Godhong lan Woh Makutha Dewa Bisa Kanggo Tamba Kanker Payudara
Diposting oleh : Administrator
Kategori: Kasarasan - Dibaca: 109 kali

Nitik jeneng ngelmu tetuwuhan tanduran makutha dewa (phaleria papuana), dinuga tandu­ran iki mujudake tanduran kang pancen asli saka laladan Papua (Irian Jaya). Ana kang nyebut beluntas Cina, nanging ing negara Tiongkok ngarani tanduran sing nduweni khasiyat anti radhang, penurun panas lan pemberih darah kanthi sebutan ‘shian tao’.

Ing Semarang lan sakiwa tengene udakara taun 2007-2008 tanduran iki nate dadi booming. Meh kaya jamane tan­duran gelombang cinta. Dadi kem­bang lambe saenggon-enggon. Krana ka­bare, godhong lan wohe makutha de­wa (sing mateng) ampuh kanggo ngu­sadani lelara kang kagolong abot. Kaya jinis lelara kanker, sirosis ati, diabetes, hipertensi lan lever.

Godhong makutha dewa kang wis tuwa nduweni kandhutan antihistamin, alkoloid, saponin lan polifenol. Dene wohe sing wis mateng (abang) minangka perangan kang akeh dimanfaatake kang­go ngusadani sawenehing lelara. Woh makutha dewa nduweni kandhutan al­koloid, tanin, flavonoid, fenol, saponin, minyak atsiri lan sterol.

Cangkang woh makutha dewa kang awujud bathok tipis sing ngayomi bakal wiji wis kabukten ampuh kanggo ngu­sadani lelara kanker payudara, kanker rahim, paru-paru kronis lan sirosis ati. Miturut kapustakan, cangkang kasebut pancen luwih mujarab yen dibandhing­ake karo godhong lan woh makutha dewa.

Woh makutha dewa kang ngandhut zat aktif alkoloid iki migunani kanggo netralake racun-racun njero badan. Zat saponin nduweni khasiyat anti bakteri lan virus, uga bisa ningkatake sistem imun (kekebalan) sarta nyuda kadar gula lan njendhelake getih, ngurangi kadar kolesterol, anti radhang, anti oksidan lan ngurangi kadar resiko penyakit jantung koroner. Polifenol kang dikandhut ing woh makutha dewa migunani dadi antihis­tamin (anti alergi).

Nitik kandhutan kang diduweni woh makutha dewa wis samesthine yen pa­nganggone kudu diati-ati banget, ora kena grusa-grusu alias sembarangan. Wis nate ana kang coba-coba gawe ra­cikan kasebut mung digodhog tanpa ukuran bahan lan banyune. Bareng di­unjuk, akibate banjur mabuk, ngelu lan ilat dadi kaku. Padharan rasane kaya dipluntir. Tundhone ya kudu digawa me­nyang rumah sakit.

Sing paling aman kanthi mundhut herbal kasebut ing toko-toko jamu. Ana sing wis wujud bubukan utawa teh racik. Dadi gampang banget cak-cakane (praktis), kathik wis dikantheni aturan panganggone.

Kanggo ngusadani marang sing nandhang kanker payudara lan kanker rahim stadium dini, bisa kanthi gawe teh racik sasendhok teh ditambahi kunir putih (instan) uga sasendhok teh banjur digodhog nganggo banyu 3 gelas disat­ake nganti karo separo (karotengah ge­las). Sawise adhem bisa diunjuk sete­ngah gelas wayah esuk, awan, lan sore. Perlu wektu kang suwe ngunjuk racikan iki, udakara 2-3 sasi.

Mungguh kanggone sing nandhang lara diabetes, mundhut racikan sasen­dhok teh ditambahi godhong salam sing isih seger telung lembar. Nuli digodhog nganggo banyu 3 gelas nganti umob, banjur disatake nganti kari separo. Di­unjuk sedina kaping telu wayah esuk, awan lan sore setengah gelas. Diambali nganti 10-14 dina.

Muga-muga klawan irah-irahan ka­sebut ndhuwur bisa mupangati mung­guhing bebrayan agung.

Nuwun (FX)

Berita Terkait

img

Samak Minggu Ini

img

img

Sumber Semangat

Urip iki cekak banget yen mung trima diisi karo rasa gela lan benci.

Klik

TRADHISI KAUL LAN ABDA’U ING MALUKU TENGAH

Iki sawijining tradhisi mbeleh wedhus ngarepake Idul Qurban. Ditindakake kaping pindho, yakuwi sing umum sawise shalat idul adha, lan ana maneh sing khusus. Sing khusus kanthi mbeleh wedhus 3. Sadurunge dibeleh, tetelune wedhus iki digendhong jarit dening tetuwane adat lan diarak keliling sinambi sholawatan nuju pelataran masjid Negeri Tulehu sawise Ashar. Tujuane ritual iki kanggo tolak balak lan nyenyuwun panga-yomane Gusti Allah kanggo masyarakat Tulehu. (d/ist)

Pethilan

Polri wiwit ngrasakake anane konflik pemilu

Digulung wae pak

Pasangan capres-cawapres setuju pemilu dhame

Pendhukunge sing dikon gontok-gon­tokan

Capres-cawapres nyiapake tim sukses

Sukarelawan, nanging ana pamrih