Mikuwati Warga Liwat Bank Sampah
Diposting oleh : Administrator
Kategori: Yak Opo Kabare - Dibaca: 208 kali

Bank sampah RT-1 RW-11, Kelurahan Babat Jerawat, Kecamatan Pakal, Surabaya, dhek Selasa (1/5) kepungkur nampa kunjungan Wakil Wali Kota Surabaya Wisnu Sakti Buana.

Manut Wisnu-paraban aktabe Wisnu Sakti Buana- saliyane bisa nyiptakake lingkungan kang resik, bank sampah bisa mbiyantu perekonomiyane warga ngenggon. Sebab, pametune saka tabungan sampah kang dikumpulake bisa digunakake kanggo nyukupi kabutuhan padinan.

Anggone milih sampah, mligine sampah kering, uga bisa ditindakake, Yen sampah wis dipilah, cacahe mbuwang sampah ing tempat pembuangan akhir (TPA) bisa suda. “Mangga, bank sampah iki bisa dipertahanake,” ujare Wisnu marang warga.

Lilis Widiastuti, ketua bank sampah RT-1, RW-11, Kelurahan Babat Jerawat, ngandhakake yen kegiyatan kasebut wis kaleksanan meh patang taun. “Bank sampah ing kene madeg taun 2014,” kandhane. Carane gawe bank sampah iku sakawit saka kawigatene warga marang lingkungan sakiwa tengene. “Biyen ing kene garing ora subur, panas, lan mbuwange sampah durung diatur,” jlentrehe.

Nalika wiwitane nggawe, warga sing dadi anggotane ora diwenehi buku tabungan. Bathi kang diasilake uga mung didum rata. Nanging, anggota rumangsa upaya kang ditindakake kasebut durung tekan ing pantog. Wong-wong kuwatir tuwuh bantah-bantahan sapadha warga. “Saka kono, tuwuh gagasan saben uwong digawekake buku tabungan,” kandhane.

Warga sing kepengin nabung kudu dadi anggota bank sampah dhisik. Buku tabungan bakal diwenehake petugas. Anggone nimbang sampah ditindakake sesasi kaping pindho, yaiku minggu kaloro lan minggu kapapat. Sawatara iku,  dana diwenehake awujud sembako. “bisa diwujudake dhuwit. Nanging, warga kudu ngenteni dhisik setaun. Iku kang dadi pasarujukane,” tambahe Lilis. Ing tembe, rencanane programe jembarake asil kayadene kanggo mbayar tagihan listrik.

Saiki bank sampah kasebut wis nduweni anggota kehe wong 35. Lilis ngajap anggotane bisa tambah akeh maneh. Sasuwene iki, sing dadi rerendhet yaiku winatese tukang ngumpulake sampah. “Terkadhang dhuwite uga diutang dhisik dening tukang ngepul. Iku kang ndadekake dhuwit macet ora mlaku,” ujare.

Pehake ngajap Pemkot Surabaya gelem ngoordinasi pengepul khusus bank sampah. “Supya ora ana penyelewengan (dhuwit) lan anggone nukoni (sampah) ora sakarepe dhewe,” tandhese Lilis.

Ing kalodhangan iki Wisanu mratelakake, pehak bakal nggatekake perkara iki. Pemkot, ujare, uga duwe rencana kanggo ngadakake festival lan lomba-lomba kang gegayutan karo lingkungan. “Klebu festival bank sampah,” jlentrehe. (Bsh/Jp)

Berita Terkait

img

Samak Minggu Ini

img

img

Sumber Semangat

Yen kowe weruh semut kepleset lan ceblok ing banyu, mula angkaten lan tulungana dheweke...  Sapa ngerti kuwi dadi sebab anane ampunan tumrapmu ing akherat mengko.

Klik

FESTIVAL CAGANARES

Caganers yakuwi sawijining festival kang dianakake saben wulan Desember ing daerah Catalunya utawa Barcelona, Spanyol. Festival iki bakal ndadekake sapa wae gedheg-gedheg. Kepriye ora, merga masyarakat ing kono ngumpulake maneka figur tokoh dunia kang lagi mbukak kathoke lan (ngapunten) bebuwang. Tokoh duniane macem-macem, kaya Ronaldinho, Albert Einstein, Michael Jackson, Donald Trump, Barrack Obama, lsp. Festival iki ngemu teges yen sapa wae satemene padha tanpa ndeleng trah utawa jabatane nalika bebuwang. (d/ist)***

Pethilan

LP Banda Aceh ribut, 113 napi kabur

Sapa sing betah nang pakunjaran?

Cawe-cawene guru ora bisa digenteni

Apamaneh sing jenenge Pak Google

600 dina kasus penyerangan Novel durung kawiyak

Aparat lagi asyik ngetung dina mbok­menawa