIT

Ojek mujudake salah sijine jasa angkut migunakake sepedhahmotor. Ing jaman modern saiki, jasa iki malah bisa dipesen liwat HP, yakuwi kang diarani Ojek Online (Ojol). Ojol ora mung ngeterake wong, nanging uga panganan, barang lan blanjan. Nanging senajan wis modern, pranyata ojol ing Indonesia isih klebu biyasa-biyasa wae. Beda karo ojek ing Kongo, Afrika. Ojek ing kene ora mung bisa ngeterake blanjan utawa panganan wae, nanging uga ngeterake mayit! Carane nggawa kanthi cara dibonceng ing mburi lan ditaleni rapet karo tukang ojeke. Maklum, mayit kuwi ora bisa nggamblok dhewe... (d/ist)***

Pethilan

Akibat anane lindhu, pegawe hotel lan restoran dikon prei

Ujian kanggo kita kabeh minangka bangsa Indonesia

Idrus Marham durung karep dadi justice kolaborator

Mbokmenawa isih bingung milih je­neng-jeneng kang pantes di-‘nya­nyek’-ake

Asil ing Asian Games 2018 dadi tetenger gumregah

Kabeh kanggo Indonesia