Anomali Pasar Beras: Ruwet lan Mbingungake
Diposting oleh : Administrator
Kategori: Pangudarasa - Dibaca: 12 kali

Nganti saiki, beras isih dadi komponèn utama uripé warga kelas ngisoran (rakyat jelata). Pemerintah uga tansah dibiji kasil utawa ora saka kewasisané ngemo­nah rega beras. Yèn beras regané murah ateges pemerintah sukses mimpin negara. Suwaliké yèn beras regané larang, pe­merintah uga dianggep gagal, ora becus, awit gagal ngatur reregan pangan.

Ngadhepi wulan pasa lan bada (Iedul Fitri), masyarakat uga isih mbiji kanthi ndeleng reregan pangan. Najan pemerintah kasil ngopèni infrastruktur kanggo lalu-lintas mudhik, yèn rega beras dhuwur (ora terjangkau), sengara rakyat mbiji peme­rintah kasil. Mula jajaran kabinet bidhang ekonomi mesthi kerja keras supaya bisané beras murah nalika wulan pasa lan bada.

Saka pengalaman puluhan taun, titik kritis cadhangan beras kedadéyan saben 31 Desember. Cadhangan beras saora-orané kudu cukup kanggo konsumsi telung wulan (Desember – Pebruari), utawa ± 9 yuta ton. Bab iki gegandhèngan karo irama tandur serentak sing ngasilaké panèn sing ajeg, mangsa panèn  (Pebruari – Mei) kanthi asil 60-65 % saka total prodhuksi, panèn gadhu  (Juni- September), asilé 25-30 % saka total prodhuksi, lan mangsa paceklik (Oktober – Januari).

Sing dadi masalah, cadhangan beras 31 Desember 2017 asor, kurang saka 1 yuta ton. Iki bisa dideleng saka stok awal Bulog taun 2018 sing mung kari 700.000 – 800.000 ton beras. Sawijining  gunggung sing sithik banget dibandhingaké stok awal jroning 10 taun pungkasan sing watara 1,3 -  1,5 yuta ton. Stok sing sithik mau njalari pasar beras gampang dadi panas. Ora mung merga pemerintah ora duwé instrumen sing pantes, nanging beras semono mau ora cukup kanggo ngo­reksi kegagalan pasar. Ing kahanan ngéné iki, pasokan gabah / beras mundur saka pakulinan. Anomali Iklim / cuaca njalari mangsa tandur lan panèn mundur saka Pebruari dadi Maret. Gabah / beras asil panèn Maret lagi ngisi sebagiyan pipa (pipeline) distribusi sing kekuras nalika paceklik lan anané kebijakan anyar.

Saiki cadhangan beras pemerintah kapétung deficit 27.888 ton, ateges stok cadhangan beras pemerintah wis entèk, lan pe­merintah utang beras semono akèhé marang Bulog, uta­mané kanggo ngisi kebutuhan intervensi rega liwat operasi pasar. Total stok beras sing ana ing gudhang Bulog isih ana 642.612 ton. Kahanan ngéné iki ora mung ndadèkaké miris merga logistik pemerintah ndrawasi, nanging uga mbingungaké publik. Awit ing manéka kalodhangan, Kem. Pertanian tansah ngupaya ngyakinaké publik yèn prodhuksi beras aman lan stok cukup, kalebu nyebaraké foto sing isiné info panèn ing sadhé­ngah lokasi. Malah sasi Maret 2018 iki disebut puncak panèn sing jembaré 2,25 yuta hektar lan prakiran prodhuksi 7,4 yuta ton.

Nyatané, rega beras isih tetep dhuwur. Penyerapan gabah/beras déning Bulog uga durung signifikan. Pusat Informasi Harga Pangan Strategis Nasional nyathet, yèn rega beras rata-rata Rp 11.900 / kg , isih sak ndhuwuré HET. Dhuwuré rega uga bisa kagambaraké saka sereté penyerapan beras déning Bulog. Sepréné, penyerapan lagi olèh 145.641 ton, ± 5,3 % saka targèt. Mangka biyasané panèn mangsa rendhengan bisa nyerap 60-65 % saka targèt setaun.

Banjur, généya panèn durung bisa ngudhunaké rega beras? Jalarané : siji, asil panèn isih dadi buruané tengkulak pengusaha penggilingan lan pedagang kanggo ngisi stok sing kothong. Loro, rega gabah kedhongkrak ketentuan fleksibilitas rega pem­belian déning Bulog, sing gedhéné 20 % sandhuwuré HPP. Telu, panèn raya mundur, prodhuksi pari pancèn sangi­soré perkiraan.

Apa pancèn ana “permainan” saéngga rega beras tetep dhuwur? Kahanan sing uwis bisa dadi pasinaon. Tudhuhan tanpa bukti kuwat ora bakal bisa ngrampungi masalah, malah njlomprongaké pengusaha marang kebangkrutan. Kaya ngendikané Wapres JK ing sawijining kalodhangan, yèn kejaba ngoptimalaké pemanfaatan sains lan teknologi, cara sing paling apik kanggo ndhongkrak prodhuktifitas lan prodhuksi pangan, yaiku kudu kanthi fokos marang ngundhakaké kese­jahteraan petani minangka pelaku utama; ora kanthi cara peksan utawa tekanan. (MW)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!