Climbing World Cup Bakal dadi Aksine Tukang Menek
Diposting oleh : Administrator
Kategori: Olahraga - Dibaca: 109 kali

Seri pertama Climbing World Cup bakal dadi ajang Aspar Jaelolo nuduhake kawegigane ing kategori speed.

Priya kanthi julukan si Raja Menek iku dadi andel-andele tanah air sawise taun kepungkur kasil nggawa mulih perak.

Dheweke mung kalah 1/100 dhetik saka lawane ing final, Aleksandre Shikov (Rusia).

Cathetan wektu kang dipethik Aspar 6,33 dhetik dene Shikov 6,32 dhetik.

“Modhal latihan patang wulan ing Yogyakar­ta wis mateng banget. Kejaba medhali emas aku uga pengin nyetak rekor dunia,” ujare putra daerah asal Sulawesi Tengah iku.

Rekor dunia paling cepet sasuwene iki di­cekel dening Reza Alipourshena asal Iran kanthi cathetan wektu 5.62 dhetik.

“Kita wis bisa mecahake satemene ing sesi latihan. Saiki kari piye kita bisa cakake ing kejuaraan dunia mengko” pangajabe priya umur 19 taun mau.

Aspar ora teka dhewe mengko, dheweke bakal diam­pingi 15 atlet liyane.

Para atlet iki mangkat dina Selasa, (17/4/2018).

Kabeh padha siap melu telung seri world cup kang digelar International Federation Sport Climbing (IFSC) sasuwene sesi April-Mei 2018.

Katelune seri iku yakuwi pertandhingan ing Moskow, Russia, tanggal 20-23 April, pertandingan ing Chongqing, Cina, tanggal 5-6 Mei, lan pertandhingan ing Tai’an tanggal 12-13 Mei 2018.

 

Somad Melu Piala Dunia ing Rusia

Sauntara kuwi, Indonesia bakal ngirim tim menyang Piala Dunia anak-anak jalanan 2018 kang bakal dianakake ing Rusia. Tim kang mawa anggota bocah-bocah pepriman umur 14 taunan iki bakal saingan karo 23 negara ing saindenge donya jroning Piala Dunia sepakbola anak-anak jalanan tanggal 19-26 Mei iki. Salah sijine kang bakal budhal yakuwi Somad. Bocah Jakarta umur 14 taun iki manggon karo wong tuwane kang dadi pemulung ing Bekasi. Ing omahe kang seseg kanthi ukuran 45 meter pesagi, keluarga Somad kudu andum panggonan karo patang keluarga liyane.

“Ora akeh bocah kang beja kaya aku” ujare Somad.

“Aku mung pengin keluargaku urip luwih becik lan ora dadi pemulung maneh.”

Saliyane melu turnamen, bocah-bocah Indonesia iki uga bakal melu ing kegiatan kesenian lan acara liyane.

“Aku pengin mbantu tim Indonesia. Nanging dudu kanggo pamer-pameran,” ujare Bayu, striker tim.

Tim iki mujudake pilihan saka 90 bocah kang disaring. Piala Dunia anak-anak jalanan iki bakal dieloni luwih saka 200 bocah saka 24 negara saindenge donya. Ing Piala Dunia 2014 kepungkur, tim Tanzania kasil dadi juara, dene tuan rumah Brasil dadi juara ing bagian puteri. Nalika pisanan digelar ing Afrika Selatan taun 2010, tim Inggris kang dadi juarane.

Pelatih tim Indonesia, Wahyu Kurniawan ngandhakake anak-anak jalanan saka perkampungan miskin uga nduwe­ni semangat kanggo dadi pemain bal-balan profesional.

“Anak-anak jalanan luwih aktif lan nduweni kekuwatan lan semangat luwih,” ujare Wahyu. (d)***

 

Berita Terkait

img

Samak Minggu Ini

img

img

Sumber Semangat

Yen saperangan gedhe urip kita en­tekake kanggo mu­lang, mula kita bakal dikenal mi­nangka guru nali­ka kita ma­ti. Yen kita entekake wek­tu kita kang­go main, kita mati mi­nangka gamers.

Klik

PERANG TOPAT

Ing Lombok Barat, NTB, ana tradhisi unik kang arane Perang Topat. Tradisi iki digelar sasi November-Desember, utawa sawise panen lan sadurunge mangsa tandur maneh. Masyarakat suku Sasak lan warga keturunan Bali ing Lombok Barat nggelar ritual iki bebarengan ing Pura Lingsar. Puncake perayaan ditindakake kanthi tradhisi pujawali perang topat utawa padhadene nyawatake kupat ing antarane warga. Ora ana rasa mangkel utawa memungsuhan ing acara kang wis umur atusan taun iki, sing ana malah rasa sukacita tumrap warga kang beda-beda agamane ksb. (d/sit)***

Pethilan

Hoaks luwih ngrusak ing negara berkembang

Ana sing seneng rusak-rusakan

Wajib njaga legitimasi Pemilu 2019

Sauger menang, apa wae ditindakake

Pradebat capres batal, paslon gela

Sabar… ngenteni kasus dagangan 80 yuta iku lerem dhisik