Berase Egin Larang Baen Koh...
Diposting oleh : Administrator
Kategori: Banyumasan - Dibaca: 167 kali

Awan kuwe, kaki Bawor lagi jagongan dopokan nang teras karo mas Gatot sing bukak warung internet. Ujug-ujug mbekayu Tebok teka, de tutna Darman Betor sing mbrengkut nggawa blanjan sekang pasar, egin nang latar wis celuk-celuk ngundangi Kaki Bawor, “Ramane... Ra­mane.. Dhuwite kurang kiye. Berase ketan mundhake larang banget, dadi durung sida ketuku lah....”

Kaki Bawor kaget, gole mangsuli mandan nyentak,“Seh, seh, Tebok... Aja seru-seru. Blanja dhuwite kurang, gole ngomong seru temen, ngantekan wong saerte krungu ka­beh. Jan ngisin-ngisinaken banget lhuh....”

“Eh, agi ana tamu yah? Nuwun sewu ya Mas Gatot. Ngapurane Ramane, inyong agi mbedhedheg kiye koh.” Saurane mbekayu Tebok, terusan prentah maring Darman Betor, “Kang Darman, kuwe blanjane tulung disogna nang pawon sisan.”

Darman Betor sing mbrengkut nggawa blanjan, ngun­clug bablas maring mburi. Mbekayu Tebok kayonge  ke­keselen, njuran mapan njagong nang sandhinge ramane.

Kaki Bawor takon, “Anu mbedhedheg kepriwe koh?”

“Genah ujare inyong, dhuwit sekang rika kae, cukup nggo blanja, jebule kurang, Sing ora memper, masa sih berase ketan saiki nganti tekan rolikur ewu sekilone,” mbekayu Tebok gole mangsuli karo isih njepaprut. “Mangkane inyong wis kadhung saguh maring bibine, garepan nggawekaken lemper rong puluh kilo dienggo mbarang gawene ngesuk kuwe. Mumet, mbokan?”

“Iya aja njepaprut kaya kuwe, Tebok. Mbokan dadi ora ikhlas gole garep nyumbang bibimu,” kandhane Kaki Bawor karo menyat nggogohi dhompete sing nang sak mburi, di bukak, terus nyeler dhuwite sing abang-abang ana limang lembar diwehaken maring mbekayu Tebok. “Kiye, nyah, tek tambahi, cukup mbokan? Nganah mangkat maning maring pasar, ben dijujugna Darman sisan.”

“Eh, kesuwun Ramane he..he.. Ramane inyong jan eman pisan,” wangsulane mbekayu Tebok mbungahi. Kebeneran Darman metu sekang mburi. “Kang Darman, mayuh mangkat maring pasar maning.” Darman Betor gagean semaur, “Iya mayuh.” Sidane wong loro kuwe lunga maning.

Kaki Bawor bisane mung gedheg-gedheg karo mapan njagong maning. “Iya kepriwe maning, genah pancen regane beras apa baen saikine agi larang. Gumune inyong, senajan pemerintah liwat Operasi pasare Bulog ya wis mbudidaya srana adol beras murah, terus dumdum beras gratis nganti ton-tonan, liwat Bantuan Sosial Beras Sejahtera (Bansos Rastra) maring saben Keluarga Penerima Manfaat (KPM). Ningen nyatane, berase egin larang baen, koh....”

Klilan.

 

Berita Terkait

img

Samak Minggu Ini

img

img

Sumber Semangat

Aja gumedhe mung merga ayu-ne rupa, amarga kuwi bakal luntur dening wektu. Nanging elinga, ayune kridha ora bakal luntur senajan digawa mati pisan...

Klik

NGANTUK

Ora kober ndlosor, semendhe ing tembok uga ora apa-apa. Mangkono mbokmenawa ujare si meong iki. (d/sit)***

Pethilan

Trilyunan rupiah dhuwit negara mili menyang desa

Koruptore aja nganti katut keli

Lumantar gerakan #2019Pilpres Ceria, Mahfud MD ngajak publik milih kanthi cerdas

Amarga kecerdasan kita wis saya ilang akibat memusuhan

Golkar ngukuhi caleg mantan koruptor

Ngajab para pemilihe padha pikun!