Rekam-Cetak Puluhan Ewu E-KTP Dikebut Sadurunge Pilgub
Diposting oleh : Administrator
Kategori: Yak Opo Kabare - Dibaca: 6 kali

Warga sing rumangsa durung duwe KTP elek-tronik enggal lapuran menyang kecamatan, su-paya suk Juni bisa melu co-blosan.

 

Pemerintah Kecama-tan Semampir mbudidaya mesthekake kabeh wargane nduweni KTP elektronik (e-KTP) nalika pemilihan gubernur Jawa Timur suk Juni mengko. Engga saiki isih ana 34 ewu calon pemilih sing durung ngisi data biometrik ing laladan paling pasek pendhudhuk ing Surabaya kasebut.

Camat Semampir Siti Hindun Robba Humaidiyah ngandhakake, pehake lagi ngrikatake pencatatan biometrik lan pencetakan e-KTP ing daerahe. Klawan mangkono, kabeh wargane bakal bisa antuk hak kanggo nyoblos ing pesta demokrasi mengko. “Saiki dakprentahake ora perlu ngenteni. Yen wis ana ing dhaftar print ready record (PRR), langsung dicetak lan dikirim menyang kelurahan,” ujare

Mula iku, Siti sengaja nugasake pegawe kecamatan loro giliran bengi. Pegawe loro iku tugase nyetak wiwit sore nganti tengah wengi. Klawan mangkono, saben dina bisa nyetak e-KTP 300 lembar.

Pancen, tambahe Siti, beda bantere pencetakan antarane jam kerja lan ing sanjabane jam kerja cukup adoh. Nalika jam 07.00-16.00 WIB, bisa ngasilake paling akeh mung 35 lembar. Sebab, server nasional nalika awan alon banget.

“Yen bengi, loading-e mung etungan dhetik. Nanging, yen awan, e-KTP salembar wae mbutuhake wektu 3-5 menit. Malah, bisa luwih yen server-e down,” jlentrehe.

Ya, klawan cara kasebut bisa ndadekake cara kerjane Kecamatan Semampir kang klakon kuwalahan nyetak KTP dadi luwih becik. Sasi kepungkur, ing antarane 6.900 data PRR sing diwenehake, kari sewu sing durung dicetak. “Klawan tataran kaya ngene iki, Insya Allah kita bisa mburu supaya kabeh warga Semampir duwe e-KTP nalika pilgub,” tandhese Kasi Pemerintahan Kecamatan Semampir Hery Prasetyo.

Hary nerangake, ing antarane pendhudhuk Semampir sing cacahe 200 ewu, 172 ewu wong mujudake warga sing duwe hak antuk e-KTP. Ya, KTP sing wis dicetak 138 ewu. Dene sing 34 ewu iku minangka warga diwasa, nanging durung mlebu dhaftar PRR.

Mula iku, Hery ngajap warga sing rumangsa durung duwe e-KTP supaya enggal lapur menyang kecamatan. Yen sing gegayutan ora bisa teka merga repot, pehak dispendukcapil bisa nindakake sistem ‘jemput bola’. Mung wae, tambahe Hery, warga sing e-KTP-ne wis dicetak nanging ilang utawa pindhah alamat ora oleh didhisikake. Hery menehi wektu sesasi marang warga sing ngajokake owah-owahan data utawa pencetakan maneh.

Nah, ana sing wis isi biometrik, nanging nganti saiki durung dadi. Sajake, ana datane sing salah. Mangga dipesthekake mrene. Yen kabukten ana masalah, bisa enggal dibecikake ing dispenduk-capil,” tandhese Hery. (Bsh)

Berita Terkait

Samak Minggu Ini

img

img

Sumber Semangat

Aja nganggep awakmu tansah salah, uga aja nganggep awakmu tansah bener.

Klik

KAYA JELI

Iki dudu plastik utawa ager-ager jeli, nanging iki bangsane iwak. Jelase iki Plankton kang wujude bening. Jeneng latine yakuwi Salp (Salpingo-oophorectomy) mujudake kewan kang nduweni kaunikan kanthi kulit transparan. Saking transparane, akeh wong ngira yen plankton iki plastik bening kang ngambang ing laut. (d/ist)***

Pethilan

Saperangan gedhe kabutuhan bawang putih diimpor

Petani wis biasa nangis bawang Bombay kok!

Sertifikasi tanah kuwi program nyata, dhawuhe Presiden

Dadi sing apus-apus sapa iki?

Wakil rakyat saya adoh saka rakyat

Saya adoh, menyang segara wae!