Kita Kudu Ngerti Tandha-Tandhane Saraf Kejepit
Diposting oleh : Administrator
Kategori: Kasarasan - Dibaca: 11 kali

Balung geger (spine) manungsa iku sap-sapan saka 32 ros balung. Sap-sapan iki banjur kaperang dadi 5 juring utama nglimputi sap-sapan balung cervical/gulu, thorakal, lumbar/balung geger ngisor, sakral lan coccyx/balung buntut. Ros-rosan balung geger baris tumata apik, cilik ing ndhuwur lan saya gedhe ing ngisor engga sakral.

Saliyane nyangga badan lan nyangga bobote sirah, balung geger gunane minangka papan kelete otot lan saraf-saraf wigati. Ing antarane ros balung geger, sinelip jaringan lunak kang disebut diskus intervertebra/diskus spinal, gunane kanggo ‘peredam kejut’ lan njaga kelemesane balung geger kanggo nggampangake sekabehing obahe badan. Inti diskus verbra, susunane sel-sele badan luwih lembut dibandhingake perangan ngisor (anulus), sing gunane kanggo ngayomi inti diskus kang arupa gel sing ing istilahe kedokteran disebut nucleas pulposus.

Diskus invebra, nalika isih anak-anak nduweni cairan kang cukup akeh lan lemes nyangga ros-rosaning balung geger. Saya tambahe umur, perangan saka proses tambahe tuwa, cairan diskus dadi saya suda. Akibate anulus dadi luwih atos lan gampang pecah.

Disebabake kakehan kegiyatan fisik utawa trauma, diskus verbra bisa nandhang rusak, arupa herniasi (tonjolan ora normal) saengga disebut herniasi diskus verbralis. Kahanan iki bakal ngganggu saraf ing sakiwa tengene balung geger, nuwuhake rasa nyeri, baal utawa ringkih lemese perangan lengen utawa tungkak. Herniasi diskus verbralis, sing nyebabake penetan marang saraf sacedhake, iki kang banjur ditepungi masyarakat minangka saraf kejepit (herniasi nucleus pulposus/HNP).

“Herniasi diskus ros balung geger ngisor luwih kerep kedaden, jalaran ros balung geger iki sing nyangga bobote badan anggone nindakake kegiyatan padinane,” ujare dr.Mahdian Nur Nasution, SpBS, ahli nyeri Klinik Nyeri dan Tulang Belakang Onta Merah, Jakarta. Ewasamono, herniasi diskus uga bisa kedaden marang susunan ros cervical, sakral lan thorakal, nanging cacahe luwih sethithik. Herniasi diskus vertebralis satemene kedaden marang wong diwasa umur kerja (21-59 taun) kehe 56%, nanging 35% ing antarane asipat asymptomatic, saengga ora nuwuhake tandha-tanda. Sisane sing 20% nduweni tandha-tandha wiwit entheng engga abot. “Sing teka menyang klinik umume sing wis abot, lan wis ora bisa nindakake kegiyatan,” tambahe Mahdian Nur.

Yen pawongan nandhang herniasi diskus balung geger, tandha-tandha wiwitan sing muncul yaiku rasa ora nyaman kaya nyeri ing laladan bokong, pupu, lan kentol/wentis. Sawatara yen herniasi diskus kedaden ing ros balung cervical, tandhane sing muncul arupa nyeri ing laladan lengen lan pundhak.

“Rasa lara iki bisa jumedhul nalika wahing, watuk utawa nalika ngo­bahake badan saka papan siji menyang papan liyane,” jlentrehe dr.Mahdian. Gringgingen lan mati rasa ing laladan tinamtu badan kang kedaden bola-bali uga bisa dadi tandha wiwitan anane herniasi diskus verbralis. Bisa uga ditandhani klawan lemese kekuwatan otot.

Tandha-tandha liyane kang bisa muncul akibat herniasi diskus utamane laladan balung geger yaiku sindroma cauda equana. Sanajan arang dumadi, sindroma cauda equana bisa nyebabake badan dadi lumpuh salawase tumrap sikil kekarone, utawa kangelan BAB lan nguyuh, sarta gangguwan neurologi liyane yen ora enggal ditambani.

Mula iku kita kudu waspada marang anane tandha-tandha kasebut. Saya kita luwih waspada, mula upaya pengobatan utawa penanganane bisa luwih gampang. (Ist)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!