Pinggir Dalan Tol Bisa Dadi Lahan Produktif
Diposting oleh : Administrator
Kategori: Pangudarasa - Dibaca: 144 kali

Wulan Romadlon, wulan suci, kanggo gladhèn lan pandhadharan. Nanging ing negara kita uga idhèntik karo reregan mundhak awit gegandhè­ngan karo tata-tata ngadhepi bada (Idul Fitri) sing dipahargya kanthi mangan luwih énak, nyandhang apik, mudhik kumpul sedulur lan silaturrahim. Tumraping masyarakat urban, mu­dhik saka kutha-kutha gedhé menyang karang padésan, saka pulo siji menyang pulo liyané dadi kaya kuwajiban. Mula pe­merintah uga ngawékani bab mau supaya lalu-lintas mu­dhik lancar lan aman. Logistik keperluan padinan dicukupi dimèn regané terkendhali tanpa kekisruhan jroning pesta akbar taunan rakyat sanegara.

Taun-taun kepungkur, tanah Jawa ngadhepi masalah dalan pantura lan dalan tengah sing macet, kerusakan dalan gedhé, ruwet lan macet ing pintu tol. Taun iki, masalah iku durung rampung tuntas. Proyek nggarap dalan nganti kaya “proyèk abadi” taunan, najan pemerintah wis ora kurang-ku­rang anggoné ngupayakaké kelancarané. Semono uga proyèk nggarap dalan tol gedhèn-gedhènan, nggawé pela­buhan, bandhara, ril sepur double track lsp.

Nalika jaman penjajahan, GG Herman Willem Daendels wis kasil mbangun dalan pos Anyer Lor — Banyuwangi. Saiki presiden Jokowi mbangun dalan tol Trans Jawa, Trans Sumatra lsp, kena diarani tanprabéda dalan Daendels jilid II. Wektu iku dalan Daendels utamané kanggo lalu-lintas pos supaya kabar saka pojok wétan pulo Jawa bisa tekan Batavia mung jroning wektu paling suwé rong dina (2 x 24 Jam). Saiki jaman wis malih adoh. Dalan tol kanggo lalu-lintas uwong (penumpang) lan barang kanggo kemakmurané bangsa. Nanging gunggung pendhudhuk tanah Jawa saiki wis tikel luwih ping teluné tinimbang jaman Daendels.

Éwa semono wataking manungsa iku tetep padha waé. Ana sing becik kaya malaikat, uga ana sing serakah lan me­nangé dhéwé. Pemerintah wis ngusahakaké sarana lan pra­sarana nyukupi kebutuhan lan stabilisasi reregan, nanging te­tep ana sing ngganggu kanthi golèk bathi gedhé sakpénaké dhéwé. Pemerintah nggawé lan ngrawat dalan, nanging akèh truk ngangkut barang kanthi bobot ngluwihi tonase maksi­mum. Tundhoné dalan cepet rusak. Malah durung suwé iki ana kreteg sing tugel thel kanthi nggawa kurban sing tiwas kejegur kali Bengawan Solo.

Pemerintah njaga reregan barang sing mbathèni petani prodhusèn lan ngepénakaké konsumèn. Nanging ana sing nylundhupaké barang tanpa mbayar pajeg mung nggolèk bathi sak akèh-akèhé lan ora perduli nasibé petani padha sambat ngaru-ara. Kamangka menteri Perdagangan lan para staf lan andhahané nganti terus-terusan sidak (inspeksi men­dadak) lan turba (turun kebawah) menyang pasar-pasar ngupayakaké distribusi lancar, ora ana penimbunan, pengo­plosan lsp dimèn pasokan cukup lan regané stabil.

Sing uga narik kawigatèn kita, anané pinggiran dalan sa­dawané dalan tol sing dawané atusan km iki déning peme­rin­tah kita durung dimanfaataké maksimim dadi lahan pro­dhuktif. Jaman penjajahan, pinggir dalan Daendels nduwèni ciri khas, wit-witan pelindhung dalan mau ana wité asem, kenari, johar sing ora mung ngasilaké godhong nanging uga woh-wohan tinamtu. Contoné, dalan pantura Jatim wiwit Sidoarjo ma­ngétan nganti Panarukan dadi jajaran wit asem. Wit-witan mau saiki wis entèk kanggo pelébaran dalan tanpa diganti wit liyané. Akibat sampingané, woh-woh asem ing pasar-pasar Surabaya saya langka. Kesané, Landa (Daen­dels) pinter nandur, Republik pinter negori tanpa ngganti wit anyar.

Rasané, lahan kosong pinggir dalan (tol) mau becik ba­nget ditanduri wit-witan sing prodhuktif ngasilaké kayu kaya séngon, pring utawa liyané. Malah bisa uga ditanduri jati sing asilé gedhé senajan umuré dawa. Kanthi mangkono la­han pinggir dalan tol mau dadi prodhuktif. Aja kalah karo Landa. Republik uga bisa nata pinggir dalan tol dadi lahan sing migunani.

Pungkasané : Sugeng ngayahi ibadah Siyam, mugi tinam­pi déning Allah SWT lan kita kasil dadi wong sing taqwa. Aamiin !!! (MW).

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik