Rupiah Keplorod, Cadhangan Valuta Asing Kudu Dijaga
Diposting oleh : Administrator
Kategori: Pangudarasa - Dibaca: 138 kali

Jaman penjajahan kita wis nggunakaké dhuwit Landa, Gulden. Embuh kepriyé critané, wong Jawa ngowahi jenengé dadi Gélo. Wong cilik, mung padha kenal dhuwit cilik sing jenengé ndhil (0,5 sèn), sèn, bénggol (2,5 sèn), ke­lip (5 sèn). Kethip (10 sèn). Bareng mardika kita nggunakaké ORI (Oeang Republik Indonesia). Wiwit 2 Nopember 1949 ganti Rupiah sing asalé saka basa Sansekerta Rupya (coin pérak). Rupiah ngalami tiba tangi, naté diperdagangaké ing pasar gelap, naté golèk pengakuan donya. Rupiah uga naté ngalami mawarna pengalaman kaya ta saneering, pergantian dadi dhuwit anyar sing regané Rp 1,- dhuwit anyar = Rp. 1.000,- dhuwit lawas. Sing ora tau owah mung siji, regané tansah keplorod, cilik-cilikan utawa gedhèn-gedhènan (deva­luasi). Pelemahan sing paling abot, Rp 16.800,- / dollar AS, yaiku nalika krisis ekonomi taun 1998.

Wis mèh 69 taun kita durung naté ngalami devlasi. Anané mung invlasi, ateges reregan barang saya mundhak, najan pertumbuhan ekonomi moderat ± 5 %, nanging invlasi “ter­kendhali” 3,5 %. Kapan kita ngalami devlasi, mung ana ing pangarep-arep. Rupiah isih terus niba tangi, najan wis kabuktèn yèn bisa gunrégah manèh saka keterpurukan ngadhepi manéka tantangan.

Rupiah saiki ngadhepi ujian manèh. Rupiah kebleseg nganti luwih 14.000 / dollar AS, najan durung nganti 14.700 / dollar AS kaya taun 2015. Kita bisa nglipur awaké dhéwé kanthi pranyatan yèn kedadéyan iku ora ndhèwèki, uga dialami mèh kabèh dhuwit ndonya. Yèn kita terdepresiasi 0,88 %, mangka Baht (Thailand) terdepresiasi 1.12 %, Ringgit (Malaysia) 1,24 %, dollar Singapura 1,17 %, Won Kore Selatan 1,38 % lan Rupee (India) 2,4 %.

Angka-angka mau nuduhaké yèn Rupiah keplorod paling sithik tinimbang liyané, nanging kanggoné kita sing wong biyasa wis cukup nyilakani, jer Rupiah terdepresiasi ateges reregan saya mundhak, mangka kita ora bisa tumindak apa-apa kejaba mung ngencengi sabuk.

Tanprabéda taun 2015, terdepresiasiné Rupiah lan dhuwit liyané iki utamané dijalari faktor eksternal sing dimotori un­dhakan suku bunga acuan bank sentral AS. Kanggo kita, ora akèh sing bisa diayahi saka segi kebijakan jroning negara kanggo nyuda banteré mudhuné Rupiah, mliginé kanggo jangka pèndhèk. Sing krasa rada mènèhi harapan, neraca perdagangan sing malik surplus ing wulan Maret kepungkur. Kuduné surplus bisa digayuh manèh ing wulan April lan saterusé. Mlorodé Rupiah kuduné dadi panjurung ekspor sing luwih ghedhé, awit rega komoditi Indonesia ing pasar internasional dadi luwih murah.

Ana uga faktor musiman sing njalari Rupiah terdepresiasi : Ing triwulan II 2018 permintaan valas mundhak kanggo mbayar utang njaban negara, dividen lan prabéya impor. Ngadhepi Romadlon impor barang modhal, bahan baku lan konsumsi cukup dhuwur. Manut BPS, nilai impor Januari – Maret 2018 nggayuh 44 M dollar AS, mundhak 20,1 % dibandhingaké taun wingi. Impor barang modhal mundhak 27,7 %. Impor bahan baku lan penolong mundhak 18,3 %, impor barang konsumsi 22,1 %.

BPS nyathet, cadhangan devisa akhir Maret suda 0,06 M dollar AS, kari 126 M dollar. Éwa semono manut BI, depresiasi Rupiah isih terkendhali merga fondamen ekonomi domestik cukup kuwat. Pelemahan Rupiah ora bakal ngganggu stabilitas keuangan nasional. Kanggo pertahanan lapis ka loro  BI kerja sama karo Jepang senilai 22,7 M dollar, karo sapérangan negara ASEAN, Korea, Australia sarta China liwat Chiang Mai Initiative Multilateralization Agreement. Tujuané, ngundhakaké perdagangan lan investasi langsung antarané negara kita karo negara-negara mau sarta mbantu panyedhiyan likuiditas jangka pèndhèk kanggo stabilitas pasar keuangan.

Ing satengahé ora mesthiné global, upaya bebarengan njaga stabilitas Rupiah dibutuhké banget. Wujudé, kita kudu ngundhakaké ekspor lan pariwisata. Kita kudu bisa nggunakaké sakèh kalodhangan supaya ekspor mundhak, lan kudu gencar promosi pariwisata dimèn cadhangan devisa ora saya keplorod. (MW).

Berita Terkait

img

Samak Minggu Ini

img

img

Sumber Semangat

Saupamane wae kabagyan iku bisa dituku, mesthi wong-wong sugih bakal nuku kabagyan mau. Lan kita bakal kangelan oleh kabagyan ksb merga wis diborong wong kang sugih mau. Nanging tujune ka­bagyan kuwi anane mung ing njero  ati lan pikiran. Ka­bagyan iku mung bisa didu­weni dening wong kang pin­ter nindakake sukur.

Klik

ARIF WICAKSANA

Grengsenge mbabat alas kanggo kabutuhan pembangunan kanthi ngurbanake sakehing warna-warna ijo ing alam, pranyata isih ana uga kang gelem ngalah lan ngajeni banget marang ‘pabrik’ oksigen ksb. Iki salah siji contone, dimen nylametake wit siji-sijine, panggawene dalan nasional lila dienggokake. Dadi, ayo ndadekake wit-witan minangka karib kita, ing ngendi wae. (d/ist)***

Pethilan

Amandemen gumantung keputusan politik

Gumantung kepentingane uga

Koalisi padhadene ngenteni capres cawapres

Intip-intipan rupa lawas

Lobi-lobi politik saya kerep

Kasak kusuk, nyang-nyangan…