Tim Thomas lan Uber Indonesia mung Kari Jaga Kondisi
Diposting oleh : Administrator
Kategori: Olahraga - Dibaca: 28 kali

Kurang saka rong minggu, Indonesia bakal ambyur ing Piala Thomas lan Uber 2018. Lara lan tatu dadi rong bab kang kudu diwaspadani tim.

Piala Thomas lan Uber bakal di gelar ing Impact Arena, Bangkok, Thailand, tanggal 20-27 Mei. Kontingen Indonesia kang jumlah totale wong 45 dijadwalake mabur menyang Bangkok tanggal 16 Mei mengko.

Jroning ngisi wektu kang ana, tim dituntut amrih bisa njaga kondisi supaya aja nganti lara utawa tatu. Bab iku dikandhakake pemain gandha putra Marcus Fernaldi Gideon nalika ditakoni bab persiapan akhir dheweke lan kanca-kancane.

“Fokus kita saiki piye supaya aja nganti lara lan tatu merga yen arep ditingkatake maneh teknik lan fisike angel. Waktune wis mepet,” ujare Marcus.

“Dadi kita jaga wae lan kita wis ngerti mungsuh sapa wae dadi aja lena lan tetep nyinaoni (lawan),” bacute.

Ing Piala Thomas, Marcus sakancane bakal ngliwati babak penyisihan grup kanthi ngadhepi Korea Selatan, Kanada, lan Thailand.

“Sajake ketemu Thailand (gampang), tansah menang. Gandha pertama (Thailand) wis ketemu ing India, banjur Korea durung tau ketemu merga akeh gandha lan junior anyar, mesthi ora gampang. Atlete mesthi pengin ngalah­ake kita merga kita ora tau kalah sajege nem wulan ke­pung­kur. Sauntara kuwi Kanada sajake uga ora pati (ka­ngelan)” imbuhe Marcus.

Gegandhengan karo bab iku, Sinyo, julukan akrabe Marcus Fernaldi Gideon, optimistis Tim Thomas Indonesia bisa juara grup.

“Yen aku optimistis banget ya bisa juara. Aku yakin tim iki luwih kompak lan luwih siap kanggo Thomas Cup taun iki,” jlentrehe.

Tim Piala Uber Indonesia Diajab Lolos dhisik saka Fase Grup

Sauntara kuwi Kepala Bidang Pembinaan lan Prestasi Pengurus Pusat Persatuan Bulu Tangkis Seluruh Indonesia (PP PBSI), Susy Susanti, ngan­dhakake lolos fase grup dadi target awal kanggo tim putri ing Piala Uber 2018.

“Yen ing sektor putri, kita (Indonesia) sak grup karo China, Malaysia, lan Perancis. Tim kang kegolong angel jelase China lan Malaysia,” ujare Susy marang para awak media.

“Minimal kita lolos dhisik wae saka fase grup, utawa paling ora bisa nggayuh peringkat ka-2 grup. Ideale, kita kudu bisa ngalahake Perancis lan Malaysia,” tuture. Susy uga nambahake yen fisik kabeh para pemain tim Uber Indonesia jroning kondhisi apik. Pemain gandha putri, Della Destiara Haris, kang sempat ngalami tatu ing Kejuaraan Bulu Tangkis Asia 2018 uga siap diandelake ing laga Piala Uber mengko.

“Tatune Della satemene ora pati nemen. Dinane iki pemulihane wis dilakoni. Kulit tapak sikile mung pecah,” ujare Susy.

“Sing jelas, intine kondisi fisik mesthi kita jaga. Kita uga kudu wiwit ngatur strategi lan ndeleng kekuwatan lawan” imbuhe maneh.

Ing ajang Piala Uber, Indonesia kacathet wis kaping telu dadi juara yaiku taun 1975, 1994 lan 1996. Ing Piala Uber 2016, Indonesia dadi runner-up fase grup sangisore Thailand. Tim iki sabanjure disingkirake dening Korea Selatan ing babak perempat final.

(d/ist)

Berita Terkait

img

Samak Minggu Ini

img

img

Sumber Semangat

Yen kowe weruh semut kepleset lan ceblok ing banyu, mula angkaten lan tulungana dheweke...  Sapa ngerti kuwi dadi sebab anane ampunan tumrapmu ing akherat mengko.

Klik

FESTIVAL CAGANARES

Caganers yakuwi sawijining festival kang dianakake saben wulan Desember ing daerah Catalunya utawa Barcelona, Spanyol. Festival iki bakal ndadekake sapa wae gedheg-gedheg. Kepriye ora, merga masyarakat ing kono ngumpulake maneka figur tokoh dunia kang lagi mbukak kathoke lan (ngapunten) bebuwang. Tokoh duniane macem-macem, kaya Ronaldinho, Albert Einstein, Michael Jackson, Donald Trump, Barrack Obama, lsp. Festival iki ngemu teges yen sapa wae satemene padha tanpa ndeleng trah utawa jabatane nalika bebuwang. (d/ist)***

Pethilan

LP Banda Aceh ribut, 113 napi kabur

Sapa sing betah nang pakunjaran?

Cawe-cawene guru ora bisa digenteni

Apamaneh sing jenenge Pak Google

600 dina kasus penyerangan Novel durung kawiyak

Aparat lagi asyik ngetung dina mbok­menawa