Ditemokake Mumi Alien Driji Telu
Diposting oleh : Administrator
Kategori: Rena-rena - Dibaca: 11 kali

Gaia.com, 20 Juni 2017 kepungkur nglansir pawarta sensasional kang kuwawa gawe horege jagad. Manut situs web sing isi kontene pancen mligi ngrembug babagan pseudo-scientific, UFO, alien, sarta fenomena paranormal iki, ing saweneh ekskavasi ing laladan gurun kapencil Nazca, Peru, Amerika Kidul, kasil ditemokake  mumi alien adriji telu cacah papat. Mayit garing kang dipesthekake dudu golongane menungsa bumi kasebut samengko nembe diteliti dening para ilmuwan kelas donya.

Pakar sing disebut-sebut melu  jroning kegiyatan mau antara liya Melissa Tittl (Director of Original Content ), Jay Weidner (Senior Director of Content) saka Gaia.com. Uga Dr. Konstantin Korotkov PhD (Russian National Research University), Natalia Zaloznaja MD PhD (ahli analis tulang tengkorak), kekarone saka Rusia. Sarta  Dr. José de Jésus Zalce Benitez (National School of Forensic Medicine of Mexico), M.K. Jessie (University of Colorado Hospital, Amerika Serikat), dalah jurnalis senior kawentar ngenani konspirasi UFO lan alien asal Mexico, Jaime Maussan.

Wektu didhudhuk saka pendheman lemah, posisine mumi lungguh ndhodhok. Sikil nekuk, tangan nyilang ing dhadha. Driji sikil kiwa-tengen apadene tangan kiwa-tengen mung cacah telu, relatif dawa-dawa. Gulu setengah muntir, sirah lonjong tanpa kuping rada nengleng manengen. Sepasang matane bunder gedhe, sing kiwa merem, sisih tengen katone wis rusak. Saka uji carbon 14 sarta sampel DNA, umure kira-kira 6500 taun.

Asil paniliten nyebutake, mumi cacah papat mau jinis lanang, awit nduweni kromosom Y. DNA-ne dumadi saka 23 pasang kromosom.Tim panaliti isih nganalisis apa kabeh unsur kromosom kasebut uga kabentuk saka asam amino kaya lumrahe uwong. Nanging struktur anatomine babar pisan ora nuduhake ciri-cirine menungsa. Bebalungan sisih ndhuwur, upamane, arupa tunas, dene igane mbentuk setengah lingkaran. Rongga irung ilang, lengkung superciliary ing alis ora ana. Sing luwih nggawokake, perangan uwang ngisor kaku nyawiji karo cumplunge.

Sauntara kuwi organ isen-iseneing weteng uga isih katon cetha. Iki nuduhake yen makhluk kasebut dudu mumi. Sebab, mumi umume tanpa jeroan. Nanging luwih trep disebut mayit sing diawetake kanthi cara dilumuri nganggo bahan sejenis semen kuna werna soklat nom. Kabukten ditemokake anane unsur kadmium klorida minangka bahan kanggo proses pengawetan.

Diadhepake sawernaning fakta nganeh-anehi kasebut njalari para ahli kodheng gawe kesimpulan kang bisa dipertanggung jawabake sacara ilmiyah. Kanggo sauntara wektu Konstantin Korotkov ngaku mung bisa kandha, mumi misterius mau mujudake makhluk humanoid mirip menungsa, nanging cetha dudu spesies menungsa. Luwih cethane, sambunge professor saka  Russian National Research University mau, “Sapa lan apa satemene makhluk iki durung bisa disimpulake”.

Wis suwe tuwuh teori spekulasi sing nyoba ngubungake Gurun Nazca klawan eksistensi alien. Ing padang cengkar ngilak-ilak kang dumunung neng negara Peru  kuwi akeh tinemu artefak kuna arupa garis-garis diagonal simetris sing mbentuk maneka pola gambar memper kewan, kaya ta tarantula, manuk, lan sapanunggalane. Ambane saben pola utawa biomorp watara 50 engga 1.200 kaki. Dene dawane garis-garis luruse nganti prang-pirang kilometer. Karana ukurane kang reseksa, biomorp-biomorp mau satemah cetha ditonton saka akasa.

 

Makhluk Antar Galaksi

Manut panemune Erich von Daniken, mung makhluk super cerdas kang mampu nyipta pola mengkono mau. Kamangka teknologine menungsa bumi adoh ing jaman kawuri kena dikandhakake isih  prasaja banget. “Aku yakin Nazca Lines mujudake petunjuk navigasi pesawat-pesawat antar galaksine alien,” kandhane.

Kanggo ndhukung teorine pakar asal Jerman kasebut ndumuk lukisan-lukisan purba – petrolyph – sing akeh ditemokake ing watu, pyan, sarta dinding-dinding guwa neng Gurun Nazca. Gambar-gambar mau nglukisake paraga sirahe mawa antene. Ana maneh sing menganggo masker memper astronot, lungguh ngadhepi maneka piranti kaya neng kabin pesawat.

Sadurunge iki serial cumplung wangun lonjong dawa pancen asring ditemokake neng laladan kene. Kanggo ngelompokake antarane temon siji lan sijine, artefak-artefak langka sing disebut-sebut tengkorak alien mau ditengeri kanthi maneka aran, kaya ta Paracas Skull, Crystal Skull, sarta Star Child.

