Bawang Bombai Abang Dibeslah
Diposting oleh : Administrator
Kategori: Dredah Masalah - Dibaca: 53 kali

Polda Jatim netepake Direktur Utama (Dirut) PT JS minangka tersangka ing kasus nimbun bawang abang lan bombai 70,7 ton sing diimpor saka India. “Sawatara tersangkane siji, yaiku dirute (PT JS),” ujare Irjen Pol Setyo Wasisto, Kadiv Humas Mabes Polri, Senin (7/5) ke­pungkur.

Setyo lan penyidik ora nyebutake je­neng lan jatidhirine Dirut PT JS. Sing genah saiki tersangkane wis diamanake ing Polda Jatim lan tansah dijaluki ka­trangane.

Kejaba iku, penyidik uga mriksa sa­perangan saksi saka pedagang pasar. Antara liya, Ahmad Fauzi, Dimas Widya Saputra lan Anwar Gunadi. “Isih dia­nakake pengembangan. Saksi-saksine terus dijaluki katrangan,” kandhane Setyo.

Dene ing gudhang kang kanggo nyim­pen brambang lan bawang bombai ora tinemokake karyawan siji-sijia, kejaba satpam sing njaga gudhang.

Penyidik njiret tersangka klawan pa­sal 126 UU Nomer 13 Taun 2010 ngenani Hortikultura jo Pasal 22 ayat (1) huruf f Permen Pertanian Nomer 38/2017 nge­nani Rekomendasi Impor Hortikultura jo Kepmentan No 105/kpts/SR.130/D/12/2017 ngenani Karakteristik Bawang Bom­bai yang Dapat Impor.

Brambang lan bawang bombai dige­rebeg Subdit 1 Indagsi Ditreskrimsus Polda Jatim ing gudhang PT JS Jalan Kasuari 35 Surabaya. Pulisi wis ngincer gudhang PT JS lan digrebeg nalika tang­gal 3 Mei kepungkur.

Gudhang iku digrebeg sawise pulisi nindakake penyelidhikan ubenge bram­bang impor ing Pasar Pabean lan pasar liyane ing Surabaya. Keterangane para pedagang pasar ngandhakake marang pulisi, yen brambang lan bawang bombai saka India iku dikirim saka PT JS.

“Tetela ana timbunan bawang impor saka India, kamangka bawang impor ora oleh mlebu menyang Indonesia,” jlen­trehe Setyo Wasisto.

Satekane ing gudhang PT JS, pulisi nitipriksa dokumen impor sing diduweni perusahaan iki. Disumurupi brambang lan bawang bombai iki diimpor nalika 30 April kehe 4 kontainer ukuran 40 feat kehe 114,9 ton.

Peprincene, barang sludupan sing kehe 8,1 ton ukurane sandhuwure 5 cm, lan sing 106,8 ton ukurane sangisore 5 cm.

Manut Setyo, brambang lan bawang bombai impor kang nduweni ukuran  sa­ngisore 5 cm sing ditimbun ing gudhang PT JS kehe 70,7 ton. Dene sing 34,2 ton wis didol. “Sadurunge nggrebeg gudhang iki, pulisi wis nganakake sesambungan karo Pemprov Jatim. 34,2 ton wis didol ing pasar-pasar ing Surabaya. Mulane aku lan Pemprov Jatim nindakake penge­cekan menyang Pasar Pabean lan pasar liyane,” ujare Setyo kang uga tinang­genah minangka Kepala Satgas Pangan Mabes Polri iki.

Kepala Seksi Tanaman Sayur dan Ta­naman Obat Dinas Pertanaman Pangan Pemprov Jatim, Indrawati ngandhakake, pancen brambang lan bawang bombai impor wis ora oleh mlebu menyang Indonesia.

“Brambang lan bawang bombai sing oleh diimpor iku sing ukurane paling cilik 5 cm,” kandhane Indrawati.

 

Importir pokil

Temuan brambang lan bawang bom­bai ing gudhang duweki PT JS, mujudake pokal saka bisnis nakale importir. Manut Ketua Asosiasi Petani Brambang Jawa Timur, Akad, yen brambang kang dite­mokake satemene jinis bawang bombai werna abang.

“Pancen pamarentah ora ngetokake rekomendasi impor brambang. Nanging ngetokake rekomendasi impor bawang bombai kanthi syarat paling cilik ukurane 5 cm,” jlentrehe Akad, nalika dipethuki Senin (7/5) kepungkur.

Nah, importir nakal kasebut manfa­atake rekomendasi impor bawang bom­bai klawan ukuran sing cilik-cilik kaya brambang. Saengga disebut brambang.

“Importir iku wis nindakake trekah pokil. Malah bawang bombai cilik iku di­campur karo brambang lokal. Kamang­ka rasane seje,” ujare Akad.

Klawan temonan iku, Akad nelakake ucapan matur nuwun marang pihak ka­polisen kang wis kasil miyak trekah ala kasebut. Pehake uga ngajap marang in­stansi gegayutan, utamane Karantina supaya luwih ngrapeti pengawasane marang produk impor. “Bisa dadi bawang bombai cilik iku diseleh ing tengah. Ditu­tupi karo bawang bombai gedhe slaras ketentuan reko­mendasi,” ujare Akad.

Saiki, brambang lokal wis siyap pa­nen lan bisa kanggo nyukupi wayah Ra­madhan lan Riyaya. (Tim)

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik