Bos First Travel Dituntut 20 Taun
Diposting oleh : Administrator
Kategori: Dredah Masalah - Dibaca: 49 kali

Anniesa Hasibuan, salah sawijining kadakwa kasus apus-apus nganggo kedhok biro haji lan umrah First Travel (FT), ora kuwagang ndhelikake rasa susahe. Luhe kembeng nalika jaksa macakake tuntutane marang sidhang ing Pengadi­lan Negeri (PN) Depok Senin (7/5) ke­pungkur.

Anniesa dalah sisihane Andika Su­rachman, dituntut ukuman kunjara 20 taun lan dhendha Rp 10 miliyar subsider kurungan setaun patang sasi. “Kadakwa Andika Surachman lan Anniesa Hasibuan kabukten nindakake TPPU (tindak pidana pencucian uang) kanthi bebarengan lan terus-terusan,” kandhane Heri Jerman, koordinator jaksa penuntut umum (JPU), ing sidhang.

Kadakwa siji liyane, yaiku Siti Nu­raidah Hasibuan alias Kiki Hasibuan-adhine Anniesa, dituntut JPU klawan ukuman kunjara 18 taun lan dhendha Rp 5 miliyar subsider kurungan setaun. Kiki dianggep kabukten nindakake tindak pidana kanthi bebarengan slaras pasal 378 KUHP juncto pasal 55 ayat 1 ke-1 KUHP juncto pasal 64 ayat 1 KUHP utawa pasal 372 KUHP juncto pasal 55 ayat 1 ke-1 KUHP juncto pasal 1 KUHP lan pasal 3 UU Nomer 8 Taun 2010 ngenani Pen­cegahan dan Pemberantasan Tindak Pen­cucian Uang (TPPU). “Kadakwa (Siti) dituntut klawan ukuman kunjara 18 taun,” jlentrehe Heri.

Sawise sidhang, Heri nerangake yen tuntutane marang Kiki luwih entheng tinimbang kadakwa liyane jalaran dhe­weke dudu pelaku utama.

Heri nambahake, pasal kang dicakake ora adoh bedane karo kadakwa Andika lan Anniesa. Nanging, mligi kanggone Kiki, pasal alternatif 372 KUHP juncto pasal 55 ayat 1 KUHP juncto pasal 64 ayat 1 KUHP kang didakwakake wis ora digunakake maneh.

Nanggapi marang tuntutan kasebut, Andika ngandhakake yen tuntutan iku kedhuwuren. Dene kuasa hukum telu-telune kadakwa, yaiku Wawan Ardianto, bakal migunakake wektu rong minggu kanggo nyusun kabotane marang tun­tutan kasebut.

“Aku sakanca minangka kuasa hukum bakal mbuktekake klawan kabotan tun­tutan kasebut. Mulane, muga-muga sa­jro­ne rong minggu bisa rampung,” ujare.

Dheweke nambahake, engga saiki ora ana sipat tindak pidana apus-apus saka kliene tumrap kurban Dirst Travel. “Ora ana bukti kang ngarah mrono (tin­dak pidana). Rerangken kedadeyane ana, nanging buktine ora ana,” tandhese. (Tim)

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik