Petik Laut Ing Kabupaten Banyuwangi
Diposting oleh : Administrator
Kategori: Kejawen - Dibaca: 200 kali

Upacara adat Petik Laut ing Kabu­paten Banyuwangi minangka upacara kanthi maksud kanggo nyenyuwun kasla­metan lan pangayoman anggone ngu­padi rejeki ing tengahing segara, sarta kanggo nyenyuwun anggone golek iwak supaya olehe akeh. Panyuwun kasebut katujokake marang Gusti Kang Akarya Jagad. Upacara Petik Laut ing Kabupaten Banyuwangi ing antarane yaiku: upacara Petik Laut Muncar, Petik Laut Blimbing­sari, Petik Laut Grajagan, lan Petik Laut Lampon.

Upacara Petik Laut Muncar dileksa­nak­ake saben taun sadurunge mangsa panen iwak, mangsa panen iwak ing Kabupaten Banyuwangi dumadi ing wektu angin Timur (wetan) lumaku ing Selat Bali lan sakitere. Upacara paling gedhe dipunjerake ing Muncar krana wilayah iki minangka pusat (punjer) penangkapan iwak paling gedhe ing Banyuwangi, upacara ditindakake kanthi menehi ubarampe tartamtu ing tengah­ing segara. Ubarampe sesaji kasebut arupa bahan panganan utawa panganan sing dideleh ing prau-prau cilik. Kanthi kairing puluhan prau hias, prau-prau cilik kang isine ubarampe sesaji kasebut diga­wa menyang tengahing segara, tumuju arah bagian wetan saka Tanjung Sembulungan. Ing kana maneka uba­rampe sesaji sing ana prau cilik banjur diklelepake de­ning para nela­yan sing isih ta­runa kang cukat lan trengginas. Sabanjure prau-prau liyane muter-muter ngubengi papan sing dinggo ngle­lepake ubarampe sesaji, sapur­nane upacara prau-prau kase­but age-age pu­ter haluan tumuju arah ngulon saka Tanjung Sembu­langan lan man­dheg ing kana. Para nelayan banjur lumaku tumuju menyang makam sing dipercaya minangka makame tokoh nelayan kang diurmati dening para nelayan ing Banyuwangi.

Upacara adat Petik Laut Blimbingsari dileksanakake kanthi ancas tujuan kanggo nyenyuwun kaslametan tumrap warga desa, utamane para nelayan. Wiwitane dileksanakake kanthi larung sesaji, ning saiki larung sesaji diganti kanthi istigosah, yaiku nindakake ndonga bareng-bareng sacara Islam. Ing upacara iki digelar kesenian tradhisional Banyuwangi.

Upacara adat Petik Laut Gra­jangan dileksa­nakake ing Pe­sisir Grajangan, upacara iki kan­thi ancas tujuan kanggo nyenyu­wun kaslametan lan kasejah­te­raan tumrap ne­layan Graja­gan lan kulawar­gane. Upacara Petik Laut Graja­gan tansah diba­rengi kanthi nga­nak­ake ritual ing ma­kam leluhur kang sinebut Buyut Gra­jangan. Ing makam iki digelar tarian Gandrung lan sesembahan arupa sesa­jian, dibacutake kanthi Ider Bumi, yaiku ngubengi wilayah kanthi mlaku sikil. Penari Gandrung lan panjake ana ing barisan paling ngarep, satekane ing TPI (Tempat Pelelangan Ikan) iring-iringan banjur ngleksanakake larung sesaji lan dibacutake kanthi pentas kesenian Gandrung sewengi natas.

Upacara adat Petik Laut Lampon dileksanakake dening masyarakat nelayan sing golek iwak ing kawasan Pesisir Lampon, upacara Petik Laut Lam­pon miturut ujare kandha wis dileksa­nakake wiwit taun 1927. Ing upacara iki ditindakake tirakatan utawa mesu brata, yaiku ngurangi kenikmatan kanthi cara ora mangan, ora ngombe lan ora among. Ing wektu iki acara tirakatan mung ditindakake dening sawetara wong wae, ora beda kaya upacara petik laut ing papan liya upacara Petik Laut Lampon uga kanthi ancas tujuan amrih para nelayan lan kulawargane didohake saka musibah utawa malapetake, lan asile golek iwak banjur oleh akeh. Ubarampe sesaji sing digawe katujokake marang panguwasa Segara Kidul kang sinebut Mbok Ratu Mas. Sasuwene upacara petik laut digelar maneka jinis kesenian dhae­rah kang diduweni dening masyarakat Banyuwangi. (*)

Berita Terkait

img

Samak Minggu Ini

img

img

Sumber Semangat

Ora ana sing ora bisa diikhlasake...

Klik

OJEK MAYIT

Ojek mujudake salah sijine jasa angkut migunakake sepedhahmotor. Ing jaman modern saiki, jasa iki malah bisa dipesen liwat HP, yakuwi kang diarani Ojek Online (Ojol). Ojol ora mung ngeterake wong, nanging uga panganan, barang lan blanjan. Nanging senajan wis modern, pranyata ojol ing Indonesia isih klebu biyasa-biyasa wae. Beda karo ojek ing Kongo, Afrika. Ojek ing kene ora mung bisa ngeterake blanjan utawa panganan wae, nanging uga ngeterake mayit! Carane nggawa kanthi cara dibonceng ing mburi lan ditaleni rapet karo tukang ojeke. Maklum, mayit kuwi ora bisa nggamblok dhewe... (d/ist)***

Pethilan

Akibat anane lindhu, pegawe hotel lan restoran dikon prei

Ujian kanggo kita kabeh minangka bangsa Indonesia

Idrus Marham durung karep dadi justice kolaborator

Mbokmenawa isih bingung milih je­neng-jeneng kang pantes di-‘nya­nyek’-ake

Asil ing Asian Games 2018 dadi tetenger gumregah

Kabeh kanggo Indonesia