Beda panemu sekelompok ahli nandhesake, ilmu pengetahuan engga samengko during kuwagang aweh bukti anane kunjungan makhluk luwar akasa super cerdas menyang bumi. Petrolyph jroning guwa, kalebu gambar-gambar makhluk adriji telu ing watu-watu, ora tinutup kemungkinan mung asipat khayali. Utawa, bisa uga mujudake produk kabudayan tradisi kang rapet gandheng cenenge karo saweneh sistem piandel utawa agama purba.

Manut antropolog kelompok kontra iki, cumplung lonjong asil saka praktik kuna kang disebut ‘deformasi kranial artifisial.’ Lire, wangun tengkorak dawa kasebut sengaja digawe. Carane, wiwit isih bayi sirahe bocah-bocah jaman peradaban prasejarah mau diblelet kain – kepara mbokmenawa digapit nganggo papan kayu – nuli ditaleni kenceng, engga wekasane dadi malih lonjong. Tumindak mengkono mau mujudake perangan saka praktik ritual keagamaan wektu kuwi. Dene sing diarani mumi alien driji telu, satemene ora liya ya mayite menungsa primitif asil proses deformasi kranial gaweyan kang sengaja dibentuk kaya mengkono.      

Tim periset dhewe tumeka dinane iki isih nyrempeng ngadani panaliten. Raymundo Salas Alfaro nelakake, adhedhasar pemindaian data komputer assisted test (CAT) mumi-mumi kang ditemokake mau temen-temen nate urip. Saben mumi, miturut pakar radiologi Peru kasebut, wis dianilisis kepadhetan balunge. “Luwar biyasa. Khususe struktur balung perangan dhasar cumplung nuduhake ciri mligi. Salah siji keanehane dumunung neng posisine foramen magnum, yaiku titik sambunge syaraf tulang mburi klawan cumplung.

Sacara ilmiyah kabukten tengkorake mumi alien iki duwe rongga kranial saemper menungsa, nanging nduweni sawetara perbedaan. Kesimpulane, makhluk iki asli. Tegese, dudu produk deformasi kranial artifisial “ ujare. Ketang aenge, ilmuwan forensik José de Jésus Zalce Benitez kang melu jroning proyek panaliten mratelakake, “mumi driji telu kasebut ndadekake kita meres pikir yen iki dudu spesies menungsa”.

Panemu sairip diucapake Dr Edson Vivanco. “Mbentuk cumplung dawa lonjong dudu gaweyan mayar, kepara kena diarani nglengkara. Umpamane, ngenani struktur internal tengkorak kita bisa nemokake jaitan parietal, sutra oksipital, jaitan ngarep, lan akeh karakteristik liyane kang kena kanggo dhasar nyimpulake yen tengkorak iki nyata sarta asli,” tandhese.

Profesor Konstantin Korotkov nambahake, tahapan panaliten kang sepisanan arep mbuktekake yen mumi mau asli, dudu plastik, apamaneh kertas. Bacute ngadani penanggalan karbon dalah nganalisis struktur awak. Diterusake pemindaian CAT kanggo nyatakake menawa tubuh utawa badhane mumi mau asli. Pungkasane mengko naliti kepiye cara kerjane tangan sarta sikile sing mung duwe driji telu. Manut asil serangkaian tes kang wis dilakoni, Korotkov ora duwe keraguan maneh yen driji telu kasebut mujudake bageyan asli. Lire, dudu menungsa primitif sing perkembangan fisike sengaja digawe mengkono. Utawa, menungsa purba sing ngalami cacat fisik. “Cekak cukupe, materi kang lagi tak teliti sakanca iki babar pisan durung nate diprangguli sadawaning sejarah temon-temon fosil ing lumahing bumi,” kandhane  professor saka  Russian National Research University kuwi. Pakne Puri

Berita Terkait

Samak Minggu Ini

img

img

Sumber Semangat

Wong kang nglarani awakmu, yen dudu luwih kuwat ya luwih ringkih saka awakmu. Tumrape sing luwih ringkih saka awakmu, apu-ranen. Lan kang-gone kang luwih kuwat, apuranen awakmu dhewe.

Klik

PATUNG RASEKSA MAO ZHEDONG

Patung emas raseksa tilas pemimpin Cina, Mao Zedong ing desa Tongxu, Henan, Cina. Patung kang dhuwure 36,6 meter mawa cet emas iki madeg ing sandhuwure pategalane warga, ing desa Tongxu, provinsi Henan, Cina. Ragad kang dientekake kanggo mbangun patung iki kurang luwih Rp 6,3 milyar. Mao Zedong mujudake presiden pisanan negara pandha kang kuwasa suwene 27 taun. (d/ist)***

Pethilan

Rega pangan ngadhepi pasa dijamin

Pengin murah, tuku nang koran ae!

Gaya ngadibusanane Pres. Jokowi mujudake strategi komunikasi

Ana sing nggaya ote-ote uga

Legislator kena OTT KPK maneh. Ketua DPR Bambang Soesatyo nga¬jab iku kang pungkasan

Pungkasan sing korupsi apa pung­kasan sing konangan?